YOHANA 21

Yesu gabussa giinealan ispwa

1Iing'ata hiji gabiikta Yesu goohiimsa geaw ginealangaaschi aba ghuuta basooda Diberiya, ak goohiimsiindunu geaw. 2Simon Betaro, ea Domasoyda siguura Saleaygweanda ea Natanaeliyda ng'eanyiida Ganeeda Galilaya, orjooga Sebedayo, sea ginealangaaschi suuk iyeenya, nea abeeda gwandeayi sean. 3Gwayeesha Simon Betaro saawa, “Gaydawa dalealu ghweayeega.” Gwayeesha saawa niny, “Eara aseasa gajeeteayeena sea ang'iing'i.” Ng'ata goodeayi ak gwading'da maleambooda; ak eaweedida ea mwanyasa eara gil.

4Muchu nea goorearu aseeta ghamiinaada Yesu aba ghuuta basooda; nea giinealanga ea mwanala gideaba Yesu gil. 5Hean gwayeesha Yesu saawa, “Diibiga, goondeawi ghweayeega?” Ghwasha saawa nea gwayeesha, “Manda.” 6Gwayeesha saawa, “Ajaksiina gheareedanga murdeeda maleambooda bea geatinda dugwa, ak gajanyasa.” Ng'ata gwajakta gheareedanga ak ghwaraay goongiiru aba seang'ayda ghweayeega. 7Iidu gwayeesha giinealaneedida bwariiy Yesuun Betaro, “Nih Ng'utamiida!” Iiy Simon Betaro gideaba nih Ng'utamiida gil, gageanu hang'daanyi ak gwaradiischeewa aba gideaba gwachi ea dawiish, amang'ata gwadeambiirsa jeeda beega. 8Hean ghapka giinealanga suurja ea ghwahidu ghuuta basooda nea goongiiru gheareedanga nea ghwanyiit ghweayeega, nea abeeda ea miisheageewa ng'eanyiida ghajaam aba iisidasaada geeshanga gayghwahita geeshan bughala hiteayda ghuuta beega.

9Hita ng'eanyiida ghajaam ghwadaah beasta ghuurga nea sighwar nea gwanda beasta ghweayeega ea mukaate. 10Gwayeesha Yesu saawa, “Ayeani hiji ghweayeega mwaatkwa oolealu ghamneawa.” 11Hean gwading'da Simon Betaro jeeda maleambooda ak gaksu gheareedanga ea ghoahiidu ng'eanyiida ghajaam nea ghwanyiit ghweayeega hees nyiit bughala ea haradam ea damasamwagu; earapeadi saang'a ea gwadeenuun, ea mii gang'acheaweada gheareedanga. 12Gwayeesha Yesu saawa, “Apkaani ajaada ghuusi.” Nea abeeda ghanyea manda aba jeeda giinealanga dea badaksa ak ghoanyaash gideaba, “Ang'iing'i ng'eaha?” Aba gideaba ghwanal Ng'utamiida gil. 13Ghwaan Yesu ak gageanda mukaate ak ghoadaw saawa ak gwasindunu eara aba ghweayeegiga. 14Nih deaba samwagu gil aba giihiimsiinda ahiimsa geaw Yesu ginealangaaschi aba iing'ata duunooda duuna miyeeda.

Yesu ea Betaro

15Iing'ata nea nijaat ghuusiga ghoanyaash Yesu Simon Betaro nea gwayeesha, “Simon, orjeeda Yohana, gibwariinyaan ea laabwana hoowa orjusu?” Gwayeesha niny, “Ea, Ng'utamiida; ginali gideaba aniini ghaabwariinyeey.” Gwayeesha, “Ahaaghwana gisilgeasu.” 16Gabiikta gwayeesha niny deabiyeenya, “Simon, orjeeda Yohana, Gibwariinyaani?” Gwayeesha: Betaro niny, “Ea, Ng'utamiida; ginali gideaba ghaabwariinyeey”. Gwayeesha, “Ahaaghwana gisilgeasu.” 17Gabiikta ghoanyaash deaba samwagu, “Simon, orjeeda Yohana, Gibwariinyaani?” Gagiisan Betaro aba gideaba geanyaash deaba samwagu gideaba Gibwariinyaani?” Gwayeesha niny, “Ea, Ng'utamiida; ang'iing'i ginali haleanjeeda sean, ang'iing'i ginali gideaba aniini ghaabwariinyeey.” Gwayeesha Yesu, “Ahaaghwana gisilgeasu.” 18Aba huumwa, aba huumwa, geayeeshiineey, ghayi nea guduwoosa gheareemaneeda iissa giimuusi rada manandaang'u ak guwi heeda wassean igasayi; amadu nea nihuuwi gweargweeda, gajadoabiiwa geatingaagu, ak ghwaranyi siinuut ak ghwaanyi heeda ghwanyawa migassi una.” 19(Aba inyas ghwanyaashtunuun goohiimsa Betaro gichea ghameawda ak ghoaghaambiit ASEETA). Ng'ata ng'asheesu gwayeesha, “Eani geeshteanyu.”

Yesu ea giinealaneeda nuut

20Iidu ghwayam geaw Betaro ak ghwadaah giinealaneedida bwariiy Yesuun, nea ghwaat geeshta, nea diita ghayi diiw geaw aba daghataanyiin gil shing'ada damanda agiischooda nea ghoanyaash gideaba, “Ng'utamiida siida jea ghwalaapnyi bwadaw ng'eaha?” 21Daah Betaro niny gwayeesha Yesu, “Ng'utamiida ama baleanji?” 22Gwayeesha Yesu niny, “Iyeagasayi goobiida badayda ng'eanyiida ea dabiigu gwasawanyi naaha? Ang'iing'i eani geeshteanyu!” 23Hean ghaghayda iitida aba jeedeaba orjoogiga gideaba giinealaneedida mayghami; nea Yesu niny ea mii gwayeesha, giinealaneeni mayghami geaghus gideaba gwayeesha, “Iyeagasayi goobiida badayda ng'eanyiida ea dabiigu, gwasawanyiini?”

24Giinealaneeni nih dea muuwu ng'asheesuun gil, ak ghang'oar; ak geanali gideaba muuwwuunoadaanyi huumwa gil.

Huuydeanda

25Gwanda ng'asheega saang'a sin Yesu; nea inyeeda ghwanyawa geang'waar sean, ghaaghanyi eara ng'eanyiida gwachi mayghoamu goodiiw gitaabwajeega jea eang'oar.

Currently Selected:

YOHANA 21: BG15

Highlight

Copy