GADIYEEDA GIIJASOODIGA 1

1Aba gitaabooda madeeda, Ea Diofilo, geasinyi haleanjeeda sean ghayi sin Yesu nea ghoanaal, 2ea ghwahita eaweeda siyaada humng'eeda, iing'ata nea niidaw diigheanda giijasoodiga ghayi loat aba naweeda Guroorooda Ghaydit. 3Ak goohiimsa geaw saawa iing'ata miyeeda nea majeek iing'ata sawanadeeda nea ghoahiimda geaw aba gwadeagwajeega saang'a, ak gabussa saawa iing'ata askwearjooji haradam, nea gabaloola iita sugoocheanduumeeda ASEETA. 4Damanda mideayeewa gwareekusa saawa ea mwabeawana Yerusalemu, ak ghoamuughu heeleesiinda Ghweanda, nea gwayi, “gooyiing'si heedeanyu, 5gideaba, Yohana goobaatiisan aba beega, nea heeda miighang'ataawa eawoojisu saang'a agooga gajeepaatiisaneegwa aba Guroorooda Ghaydit.”

Yesu geayaat humng'eeda

6Iidu nea ghabwat geat, geanyaash niny, “Ng'utamiida, abeeda aba damani gajadeelsiina sugoocheanduumeeda Israeli?” 7Ng'ata gwayeesha saawa, “Mii gadiyeedeang'wa gil nalooda damanyoojiga ghana gheata sin Bwaabwa aba gheambalmeadaanyi. 8Ak gajanyasa uurda iiwuh heedeang'wa Guroorooda Ghaydit; ak gajahuuwa muushoodigeasu aba Yerusalemu ea Yudeyeesean ea Samariya ea ghoah muudeanooda ng'eanyiida.” 9Iing'ata rukunoodeaba ng'asheesu, damanda duu gang'uleewa, geetiing'da humng'eeda, ak gageandeawa shamooghooda madeeda gheanyanga nyaawa. 10Hean nea gudugang'ula humng'eeda damanda beawa, ng'ula ghamiinaada fih iyeenya aba murdeeda nyaawa nea gookwa hang'weaka eashish, 11ak gwayi, “Fuga Galilaya ghwasaan anda ghoamiinaadi nea goong'ulayi humng'eeda? Yesuheeni beawa heedeang'wa ak gawa humng'eedean, gaygabiikteaydunu gawuurji gidaghamneawa oadaakti nea gawa humng'eedean.”

Siida hoorgeeda Yuda

12Iidu gabiikta Yerusalemu, nea abeeda gwaleabu Giijeeda Saytuunajeega neekeewa mujiineeda Yerusalemu, hita gilomiteanagi; 13iidu nea geehita, gaweay jeemba ghooriini sideeksa uhuumba nuut, ak goobiitpiit geaba Betaro, Yohana, Yakobo, Andreya, Filipo, ea Domaso, Bartolomayo, ea Matayo, Yakobo orjeeda Alfayo, Simoneeda Selote, ea Yuda orjeeda Yakobo. 14Fiisu abeeda ghabwat geat ghamwaash ASEETA ghawooda, ak gwanda jeedeaba gadeemsu Mariyayda was gheamata Yesu, ea orjooga ghaamwat.

15Aba eawoojigiga ghang'eat Betaro ghamiinaada aba jeeda fuga siduupcheewi (nea abeeda mooneeda buuneeda ghwahita bughala ea diktam), ak gwayeesha, 16“Fuga siduupcheewi, gaygwasa ng'ooruutka, ghayi rugu Guroorooda Ghaydit aba mwadi aba ghuuta Dawdi, aba badayda Yudayda was siida asheedeawa fuga ang'waay Yesu. 17Yuda abeeda gaba meatkweedeanya aba gideaba gealoat eara niny gwasin gadiyeeni. 18(Ng'ata ghwasha siisi madamnyeanda aba gisiitaw aba munyindaanyi; ak ghoabeadaawa uhuuda ak ghwanyar jeeda ak gwardu hiineegaaschi jarooda. 19Ghwanal buuneesean bea ng'eanyiida Yerusalemu hean geeng'assa madamnyeandida gheawunga ak geeguura, Akeldama nea gideaba madamnyeanda foojeanda.) 20Aba gideaba geeng'oorsa jeeda gitaabooda Nyiigheega gideaba,

‘Gagasa ghoah gheanyi eemeeda,

ak ea adagoobiida sih jeeda’;

nea

‘Hoorgeadaanyi bea gadiyeeda dageanda siinuut.’

21Nea siyagi aba jeeda fuga siiteayeewi damanyoojiga sean wuna Ng'utamiida was Yesu nea gwariteawa jeedeanya, 22ghang'eada giibaatiisanda Yohana ea gagul eaweeda ghayi siyaada humng'eeda nea ghabeawa heedeanya nea siyagi aba jeedeaba fiisu geaghus eeteayeena ghoah muushoocheanda aba duunoadaanyi.”

23Hean iidu geerugu gheawung'spa fih iyeenya, Yosefuheeda siguura Barsaba nea gheawun suuk geeguura Yusto, ea Matiya. 24Ng'ata geamwaash ASEETA nea geeyi, “Ng'utamiida, ang'iing'i ginali gurooruunatka buuneesean, asi ahiimneasa aba jeedeaba fiisu asiyeenyean siida iloadi, 25ak gwasin gadiyeeni bea giijasoocheanduumeedean, gawa hoorgeeda ghayi bea Yuda nung'usa heeda niny ak gawa hich nuut.” 26Ng'ata geeng'alealeesa saawa, ak iidu gealoat Matiya; ak gheawungaaschi geeng'oorsiinyi sea gea giijasoodigiga atamwanagiin.

Currently Selected:

GADIYEEDA GIIJASOODIGA 1: BG15

Highlight

Copy