YOHANA 20

Bung'eeda manda jeeda siida

(Mat 28:1-8; Mar 16:1-8; Luk 24:1-12)

1Hean eaweeda madeeda bea wiikajeanda, gawa Mariya Magdalena heeda bung'eeda gheata beashata nea gudea misana ak ghwadaah lagheaneeda nea sigeanda aba ghuuta bung'eeda. 2Ng'ata ghafwach ea ghwahita heeda Simon Betaro ea giinealaneeda niirja ghayi bwariiy Yesuun ak gwayeesha, “Sigeanda Ng'utamiida aba jeeda bung'eeda ak ea meanali heeda siyiin.” 3Gaweay Betaro sea giinealaneeda niirja ea ghwahita heeda bung'eeda. 4Gwasalda duwaawi, amadu ghafwach Giinealaneeda niirja muuchi ea ghoadaraam Betaro, ak goosheeda ghwahita heeda bung'eeda; 5ghwahiiy geaw ak goong'weersa jeeda shoomanda ak ghwadaah hang'weaka bumbuni mida hoowa, ak ea moabita jeeda. 6Ghwahidu Simon Betaro, gweadu geeshta amahidu gawa jeeda bung'eeda; ak ghwadaah hang'weaka aba ng'eanyi, 7nea weastida, heeta sirada uhuudaanyiin ea meanung' gwandeayi sea hang'dida, nea abeeda ea simughut ak geayiin hichpa geaw. 8Iidu eara Giinealaneeda ghwanyawa asheeda ghwahita heeda bung'eedean, earada ghoabita jeeda bung'eeda, ak ghwadaah ak ghamwas; 9abeeda mii ghwanal ng'ooruutka ginyaashta, bea gideaba gabean ea gaygwaduuna miyeeda. 10Hean gabiikta Giinealangiga gaweay ghoah.

Yesu gabussa Mariya Magdalena

(Mat 28:9-10; Mar 16:9-11)

11Abeeda Mariya ghamiinaada aba murdeeda bung'eeda nea gooyeawda, damani duu gooyeawdeewean ghwahiiy geaw goong'weersa jeeda shoomanda bung'eeda; 12ghwadaah malaykaji iyeenya akwa hang'weaka eashish nea goobiitpiit aba heeda heeta siyiin musta Yesu, nea dea manda deascheeda uhuuda niirja gwanda deascheeda geeshanga. 13Gwayeesha niny, “Iyya, ghwasaan anda giiyeawdi?” Gwayeesha gheamata saawa, “Sigeanda Ng'utamiideanyu ak ea mwaanali heesiyiin.” 14Iing'ata rukunoodeaba ng'asheesu gwasachsa ghaat bwadaw ak ghwadaah Yesu nea ghamiinaada ak ea mwanala gideaba Yesu gil. 15Gwayeesha Yesu niny, “Iyya ghwasaan anda giiyeawdi? Gigaseadayi ng'eaha?” Duu gwayeena Mariya gwadeepa ea siida fur madamnyeanda gil gwayeesha, “Siida mureeda iideepa ea nigeandi ang'iing'i girukunean heeda iyiini, ak gaydawa aniini dageanda.” 16Gwayeesha Yesu, “Maria.” Ghwayam geaw ak gwayeesha aba iita Ebraniya, “Raboni!” (nea gideaba Giinealshoocheanda gil). 17Gwayeesha Yesu niny, “Adiing'waanyaan, aba gideaba mii dawa heeda Bwaabwa; asi ng'eada una heeda orjooga iyya ak giyeeshi saawa, aniini naascheang'di dawa heeda Bwaabwa nea Ghweandeang'wa gil, heeda ASEETEANYU nea ASEETEANG'WA.” 18Ghang'eat Mariya Magdalena gawa ak gwayeesha giinealanga, “Naadaayi Ng'utamiida”; ak gwayeesha saawa gideaba nirukusa ng'asheesu.

Yesu gabussa ginealangaaschi

(Mat 28:16-20; Mar 16:14-18; Luk 24:36-49)

19Iidu nea niiw shing'adeeda eaweedida bea madeeda bea wiikajeandean abeeda ea nibassa geat giinealanga jeemba gheaw, nea abeeda ea sirat gidaghuuta aba gheawalmeeda fuga Yahudi, deagheata ghwaan Yesu ak ghamiinaada aba bugusta nyaawa ak gwayeesha, “Abeaha Hoyyoo.” 20Iing'ata rukunoodeaba ng'asheanji goohiimsa geatingaaschi ea gisheajeagaaschi. Hean gahoosan Giinealangiga muuchi iidaah Ng'utamiida. 21Gabiikta Yesu ak gwayeesha gicha, “Abeaha Hoyyoo. Gawuurji gidaghayi ajeakteaydanean Bwaabwa, asi eara aniini geajeaktaneegwa agooga.” 22Ahiit rukunoodeaba ng'asheesu gaguussa jeameeda nea gwayeesha, “Oang'waanya Guroorooda Ghaydit. 23Nea iyoosamiisi riing'eega buuneeda, gajeesamsa, ea moosamsiini, ea majeesamsa.”

Yesu sea Domaso

24Damani Domasodida bea jeedeaba orjoogiga atamaniyeenya siguura Saleaygweandean, abeeda ghwanyawa ea mandeawana orjooga suurja damandida hina Yesuun. 25Hean gwayeesha giinealanga suurja niny, “Sidaayi Ng'utamiida.” Gwayeesha niny saawa, “Iimeadeaksiini geatingaaschi ghuusiga musumwaarajeega ak ghaang'waanyi mooneedeanyu heeda haabwa deaneaduutka musumwaarajeega nea ghayiinyi mooneedeanyu gisheajeagaaschi ea maydamwas.”

26Muchu nea ning'ata eawooji sis gabiikta gicha gabassa geat giinealanga jeeda ghooriida nea abeeda eara Domaso gwanda hiji. Abeeda gidaghuudajeega sirat, deagheata ghwahidu Yesu ak ghamiinaada aba jeenyaawa ak gwayeesha, “Abeaha hoyyoo.” 27Ng'ata gwayeesha Domaso, “Goona mooneadaang'u iina hiji, ak ging'ulayi geatingeasu; ak gigooni geatindaang'u ak giing'waanyi gisheajeegeasu; ak ea adiwoosi siida mamwasa, huwa siida mwas.” 28Ghwasha Domaso nea gwayeesha, “Ng'utamiideanyu ea ASEETEANYU!” 29Gwayeesha Yesu niny, “Gimwasi aba gideaba gidaayaani? Ghang'wana fugiga mwadaahan amadu ghamwasiin.”

Gissibaysiina gitaaboani

30Yesu gwasin aba madeeda ginealangaaschi gwadeagwajeega suuk duguuga saang'a miyeang'waar aba jeedeaba gitaaboani; 31suh geang'waar aba gideaba abeeda ghoamwaschi gideaba Yesu Gristo gil, Orjeeda ASEETA, amabeeda oamwaschi ghoanyaschi eaweega aba gheawungaaschi.

Currently Selected:

YOHANA 20: BG15

Highlight

Copy