GIING'EETA 38
38
Yuda ea Damari
1Iimuchu ghabeawa Yuda heeda orjooga ghaamwat, ak gawa gwandeayi sea siisi siguura Hira, bea mujiineeda Adulamu. 2Ng'ata ghwadaah Yuda aba ng'eanyiita midean hut bea eemeeda Ganaani siguura gheawungaaschi Shuwa; ak ghaghi, 3muchu gagweayiit ak gwaji baleanda, ak gaguura gheawungaaschi Eri. 4Ak gabiikta gagweayiit ak gwaji baleanda, ak gaguura gheawungaaschi Onani. 5Ak gabiikta gicha gwaji baleanda, ak gaguura gheawungaaschi Shela. Abeeda gwanda ng'eanyiida Gesibu damanda jiila baleanda. 6Hean gageesa Yuda orjeedeanyu was duweacheeda siguura Eri gatmooda, siguura gheawungaaschi Damari. 7Nea Eri duweacheeda Yuda eamuy seara aba madeeda NG'UTAMIIDA; ak ghabwar NG'UTAMIIDA ghami. 8Ng'ata gwayeesha Yuda Onani, “Una heeda gatmooda orjeeda geamadu, ak giighiisi hoorgeeda orjeeda geamadu ak ginyaksi orjeeda geamadu diibiga.” 9Iidu gwajeeng'u Onani gideaba diibiga mayghoah gaaschi; hean iissa iiwea heeda gatmooda orjeeda ghaamwat ghwashoamwa nyasooda diibiga. 10Ak ng'asheega sin gamunyiit aba madeeda NG'UTAMIIDA, ak ghabwar eara niny. 11Ng'ata gwayeesha Yuda Damari was gatmooda orjeeda ghaamwat, “Abiidana masinung'weanduumeeda aba ghaheang'wa, ea gwahisa heeda orjeedeanyu was Shela” aba gideaba ghoawal gideaba gajiidu ghami, gawuurji orjeeda ghaamwat. Hean ghang'eat Damari gawa goobiida gheaghwaan.
12Iimuchu ghami gatmooda Yuda was hudeaba Shuwa; iidu nea geegeandeawa Yuda salgheang'da, gawa ng'eanyiida Dimna heeda fugaaschi lajaada buudeega gisilga, nea niny gil sea buweacheandaanyi siguura Hira bea mujiineeda Adulamu. 13Iidu geerukusa Damari gideaba “gheambasiyeadaang'u nuwa ng'eanyiida Dimna ghwalajaada buudeega gisilgaaschi,” 14ghwayiin ng'eanyi hang'weaka masinung'weanduumeeda, ak gookwealsa uhuudaanyi weasta, ak gookwealshi, ak goopteada aba gidaghuuta naweeda weah Enaimu, mida ghuuta naweeda weah Dimna; aba gideaba Shela nihissa heeda, ak ea miyeataw gatmooda ghaghi. 15Hean daah Yuda Damari ghwanung' ghoah gili hiseada, aba gideaba gwadukuta uhuudaanyi. 16Gawa heeda aba ghuuta naweeda ak gwayeesha, “Beeni, nung' doan headaang'u,” aba gideaba mwanala gideaba gatmooda orjeedaanyi. Gwayeesha, “Gaygoonean naaha, iwuni heedeanyu?” 17Ghwalamda niny ak gwayeesha, “Gaydeaneey ijooda mwanang' aba jeeda noogeasu.” Ak gwayeesha niny, “Gaygoonean gichea dandeawa, ea eani ijooda?” 18Gwayeesha, “Gigasayi dagoonyi gwadeagoomba naaha?” Ghwasha niny ak gwayeesha, “Goonean ghajijeanda mida gheataang'u, ea bileangida mida geatindaang'u.” Hean ghoadaw ak gawa heeda, ak ghwarada niny. 19Ak ghang'eat ak gawa, ak gageanda weastaanyi akwealsa badayda hang'weakaaschi bea masinung'weanduumeadaanyi.
20Goojeakta Yuda buweacheandaanyi was Hira ghamwaghaada mbooyda ak ghoaghuumu haleanjeeda mideawa gatmooda, ea mwanyasana hiji gatmooda. 21Ak ghoanyaash siispa ng'eanyiita nea gwayeesha, “Gwanda yeenu gatmoodida hiseada mida Enaimu abiita ghuuta naweedean?” Hean gwayeesha, “Manda hiji gatmooda hiseada.” 22Ng'ata gabiikta heeda Yuda ak gwayeesha, “Aniini mwaanyasi gatmooda; ak gwayi buuneedeaba ng'eanyiita, ‘Manda ng'eang'i gatmooda hiseada niibiida hiji.’” 23Ghwalamda Yuda ak gwayeesha, “Nung'waada gwandeawa gatmooni haleanjeeni ghoah gaaschi, meagassi gideaba gaygabarreeweasa reari buuneeda; ng'ula ghaadaydi mbooyda ak ea minyasani hiji.”
24Hean nea ghang'ata sheeh samwagu geeyeesha Yuda, “Damareeda was gatmooda orjeedang'u ghayi gwahiseada; ak ghamneawa ea nidurmwaniit.” Ghwalamda Yuda ak gwayeesha, “Ooruuni, ak ghoaghwardi ghami.” 25Damanda siiruuna, ghwanung' eeyeasa gheambasiyeadaanyi iita gideaba, “Aniini naanyaschi gweayuumeeda aba heeda siida bea haleanjeeni.” “Geamuscheegwa ang'ula ak ghoadaayi siida bea ghuniin ea ghealooni ea bileangini.” 26Hean ghwanal Yuda haleanjeedida ak gwayeesha, “Niny ghoadoabiiw, ghaaraanyi dasin gidamiisean gwachi gaydaadaw orjeedeanyu was Shela.” Ak ea mudu gabiikta Yuda gwandeawa. 27Iimuchu nea ghwahita damanda jeata, geejeeng'u gideaba gaygwaji saleahooga. 28Damanda laja, gooruudu akaleala geatinda; ak gageanu deepshoocheanda ak gwarasa geatinda gulbeeda areara nea gwayi, “Nih duweacheeda.” 29Adealda geatindaanyi bwadaw, hean geesheeda eeji orjeeda ghaamwat; ak gwayi deepshoocheanda, “Daaha gidijaati naweadaang'u!” Hean geeguura gheawungaaschi Beresi. 30Ak gwardu orjeeda ghaamwat nea gwanda geatinda gulbeeda areara; ak geeguura gheawungaaschi Sera.
Currently Selected:
GIING'EETA 38: BG15
Highlight
Share
Copy
Want to have your highlights saved across all your devices? Sign up or sign in
The Bible in Datooga © Bible Society of Tanzania, 2015.
