GIING'EETA 37

Yosefu sea orjooga ghaamwat

1Hean goobiida Yakobo ng'eanyiida ghayi abiita ghwaan, was ng'eanyiida Ganaani. 2Nih iita jeata Yakobohi. Yosefu abeeda gaba gweanyeew damanispwa, nea gooheagwiidi nooga sea orjooga ghaamwat; nea gwandeaydooschi sea orjooga Bilha sea gea Silpa, was gadeemga ghwaan; ak gweasa ghwaan iita ng'asheega munyas sina orjooga ghaamwat. 3Nea abeeda Israeli ghabwariiy Yosefu muuchi ea ghang'al diibigaaschi suurja, aba gideaba baleanda jih nea niwaasiidi; ak gwasissa hang'da geaw gul ng'eanyi mideawa geatinga. 4Hean daah orjooga ghaamwat gideaba ghabwariiy ghwaan muuchi ea ghoadaraam orjooga ghaamwat, hean geesit, ak iissa ea meebaloola aba ghuuta miy.

5Muchu goorgweadi Yosefu, iidu nea gwarukwiisa orjooga ghaamwat iita hean geesit ghwaraanya. 6Gwayeesha saawa, “Ooleeysiiniit giirgweatka eargweadayi: 7ng'ula, gearadaadi muschoonga ngaano aba madamnyeanda, ak ghang'eat muschoonyeandeanyu ghamiinaada; ak ging'ulayi gooweameesa muschoongeagwa guumda, ak gwatkuy aba madeeda muschoonyeandeanyu.” 8Ng'ata gwayeesha orjooga ghaamwat niny, “Aba huumwa ang'iing'i gajambalaneasa? Ghana ang'iing'i jea ahaaghwaneasa aba huumwa?” Hean geesit muuchi aba giirgweatkaaschi ea aba ng'asheagaaschi. 9Muchu gabiikta goorgweadi girgweacheanda nuut, ak gwarukusa orjooga ghaamwat, ak gwayeesha, “Ng'ula, geargweadayi girgweacheanda nuut; asi ng'ula, aseeta ea sheeda, ea miin damwanagi nea gwatkuy aba madeedeanyu.” 10Hean rukusa ghwaan ea orjooga ghaamwat, gwareekusa ghwaan, nea gwayeesha niny, “Nih girgweacheanda naaha iirgweadayiin? Iing'ulayi gaydoan aniini ea geamadu sea orjooga geamadu ak geetkuyi aba madeadaang'u?” 11Ng'ata gwashissa ghaang' orjooga ghaamwat, nea ghwayiin ghwaan ng'asheanji jeadaanyi.

Yosefu geeshaayda ak geayaat Misri

12Muchu gaweay orjooga ghaamwat haghweeda nooga ghwaan aba heeda neekeewa Shekemu. 13Hean gwayeesha Israeli Yosefu, “Neada orjooga geamadu ea moahaaghwa nooga aba Shekemu? Asi beeni, gaydeajeaktaneey una heanyaawa.” Ak gwayeesha Yosefu, “Ghwahit gaydawa.” 14Ng'ata gwayeesha ghwaan niny, “Asi una ghamneawa, ak gidaahi orjooga geamadu ea gaba seayu, sea nooga; ak giyeanean iita.” Hean goojeakta ghabeawa mooheeda Hebroni, ak ghwahita Shekemu. 15Ak ghwanyasa siida Yosefu nea gwaneayi aba jeeda ng'eanyiida; ak ghoanyaash siida nea gwayeesha, “Gigaseadayi naaha?” 16Ghwalamda ak gwayeesha, “Geagaseadayyi orjoogiyya, geamuscheey rukunean heeda ahaak nooga.” 17Ghwalamda siida ak gwayeesha, “Nibalak, aba gideaba ghayiinyi nea gwayi, ‘Anung' eeweaya ng'eanyiida Dotani.’” Hean ghwaat Yosefu geeshta orjooga ghaamwat, ak ghwanyasa ng'eanyiida Dotani. 18Ak gwadeagu saawa nea gudeasheagi, hean nea mii gwaneekiisa saawa gabaloola badiida gichea eabwarda niny. 19Hean gwayeesha geat, “Asi nukwa ghwaan siida giirgweatka. 20Asi apkaani, eabwara ak geejaksi jeemba shoomani; ak abeeda geeyeeshi niyaak diyeayda jarooda, ak abeeda geadaayi giirgweatkaaschi ea jea ghoah huumwa.” 21Iidu nea ghwayiiy Rubeni ng'asheesu, gagasa gichea gwalealdeayda aba geatinga nyaawa, ak gwayeesha, “Adeebwarji.” 22Ng'ata gwayeesha Rubeni saawa, “Adoahiidi foojeanda; ajaksiina jeedeaba shoomani mida dareapcheedean, ak ea adoosawanyi,” nea gagasa gichea gwalealdeayda aba geatinga nyaawa ak ghoadealda heeda ghwaan. 23Iidu nea ghwahiita Yosefu heeda orjooga ghaamwat, geebwaash hang'daanyi geaw mideawa geatinga geawi gwachi akwa; 24hean geang'waay ak geejaksa jeeda shoomanda. Abeeda shoomanda ea ghajaam, manda jeeda beega.

25Ng'ata goobiitpiit ak gweagiischi; ang'wearda ghwadaah bareanoodiga fuga ageakshachi bea dooshta Shumwaheeli nea gwading'da ngamiyajeega nea gwaleabu Gileyadi, nea ghwasar mughoondooda ea nagheeda sea geediga ng'andidi nea ghwaat ng'eanyiida Misri. 26Ng'ata gwayeesha Yuda orjooga ghaamwat, “Neada gajeanyasa naaha iisibwarji orjeeda giyeanya ak geafunyi foojeandaanyi 27Asi apkaani, eashaayda aba heeda fuga Shumwaheeli, ak ea meayiini geatingaasa badaydaanyi, aba gideaba orjeediyya, nea foojeandeanya.” Hean gwaneaji orjooga ghaamwat. 28Iidu ghang'ata fuga ageakshachi bea eemeeda Midiyani; hean geelealna Yosefu jeeda shoomanda, ak geeshaayda aba heeda fuga Shumwaheeli aba shiliingaji diktam; ak geayaat Yosefu ng'eanyiida Misri.

29Iidu nea gabiikna Rubeni heeda shoomanda ak ghwadaah gideaba Yosefu manda jeeda shoomanda, ghabwaashaada hang'weakaaschi, 30ak gabiikta heeda orjooga ghaamwat, ak gwayeesha, “Orjeeda manda hiji; ak gaydagaleenu aniini?” 31Ng'ata gageanu hang'da geaw bea Yosefu, ak gwanuus mbooyda, ak ghang'uda hang'da jeeda foojeanda; 32iidu ghwaat hang'da ea ghoahiita heeda ghwaan ak gwayeesha, “Aseasa sinyaschi hang'i; heapi ang'weersiina ea hang'da orjeedang'u ghana mii daanyi.” 33Hean ghwanal ak gwayeesha, “Nih hang'da orjeedeanyu; niyaak diyeayda jarooda; Yosefu ghaanali siyaak.” 34Ng'ata ghabwaashaada Yakobo hang'weakaaschi, ak gookwealsa manandaanyi hang'weaka guniyajeega, ak gagiisan aba orjeedaanyi ea gageawiit. 35Gabiigu orjoagaaschi sean ea haweagaaschi sean ak gageandeawa salgheang'da; ak ghaheawa gideaba gajeegeanda salgheang'daanyi, ak gwayeesha, “Manda gaydawa Gheeda Miyeeda heeda orjeedeanyu nea gutagiisan.” Hean gagutu ghwaan heareagaaschi. 36Iimuchu aba ng'eanyiida Misri ghwashaayda fuga Midiyani ak ghoadaw Botifa was siida haw bea gheeda Farao, was shirikarajeanda haweewa suurja.

Currently Selected:

GIING'EETA 37: BG15

Highlight

Copy