GADIYEEDA GIIJASOODIGA 6
6
Weedan ispwa
1Nea aba askwearjoojisu ea niihaada mooneeda giinealanga, ng'ata ghoaptu giiniikghta dageascheeda fuga Yahudi baloola iita Yunani sea fuga Ebraniya aba gideaba ninung'usa heeda masiinung'weega nyaawa aba lakiisiinda haleanjeedeaba galeagasean. 2Hit gaguursa fugiga atamaniyeenyean giinealanga sean nea gwayeesha, “Mwahida gideaba gajeanung'waada rukwiideayda ng'asheanda ASEETA ak geepiitpiichi aba badahuuka measajeega. 3Asi fuga eaduupcheewi, aloada fih ispwa aba jeedeaba fiisu miyaasiin searoojiin, mideawa Guroorooda Ghaydit, ak ea weaghoodi, ak gajeataw gadiyeani. 4Ak aseasa gajeamwaasha ASEETA nea geesinyi gadiyeeda ng'asheanda.” 5Nea ng'asheanda rugu goohoosan eemeetuw, ak ghwaloat Stefano, siida mideawa masaweega muuchi ak gwandeawa Guroorooda Ghaydit, ea Filipo, ea Burokoro, ea Nikano, ea Dimoni, ea Barmena, ea Nikola, was siida doabiiwaat bea ng'eanyiida Antiyokiya. 6Ng'ata geayaat fiisu madeeda giijasoodiga, ak ghamwaash ASEETA nea ghwayiin geatinga nyaawa iheenga nyaawa. 7Ghaghayda ng'asheanda ASEETA; nea ghoahaada muuchi mooneeda giinealanga aba Yerusalemu, nea ashoohoodiga saang'a gwasissa mureeda masaweega.
Ging'ooyda Stefano
8Nea Stefano, abeeda gwandeawa dagheerjeanduumeeda ea uurda, gwasina ng'asheega deamdeameadi ea gwadeagwajeega aba jeeda buuneeda. 9Iidu gwanda fuga mwaatkwa bea gheeda siinealshacheewa bea Fuga abal geat (aba gidasuguura), ea gea Girene, ea gea Aleksandariya, ea fugiga leabu Gilikiya ea Asiyaan, hean ghoaptu sheang'nyeeda sea Stefano. 10Ak ea mwoamu eajoar aba weaghuumeeda adaw Guroorooda ak ghwanung' gabalooliin. 11Ng'ata geahaak buuneeda aba makcheameeda, nea gwayi, “Siyiinyi siisi nea gwarugu ng'asheega giing'weaka aba badayda Musa ea ASEETA.” 12Ak geeng'uuchi buuneeda ea gweargwa ea ng'oorshoodiga, hean geeweesa niny ak geeng'waay ak geeyaat madeeda gheeda sirgweacha, 13geesin muushoodiga ng'uyeega ak gwayeesha, “Siisi moang'wa ea marukuna ng'asheega munyas aba badaydeaba hiji ghaydidiin ea deaweeda; 14aba gideaba siyiinyi nea gwayi, Yesuheeni bea Nasaretiin gaygwanyarja gheawi sibata ASEETEAN, ak gayghwayam searoojiga ghayi gooneasa Musa.” 15Asi gang'ula buuneesean niny, nea fuga sean mida jeeda gheeda sirgweacha ghwadaah gideaba gheamamdaanyi gawuurji sea gheamamda malaykajeanda.
Currently Selected:
GADIYEEDA GIIJASOODIGA 6: BG15
Highlight
Share
Copy
Want to have your highlights saved across all your devices? Sign up or sign in
The Bible in Datooga © Bible Society of Tanzania, 2015.
