GADIYEEDA GIIJASOODIGA 5

Ananiya ea Safira

1Ghayi gwanda siisi siguura Ananiya ak gwandeawa gatmoadaanyi siguura Safira, ghwashaayda haleanjeeda nyaawa mwaatkwa, 2iidu nea ghwanal gatmoadaanyi ghafuy haleanjeeda mwaatkwa, ak gweadu mwaatkwa ak ghwayiin geatinga giijasoodiga. 3Ghwalamda Betaro ak gwayeesha, “Ananiya ghwasaan anda ginung' goobal gurooroadaang'u Shataani ea ghwanung' reengana Guroorooda Ghaydit ak gifunyi haleanjeeda mwaatkwa bea madamnyeandean? 4Madamnyeanda damanda mii shaaydaawana, abeeda mii daang'u? Ama ning'ata sheaydeayda, abeeda haleanjeeda ea manda geatingaagu? Abeeda ginyastiin gideaba gaysina ng'asheanji aba jeeda gurooroadaang'u? Ang'iing'i mireengani buuneeda gireenganayi ASEETA.” 5Iiy Ananiya ng'asheesu, ghoabeada ak ghami. Hean iiy buuneesean ghabeal muuchi. 6Ng'ata ghapka gheareemanga ak geekwealsa hang'da ak geeruuta jarooda ak geayaat eebuy.

7Iidu nea ning'ata roobuut samwagu bea aseeta ghwahidu gatmoadaanyi jeeda gheeda, nea mwanala gidanupnu. 8Ng'ata gwayeesha Betaro gatmooda, “Rukunean mooneeda oashaaydaawi madamnyeanda gwandeenu?” Gwayeesha gatmooda, “Ea gwadeenu.” 9Ghwalamda Betaro ak gwayeesha gatmooda, “Ghoanyastiin gideaba gajaheeleesiina duwaawi ak goosimnyi Guroorooda Ng'utamiida? Ng'ula, geeshanga fuga buy siyeadaang'u gwanda gidaghuuta, ak gaygooruutaneey jarooda eara ang'iing'i.” 10Deagheata goobeedeaysa ng'eanyi madeeda geeshangaaschi ak ghami. Yamu geat gheareemanga ghwahidu nea nimi, ak geeruuta jarooda ak geebung'sa murdeeda siyeadaanyi. 11Iidu ghang'ut muuwda haw muuchi ganiiseeda sean ea fuga sean iiy iiteaba ng'asheesu.

Gwadeagooda ea ng'asheega deamdeameadi

12Gwadeagwajeega saang'a ea ng'asheega deamdeameadi geesissa bugusta buuneeda nea gwasin geatinga giijasoodiga. Nea abeeda aghadoawana geat sean aba Doodooda Sulemani. 13Ak ea manda aba jeedeaba fugiga siida badaksa guuyeedeaba fugiga, amadu ghoang'waay buuneeda muuchi ak gwasissa mureeda. 14Ghoahaada muuchi fuga mwas ak gooheadeesa Ng'utamiida, fuga was eemeetuw headiga ea gadeemga, 15ea iissa eeyi bwak ea easar fuga miyeani eayiin gheatkweaka naweadinga, ak geanung' gwalil aba badahuuka bulaleenga ea likajeega, ama abeeda hidu Betaro eara ghanyi goojiroon jirooneadaanyi buuneeda mwaatkwa. 16Ghabwat geat fuga leabu mujiinajeega neaweesa Yerusalemu, nea gweadu fuga miyeani ea fuga beardooschi meangeenda, ak geahaap sean.

Giijasoodiga geaghabwas

17Ng'ata ghang'eat ashoohoocheanda haw sea fuga sean mideawa, nea fuga mwaatkwa was Sadukayajeega, hean gwashissa ghaang' 18ghoang'waay giijasoodiga ak geayiin ghealooniga. 19Iidu eawa ghwahidu malaykajeanda Ng'utamiida ak gootin gidaghuuta gheeda ghealooniga; ak gooruuta jarooda ak gwayeesha, 20“Aweayeena ak ghoamiinaadi aba jeeda gheeda sibata ASEETA ak goorukusi buuneeda ng'asheega sean bea eaweesuun.” 21Iing'ata nea niyiiy ng'asheesu, muchu gaweay jeeda gheeda sibata ASEETA askweari ak goonealshi.

Ng'ata ghwahidu ashoohoocheanda haw sea fuga mideawa ak gaguursa gweargwa girgweageeda ea fuga sean argweaji bea Israeli, ak goojeakta gaweay ghealooniga gweadu fugiga. 22Hita fugiga heesiin, ea mwanyasana saawa ghealooniga, gwayamu geat ak ghoadaw iita, nea gwayeesha, 23“Geehissi ghooriidida siratiisa buuneedean nea radaat nea furiischoodiga ghamiinaada aba gidaghuudajeega, ama siitinyi ea meanyasani eara sih.” 24Iiy shirikarajeanda haw ambal gheeda sibata ASEETA sea ashoohoocheanda haw ng'asheesu, ghahamng'eanyi aba badahuuka nyaawa, nea gwayeena ng'asheesu gayghoah naaha. 25Deagheata ghwahidu sih aba geeshangiga ak gwayeesha, “Fugigeanji heeta oojaksi ghealoonigean, ghamneawa gwanda jeeda gheeda sibata ASEETA ghoanaal buuneeda.” 26Ghang'eat shirikarajeanda haw nea goodeay shirikareadaanyi ak gaweay ama hita geeyeadu saawa nea meang'wanyana uurda, aba gideaba ghoawal ea mafuteewana buuneeda lagheanga.

27Iidu nea siyeadu saawa, geanung' ghamiinaada aba madeeda girgweageeda. Ak ghoang'eat ashoohoocheanda haw ghoanyaash nea gwayeesha, 28“Ghwasaan nea geaheawi gideaba gajoanaala buuneeda aba gheawung'su, ak ghamneawa ea noanyiichi Yerusalemu giinealshoodeang'wa aba gideaba googasayi ayeani foojeandeaba siisi badahuukaasa.” 29Ghwalamda Betaro sea giijasoodiga ak gwayeesha, “Gamiiseasa gideaba gajeawala gheang'da ASEETA mwasamwa siida. 30ASEETA ghweanigaasa gooduudu Yesuheeda ghayi oonuuschi aba damanda oongoorsiini uhuuda geetean. 31Nih deaghayi adiing'u ASEETA gil ak gawa geatindaanyi bea dugwa ak ghoah siida haw ea lealnoocheanda, ak ghwanung' gwaduukuuna fuga Israeli ak geesamsa riing'eega. 32Aseasa geewooschi muushoodigeaba ng'asheesu, ak gwasunu eara Guroorooda Ghaydit adaw ASEETA fugiga sissa niny mureedean.”

33Iiy fugiga ng'asheesu gwanyareesi muuchi, ea gagasa gwanuus saawa. 34Hean gwanda Farisaayajeanda girgweageeda siguura Gamalieli, was giinealshoocheanda deaweeda, adawi buuneesean mureeda, ng'ata ghamiinaada ak ghwanung' eeruuta buuneeda jarooda gilinuwaas. 35Ama ng'ata gwayeesha fugiga, “Ea fuga Israeli, ang'ula muuchi gichea ahinda fiisu. 36Nea damanda mii ghwahina askwearjoojiga ghang'eat Dewdas, nea ghoahiimu geaw gideaba niny gili, nea niny gaba jeedeaba fugiga, ramagu ghwahita bughalaji ang'waniin, hit goodeayi sea niny; amadu gealach gheata sea fuga sean aat geeshta ak geataarda ea ghoah haleanjeeda mwadaagha. 37Iing'ata niny ghwahidu Yudayda was siida Galilayaan aba askwearjoojigiga bea iitooda buuneedean ak ghwaat buuneeda mwaatkwa; ak eara niny ghami, nea fuga sean aat geeshta ghwadarda. 38Asi aba damani bea ghamneawean gaydayeeshiineegwa, ooheeleewana geat fiisu ak ghoanung'waadi; aba gideaba badiini ghana fughareani iibea buuneeda, gayghoabeada; 39ama iileabu heeda ASEETA, ea majoamuusa abwaanya fiisu aba gideaba gajiidu geejeeng'u gideaba goosheang'nyeewi ASEETA!”

40Ng'ata geesin gidagasa, iidu nea geeguursa giijasoodiga, geabwar amahit geerukusa gideaba adagudoanali buuneeda aba gheawunga Yesu, iidu geesiksa gaweay. 41Gwarita ak ghang'amwa madeeda girgweageeda, nea gahoosan aba gideaba gammiisa sawanadeeda aba gheawunga Yesu. 42Nea galeagasean iissa aba jeeda gheeda sibata ASEETA ea aba ghoah ea mii ghwanung'waada giinealshooda ea rukwiideayda Yesu gideaba Gristohi.

Currently Selected:

GADIYEEDA GIIJASOODIGA 5: BG15

Highlight

Copy