Mariko 11
11
1Neeli vandeserikia Yerusalemu, vakafika Betifage na Betania, nkulya uroń lwa misenifu. Karuma vanalosho vamwi vavili kavaia: 2Endeń kimuṛiń kilya kikee mbele yanu. Mukafika-fo lia eni muloliaa kyaashe kya nshungu kyavikie kitaare kyankayo̱ ni nndu. Kyawueń mukasheendee! 3Na kwakooya nndu amuiaa: Nki ili mukee itana kuri? Numbueń: Ni Nndumi awore kiimba nakyo, nae akiwiiṛaa lingi ia. 4Vakaenda vakalolia kyaashe kilya kya nshungu kyavikie io mwaangoń kiwooṛo kari ka shia nini, vakakyawua. 5Na vandu kiindi veeselelee-fo vakavaia: Mukee yawua kyaashe kyo mutane nakyo ki? 6Vakavaia sha lia Yesu eevvavavasaa. Nawo vakavaotoṛia. 7Vakaendie Yesu kyaashe kilya kya nshungu vakaala miseto yawo mungoń wayo. Nae kakaa rembo kwa ule yayo. 8Na vandu veengi vakaala miseto yawo shień. Na vengi vakaala-fo maṛamba vandeminya ifo nremiń. 9Na vandu valya veekee mbele na valya veekee numa vakarosa ngyununga veereraa: Eetikiswa uu asha arumwa ni Nndumi! 10Luṅiniswa umangi lwa nde yeru Davidi lushaa! Osiana kulya ule iṛuvewu!
11Kafika kulya Yerusalemu kaaka numba ya Iṛuva. Neeli andemaa illa-fo foose kundo koose kakwanisa. Kwavva ukwawuń kasomuka kaenda Betania andu emwi na valya ikumi na vavili.
12Ili vandekwimboo ngama veeukaa kulya Betania, kakooya aliwa nsoto. 13Kalolia nri wa nkuu ukee kwaasha uwore maru. Kaenda indella akwaa aloliaa-wo nunda. Kaufikia nta ilolia-fo kindo kita maru, fulya kitandefika kyeeri kya nunda. 14Kaaṛua kauia: Kuuka nnu na kumande miṛeṛe manya nndu atalye nunda tafo! Na vanalosho vamwi vakakiita.
15Kyasia vakafika Yerusalemu. Nae kaira na numba ya Iṛuva. Kabooka yumbuta valya veekee ikumbia-fo findo na yuṛia-fo. Kafuluta mesa ta veelasha fesa na fifumbi fa valya veekee ikumba mbuku. 16Nta yotoṛia nndu aire na wooṛo ya numba ya Iṛuva arie kiya. 17Kavalosha kavaia: A nkitisiṛe se sheeli: Numba yakwa ivaangwaa numba ya iterevia Iṛuva ya vandu va masanga woose? Neeni muka-kiaṛua mbanga ya fisoki. 18Vakohani vanini na vaaṛia va mitisine ili vandekiita, vakaraya mwaanya wa immamisa, fulya veemweṛee. Amu syamu yoose yaṛiikiswa mmiloshie yamwi. 19Na nkonu woose ili kwamiila kasomuka muṛiń.
20Kyasia ili veeiraa ngama, vakalolia nkuu ulya wamuuma kuuka mirariiń yayo. 21Petiro kakumbua kirero kilya kamwia: Llosha, lla te nkuu ulya kwaudenga wamuuma. 22Yesu kaaṛua kavaia: Kusureń Iṛuva! 23Nkue namuia: Ulya woose aiaa uro lu: Iṛuka kweeṛwa nraveń, kara atanunua nrimiń wamwi kakusura deń, sheeli ifo anrera faawukiaa, nkuro aloliaa. 24Kiimba kya ikyo namuia: Filya foose mufiterevaa na yoshoṛa, kusureń sheeli mwammaa ifiwaria, nafo mufiloliaa. 25Na kyeeri muselele mwiterevaa, kwakooya muwore kirero na nndu llilień, amu na Nde yanu wa iṛuvewu amulilie neeni mareko anu. 26Kake kwakooya ini kitaare mwalilia vandu, na Nde yanu wa iṛuvewu nta amuliliaa neeni mareko anu ndi.
27Vakafika lingi Yerusalemu. Neeli eeṛuaṛuaa numbeń ya Iṛuva, kashewa wakahoni vanini na vaaṛia va mitisiṛie na vasuṛi. 28Vakamwia: Nkwa finya ki kukee itana nayo ifi? Ana ni i akuniingie finya ii ya itana ifi? 29Yesu kavaia: Mmuuṛaa kirero kimwi, neeni mushaaṛue. Numa nań mmuiaa nkwa finya ki nkee itana nayo ifi. 30A ubatiso lua lwa Yohane lwauka iṛuvewu ana nkwa vandu? Shaaṛueń! 31Nawo vakakurera wo veni na veni vakanumbua: Kwakooya tanumbua: Lwauka iṛuvewu, anumbuaa: Naamu kiń kitaare mwamwirikia? 32Ana tikanumbua: Lwauka vanduń? — Kyasia vakaeṛea vandu. Fulya vandu woose valolia Yohane mmwauya kisuku dede. 33Vakaaṛua Yesu vakanumbua: Tiishi ndi. Yesu kavaia: Na akwaa nniń mmuiaa mfinya ki nkee itana nayo ifi ndi.
Currently Selected:
Mariko 11: RWK72
Highlight
Share
Copy

Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.