Mariko 10

1Kakwimboo-fo kafika miyanuń ya Yudaya na kulya kwa kulya ya Yoridane. Isyamu iingi vakakusandia lingi vakanshea. Kavalosha lingi sheeli eeshivie. 2Kyasia Vafarisayo vakanshea vakamwuṛa: A nkisumani nndu alakani na nka wamwi? Nawo veekee inreya. 3Nae kaaṛua kavaia: A Mose amuvavasa are? 4Nawo vakanumbua: Mose aniingia muumu nndu atisiṛe barua ya llakanu valakaniń. 5Yesu kavaia: Nkiimba kya uumu lwa mirima yanu kamutisiṛia ivavaso li. 6Kake kuuka io mabookioń a isanga Iṛuva avatana vakee nndumi na nka. 7Na kiimba kya ikyo nndu atiaa ndee na mae alungani na nka wamwi. 8Nawo ve vavili vavaa vvili umwi, nta vakivaa lingi vavili ndi, kake ni vvili umwi. 9Kyasia kilya Iṛuva ankilunga, manya nndu atalakanise. 10Neeli veekee ifo numba, vanalosho vamwi vakamwuṛa lingi mboni to. 11Kavaia: Nndu woose alakanaa na nka wamwi andeora ungi amaaika ana amaava numba. 12Na nka kalakana na mmi wamwi kandeorwa ni ungi amaaika ana amaava numba. 13Vakaendee Yesu vana, amu avaniinge mboṛa. Kake vaseṛo vamwi vakanaya valya veevariee. 14Na Yesu kamanya kavatuṛukia kavaia: Otoṛeń vana vashe kwakwa, manya mutaveemi! Amu valya vakee sha iwo umangi lwa Iṛuva llwawo. 15Namuia kya dede: Ulya atawario̱o̱ umangiń lwa Iṛuva awore mikae ya mwana munnya, afikaa-fo kutu ndi. 16Kavashukuṛa kavaekeṛia maako kavaniinga mboṛa.

17Kyasia ili asomuka wooṛo aware shia, nndu umwi kanshea eerishaa kawwoya ṅundeń kamwuṛa: Llosha nnuru, nkiki ntanaa, amu nrwaa diṅu ya muu utakisiaa? 18Yesu kamwia: Naamu ki kwashivaanga nnuru? Eefo nnuru kitaare ni umwi tubu, nae ni Iṛuva. 19Kwishi mavavaso alya: Kutawaa, kutaaike, kutaive, kutafingie nndu ungi kindo atatanie, kutalembe, kwindie ndeo na maa! 20Kamwia: Llosha, ifi foose nafiwara kuuka utiń lwakwa. 21Yesu kamulla koroo kankunda kamwia: Kwaanguyo̱ nkindo kimwi: Enda kwandekumba foose kuwore kwavie vakiva. Llyo kundevaa na masaa iṛuvewu. Kwammaa oṛeshoń kushisoṛe. 22Nae kalema kisangu kiimba kya kirero kyo. Kaenda anarie, fulya eeworee masaa meengi. 23Yesu kalla vanalosho vamwi kavaia: Lleń kasa kikee kyumu masimba aake umangiń lwa Iṛuva! 24Na vanalosho vamwi vakaṛiika kiimba kya firero fo famwi. Yesu kaaṛua lingi kavaia: Muṛe vana, lleń kasa kikee kyumu valya vakusurie masaa yaka umangiń lwa Iṛuva. 25Nkyaangu ngoye iitwa mbueń ya sindano kita isimba yaka umangiń lwa Iṛuva. 26Nawo vakaengeṛia iṛiika vakakurera wo veni na veni: Ni i amakiiń ikia? 27Yesu kavalla koroo kavaia: Kwa vandu kimakii iva ndi, kake kwa Iṛuva nkuro ndi. Amu kwa Iṛuva fivaa foose.

28Petiro kabooka imwia: Lla te mbee, ise tantia-wo foose tikakulatia iwe. 29Yesu kanumbua: Nkya dede namuia: Eefo nndu antia numba ana mwanamae ana mfwamae ana mae ana ndee ana vana ana nrema kiimba kyakwa na kiimba kya nrumi shisha 30kara atawaria kaiyana, kyeeri ki kya alli awarie numba na vamwanamae na vamfwamae na mae na vana na nrema na akwaa atuṛulwaa. Na ifo isangeń lyo lishaa awarie muu utakisiaa. 31Kake veengi vakee va mbele vavaa va numa. Na va numa vavaa va mbele.

32Ili vakee shień veendaa veerwaa na kulya Yerusalemu, na Yesu eevairiee mbele. Nawo vakaṛiika. Na valya vandensoṛa numa vakawarwa wweṛei. Kasaṅiṛia valya ikumi na vavili lingi kabooka ivaongoya filya fawara fivvie. 33Kanumbua: Lleń te tikee irwa na Yerusalemu. Na Mwana wa nndu arambikyo̱o̱ maakoń a vakohani vanini na vaaṛia va mitisiṛie, nawo vamwumisiaa awalwa, nawo vanrambikiaa maakoń a vayavaṛumu. 34Nawo vanteendaa na immishia manyiiri na inkaba na ngova na iwwaa. Na numa ya mikonu iraru aṛukaa. 35Llyo Yakobo na Yohane vakee vana va Sebedayo vanserikia vakamwia: Llosha, toore kindo tifurie ikutereva kutitanie. 36Nae kavaia: A kindo kyo mufurie mmutanie nkyo ki? 37Nawo vakamwia: Tikaarise rembo umwi uko lwafo usha na ungi uko lwafo umuso, ili kukee uniniń lwafo! 38Yesu kavaia: Nta mwishi kilya mukee itereva ndi. A naań mumakii inwa umbata lu niń nnwaa, ana ibatiswa ubatiso lu niń mbatiswaa? 39Nawo vakamwia: Timakii da. Yesu kavaia: Umbata lu niń nnwaa munwaa, na ubatiso lu niń mbatiswaa mubatiswaa. 40Kake ikaarisa nndu uko usha lwakwa ana umbuyo, ikyo nkindo kyakwa ndi, io ni andu a iwo vadeeṛie. 41Ili vaaroe valya vawo ikumi vandeita, vakatuṛukia Yakobo na Yohane. 42Yesu kavavaanga na io akai kavaia: Mwishi sheeli iwo valolikie sheeli vvashilia vandu va masanga, vakee ivashilia na finya. Na vanini vawo vakavakanga. 43Kake kari kanu nkuro kivaa ndi. Kake nndu afurie iva nnini kwanu kyawara ave mumuṛundia ini. 44Na nndu afurie iva wa mbele, kyawara ave iketi lya woose. 45Amu na akwaa mMwana wa nndu ansha asheṛundyo̱ ndi, ni isheṛunda na ishereka muu wamwi ave mutaua vandu veengi.

46Vakafika Yeriko. Neeli akaba Yeriko mungo ariani na vanalosho vamwi na isyamu iingi, llyo vakooya mwana ulya wa Timayo, yye Baritimayo, akee ndoń akee rembo mbaai ya shia eeombaa vandu findo. 47Kaita yye Yesu wa Nasareti. Karosa ununga lwamwi eereraa: Wui Yesu Mwana wa Davidi shililia! 48Na veengi vakankangaya, amu asie do. Kake ye kaengeṛia nnu ivaanga na ununga unini: Wui Mwana wa Davidi shililia! 49Yesu kasalala kanumbua: Vvaangeń! Vakavaanga nndu ulya mfu miso vakamwia: Uyo̱ mmuu! Kwimboo akee ikuvaanga. 50Kakumba miseto yamwi ya yeeṛia mbaai kakwimboo kalatia Yesu. 51Yesu kamwia: Kufurie nkutanie ki? Ndoń ulya ukamwia: Llosha wakwa, mfurie llolie. 52Yesu kamwia: Kwendie, ikusura lyafo lyankukiṛa. Lia eni kalolia kallatia ifo shień.

Currently Selected:

Mariko 10: RWK72

Highlight

Copy