Luka 24

1Kyasia nkonu wa mbele usoṛaa Sabato ili kindebooka itaṛaikana, vaka valya vasha alya mbangeń varie miri ilya ya kisaamu veemmaa isongosia. 2Vakakooya iwe lia lyambiṛingitio̱ kwaasha ya mbanga. 3Vakaaka nafo nta ilolia nnyiṅa wa Nndumi Yesu. 4Neeli veeṛiikaa kiimba kya mboni to, lia eni a va vandu vavili vaṛee miseto iikalakalaa. 5Nawo vakawarwa wweṛei vakainamisia fisangu si. Nawo vakavaia: Naamu ki mukee iṛuya uu eefo na muu kwa vafu? 6Akiyo ia ndi, anduka. Kumbueń kilya anderera neeni lia akee Galilaya 7eenumbuaa: Kyawara Mwana wa nndu arambikio̱ maakoń a vandu varekwa na ikabio̱ nsalabeń na iṛuka nkonu wa kararu. 8Nawo vakakumbua firero filya famwi. 9Vakauya vauka kulya mbangeń. Vakandeongoya valya ikumi na umwi na vengi woose mboni tilya toose. 10Nawo ni Maria wa kulya Magidala na Yohana na Maria akee mae wa Yakobo na valya vengi veerianii nawo, wwo vandeia varumi valya mboni tilya. 11Firero fo fikavavia sheeli mfa dua ana nta vavairikia ndi. 12Nae Petiro kakwimboo kaenda eerishaa kumande kulya mbangeń. Kakwinika kalla kulya kari kalolia firami filja fiimwiṛiniee fikee kyaanya kyayo. Kauya na kwamwi aṛiikisio̱ ni ifo fatanika.

13Kyasia nkonu ulya to muni veefo vavili va vandu va Yesu veekee yenda muṛiń umwi. Nato kuuka kulya Yerusalemu kwendaa weendo lwa saa ivili kufike-fo. Na irina lyayo uvaangwaa Emau. 14Nawo veekee irera usaṛe lwa mboni tilya tindeva toose. 15Kyasia ili veereraa usaṛe kuri na yuṛana, Uyo Yesu avaserikia kaenda andu emwi nawo. 16Kake miso awo akawarwa ni irra nta vatammanye yye. 17Nae ka-vauṛa: Ni usaṛe lungalu mukee irera kunu shień? Vakasalala na fisangu fawo foore unaari. 18Na umwi wawo, eevaangwaa Kiliopa, kaaṛua kamwia: A iwe ku muni kukee mwini kunu Yerusalemu kuteeshi filya findetanika-fo mikonu ii? 19Kavauṛa: Mmboni ta kiki? Vakamwia: Nta Yesu wa Nasareti, eekee nndu mwauya fisuku, eekee na mwaṛia wa findo finini fa itana na fa irera mbele ya Iṛuva na mbele ya vandu woose. 20Na vakohani veru vanini andu emwi na vakuu veru vakarambikia awalwa vakankabia nsalabeń. 21Neese tiikusuriee sheeli uu yye akiṛaa vandu va Isiraeli. Na kuuka ifi fivva, nkonu wa nnu nto wa kararu. 22Na lingi veefo vaka va kweru kiindi vantikyangisa. Valava ngama kio kulya mbangeń 23nta ikooya-fo nnyiṅa wamwi. Vakasha vakanumbua, vallolia vamalaika va Iṛuva vandekworusa na baa vakanumbua vai: Eefo na muu. 24Na kiindi kya vandu veru vakaenda indella alya mbangeń. Vakakooya nkuro da sheeli vaka valya vandenumbua, kake ye muni vallolia-fo ndi. 25Llyo Yesu avaia: A baa vandu variṅani, nki ili ngoo tanu tallemwa ikusurana na filya foose feemaauywaa vvaauya fisuku? 26Mwishi se sheeli kyawara Kristo aliswa ukiva lu na yuya unini lwamwi? 27Kabooka ivamanyisa mboni ta kuuka Mose na ta vaauya vengi na ta filya foose feentisiṛwaa kyamwi. 28Kyasia vakaserikia kufui na muṛi ulya veekee yenda. Nae kakwaṛua sheeli afurie iira na mbele. 29Vakantereva veemwiaa: Lalia kweru Mbee, fulya kwamiila na saa ikee ikaliakalia. Kaaka numba kakaa nawo. 30Kyasia ili eekee rembo andu emwi nawo valye shoonga, kaimboo nkate kaana Iṛuva kafukyafukya kavaavia. 31Llyo miso awo akaambua kalabu vakammanya yye. Lia eni kaveṛuka kari kawo vatakillolie. 32Vakakurera wo veni na veni: A lia ngoo teru tikee imwanaana lia eekee irera neese ifo shień na itimanyisa mboni ta mitisine, nta immanya ye. 33Vakakwimboo kyeeri kilya kyeni vakauya na kulya Yerusalemu vakakooya valya ikumi na umwi vakusandie andu emwi na valya veekee vaaroe vawo. 34Nawo vakaongoya valya vavili veenumbuaa: Nkya dede Nndumi anduka kalolio̱ nSimon. 35Nawo vakavaongoya mboni tilya ta kulya shień na sheeli andemanyikwa wwo eefukyaa nkate. 36Ili vaseṛo va Yesu veekee irera mboni tilya ta iṛuka lya Yesu, lia eni Yesu muni kasalala kari kawo kavaia: Kaań-fo na unambwe! 37Nawo vakataṛaaka vakaeṛea, veeshi valolia kiṛishwe kya nndu. 38Kavaia: Nki ili mwataṛaaka na inunua nrwe? 39Shilleń maako akwa na marende akwa, nniń shi muni uu. Shibaaneń mushille, amu kiṛishwe kiwore nyama ana mafua sheeli mushilolie niń noore ndi. 40Ili eereraa kuri, kavaorusa maako na marende. 41Nawo veemakii iirikia kiimba kya ifura na iṛiika ndi. Llyo avauṛa: Muwore shoonga ia? Vakamfingia ngambuṛa ya ikunga shookye na kauki. 43Kawaria kalya mbele yawo 44Numa kavaia: Iti nto mboni tilya namwongoya lia nkee neeni, sheeli foose fifikaa fikee fitisiṛe fitabuń fa Mose na fa vaauya fisuku na fa fiimbo fa Iṛuva. 45Kavaniinga uṛango vamanye mitisine ilya. 46Kavaia: Nkuri kikee kitisiṛe sheeli Kristo kyawara atuṛulwa na iṛuka kwa vafu nkonu wa kararu. 47Nawo vandu valya vateeshi Iṛuva vakwanisio̱ mboni ya ikurra na ya itio̱ mareko veekuvavaa nae, nakyo kibookaa kunu Yerusalemu. 48Neeni mukee varambua va filya foose findeva. 49Neeni manyiń niń mmurikiaa kilya kinderekio̱ nNde yakwa kimwolokie. Kake ini kaań muṛiń uu wa Yerusalemu kumande muniingwaa finya yuka ule.

50Kyasia kavasomuta kulya muṛiń kavafita kumande kufui na Betania. Kaimboo maako amwi kavaniinga mboṛa. 51Kikava ili eevaniingaa mboṛa, kalakaniswa nawo karoswa iṛuvewu. 52Nawo vakawa si na fiboota. Numa vakauya na kulya Yerusalemu vawore ifura iingi. 53Vakava vasinda ifo numba ya Iṛuva kyeeri kyoose veeitikisaa Iṛuva.

Currently Selected:

Luka 24: RWK72

Highlight

Copy