Yohane 1

1Ilyo mbooko Ilyo Kirero kiifoo. Na Kirero kiikee na Iṛuva. Na Kirero kiikee Iṛuva. 2Nakyo kiikee na Iṛuva ilyo mbooko. 3Findo foose fiifo findetanwa nKirero kyo. Na kitaare kiifo nta kindo kimwi kindetanwa kya ifo fikee fitane ndi. 4Kari kayo mfo muu wikaii. Na muu to ukava langa ya ivaiya vandu. 5Na langa yo ikee ivaa ifo llemiń, na llema nta iiwaria.

6Eeifoo nndu anderumwa ni Iṛuva, na irina lyamwi ni Yohane. 7Ito ashe ave nrambua wa irambua langa yo, amu vandu woose vakooye ikusura veekuwaraa nae. 8Ito eekee langa ilya ye muni ndi, kake ashe amu arambue langa yo. 9Langa ya dede ilya imulikiaa nndu woose yo iikee isha kunu isangeń. 10Iikee isangeń na isanga lindetanwa yye na isanga lyo nta immanya. 11Ashe kwamwi na iwo va kwamwi vandewwaria ndi. 12Kake valya woose vandewwaria kavaniinga imakii lya iva vana va Iṛuva, wwo valya vakusurani na irina lyamwi 13Nawo wwo vandeiriwa iteefo milangie ya usao ana iteefo mire ya vvili ana iteefo mifurie ya nndu nndumi, kake vairiwa kwa mikundie ya Iṛuva. 14Na Kirero kikaaṛuka vvili wa nndu kakaa kweru. Neese tikalolia unini lwamwi, nalo ni unini sha lwa Mwana wa ngitani aukie kwa Ndee, eeshule uwoo na udede.

15Yohane andenrambua na ununga unini eenumbuaa: Uu yye niinnumbuaa: Yye ashaa numa yakwa, amu mmumbele wakwa. 16Neeli awore mboṛa, ise ti woose tikava vandu va yavio̱ fa mboṛa yamwi, nafo mfa uwoo na uwoo. 17Amu mavavaso andeniinga mMose, kake uwoo lwa Iṛuva na udede lwamwi fikanndwa ni Yesu Kristo. 18Eefo nta nndu allolia Iṛuva ndi. Mwana to wa Iṛuva ngitani ito akee ṅundeń ya Ndee yye andetoongoya kyoose.

19Na mirambuye ya Yohane yyo ii lia Vayuda va Yerusalemu vanrumia vakohani na va kwa Levi, amu vamwuṛe: Iwe ni iwe i? 20Kavaaṛua kisumani iteefo wongo, karera baa: Niń nkee Kristo ndi. 21Vakamwuṛa: Ni iwe iń? Ni iwe Elia? Kanumbua: Nniń ye ndi. Vakamwuṛa: Kukee mwauya fisuku ulya? Kanumbua: Wode. 22Vakamwia: Kyasia ni iwe iń, amu tindeongoya valya vatiruma kwafo. A iwe ku muni kukuvaangaań are? 23Kanumbua: Niń nkee ununga lwa nndu akee ivaanga bateń: Tobiṛień shia ya Nndumi, sheeli mwauya fisuku ulya Yesaya arera. 24Na vandu valya varumwa vVafarisayo vakaengeṛia imwuṛa vakamwia: 25Nki ili kukee ibatisań vandu, kwakooya kutakee Kristo ana Elia ana mwauya fisuku ulya? 26Yohane kavaaṛua kavaia: Kyakwa niń ni ibatisa na mura. Kake kari kanu aselele ulya kitaaṛe ini mumwishi. 27Ito yye ashaa numa yakwa, nań nkaṛiaa nta inserikia mmwute faaru famwi ndi. 28Na kundo mboni ti tavia nkulya Betania kwa kulya ya Yoridane, kulya Yohane eebatisiaa vandu.

29Neeli lya ndesi kalolia Yesu eeshaa na kwamwi kanumbua: A li yaanri lya Iṛuva likurikaa mareko a isanga! 30Uu yye nnderera mboni tamwi sheeli: Nndu ashaa numa yakwa, nae eekee mbele yakwa, amu eekee mumbele wakwa. 31Nań nta niimwishii ndi. Kake ye amu amanyike na baa ifo kwa vandu va Isiraeli, nkyo nndeshea mbatise na mura. 32Nae Yohane kanrambua eenumbuaa: Nallolia Mumuyo wa Iṛuva eemwolokiaa auka iṛuvewu akee sha mbuku kankaya. 33Nań nta niimwishii ndi. Kake ito andeshiruma mbatise na mura yye andeshiia: Ito kwallolia Mumuyo wa Iṛuva eemwolokiaa na inkaya, uu yye abatisaa na Mumuyo Nsongori. 34Nań nammulolia, lingi nammurambua sheeli uu mMwana wa Iṛuva.

35Ili lya ndesi Yohane kasalala-wo lingi andu emwi na vanalosho vamwi vavili. 36Ili andelolia Yesu eeiraa, kanumbua: A li yaanri lya Iṛuva! 37Na vanalosho valya vavili ili vandeita eereraa kuro, va-kasoṛa Yesu. 38Yesu kainduka kavalolia veensoṛaa kavaia: Nkiki mukee iṛuya? Vakamwia: Rabi, — misendie yayo nkimwi na llosha — a andu kwaeveṛia uvari nkwi? 39Kavaia: Oṛeshoń mundella! Vakasha vakalla alya aeveṛia uvari. Vakasinda kwamwi nkonu ulya biti. Kiikee kyeeri kya saa ikumi ta nsanyiń. 40Umwi wa valya vavili vandensoṛa kiimba kya kirero kilya kya Yohane eekee Anderea mwanawo wa Simon Petiro. 41Na Anderea kabooka ilolia lya mbele mwanamae wamwi Simon kamwia: Tallolia Mesia — misendie yayo nkimwi na Kristo. 42Kanrwaya Yesu. Yesu kamulla kamwia: Ni iwe Simon mwana wa Yohane, kuvaangwaa irina lyafo Kefa — misendie yayo nkimwi na iwe, na kigiriki Petiro.

43Neeli lya ndesi Yesu afura ikwimboo aende kulya Galilaya kakwania na Filipo. Yesu kamwia: Shilatia. 44Na Filipo eekee nndu wa kulya Betisaida, nato mmuṛi wa Anderea na Petiro. 45Na Filipo kalolia Natanaeli kamwia: Ulya asendwa mMose mavavasoń na akwaa vvaauya fisuku vakansenda tammaa illolia, yye Yesu wa kulya Nasareti, mmwana wa Yosefu. 46Natanaeli kamwia: Oo kulya Nasareti kimakii yuka-fo kindo kinuru? Filipo kamwia: Oṛeshoń kundella! 47Ili Yesu andelolia Natanaeli eeshaa na kwamwi kamwia: A uu Mwisiraeli wa dede ataare ukavili kari kamwi. 48Natanaeli kamwia: A ba nkwi kwashimanya? Yesu kamwaṛua kamwia: Lia kukee alya sindeń ya nri ulya wa nkuu kitaare Filipo ankuvaanga, neemmaa ikulolia. 49Natanaeli kamwaṛua: Llosha iwe ni iwe Mwana wa Iṛuva, ni iwe kukee mangi ya Isiraeli. 50Yesu kamwaṛua kamwia: Kukee ishikusura, fulya nakuia neenkuloliaa kukee sindeń ya nri ulya wa nkuu. Kuloliaa finini kita ifi. 51Kanumbua: Namuia kya dede: Kuuka alli muloliaa iṛuvewu liruukie na vamalaika va Iṛuva veesaamaa na yolokia Mwana wa nndu.

Currently Selected:

Yohane 1: RWK72

Highlight

Copy