Luka 14

1Kikava ili Yesu andeaka numba ya nndu umwi wa nrwe wa Vafarisayo nkonu wa Sabato ale-fo shoonga, nawo vakamwata ndaṛi. 2Na io eeyoo nndu alole saka ya ifumbisa meengo. 3Yesu kauṛa vaaria valya va mavavaso na Vafarisayo: A naań wifo muumu wa ikiṛa nndu nkonu wa Sabato ana wode? Vakasia do. Nae kambaana kankiṛa kanniinga muumu aende. 5Kavaia: A kunu kwanu eefo nndu awore numbe yamwi yamooloka iriniń lya mura ana nshungu wamwi, kitaare afiutaa-fo ilyo yeni na akwaa ni nkonu wa Sabato? 6Nawo nta imakii yaṛua firero fo. 7Kakabia valya veekee vavaange sumu, ili andelolia vakusauya fifumbi fa mbele, kavaia: 8Kwavaangwa waliń ni nndu, manya kutakaa rembo kifumbiń kya mbele, kitakooye eefo nndu awore tikisi kita iwe kari ka iwo vavaange. 9Na ulya andemuvaanga ini nae akuie: Otoṛia uu! Nawe Uyo kundekaa kiremboń kya numa kwisukaa. 10Kake kwavaangwa enda kundekaa rembo kulya numa, amu ili ulya akuvaangie ashaa akuie: Ndoo yakwa, ira na kunu mbele! Llyo kwitikiswaa vvalya woose vakee rembo andu emwi nawe shoongeń. 11Amu ulya woose akuṅinisaa ye muni anyiiswaa, na ulya akunyiisaa ye muni aṅiniswaa.

12Kaia na ulya eevvaangiee: Kwansongosia shoonga ya nsanyiń ana ya ukwawuń, manya kutavaange ndoo tafo ana vanavamaa ana vafwari vafo ana vandu va yyanu wafo vakee masimba, nawo vakuvaange ikamba lyawo kive nkileko vakutaa. 13Kake kwansongosia imutu lya ivaangia vandu, vaanga vakiva na fisaya na vatoṛokombie meengo na vafu miso. 14Nawe kuvaa wa ngoma, fulya vatawore kya ikutaa. Amu kutawaa nkonu wa iṛuka lya vafu wo vasumani.

15Kyasia umwi wa vandu valya, veekee shoongeń andu emwi na Yesu, kaaranya firero famwi kamwia: Wwa ngoma ulya alyaa shoonga ifo umangiń lwa Iṛuva. 16Na Yesu kamwia: Eeifoo nndu andesongosia vandu imutu inini kavaanga vandu veengi. 17Na kyeeri kya imutu karuma nseṛo wamwi, andeia valya veekee vaaṛie nrumi: Oṛeshoń, foose fammaa ideeṛio̱. 18Nawo lia eni vakabooka ikuuta nndu woose na kima kyamwi. Ulya wa mbele kamwia: Namuuṛa nrema, kyashiwara neende nndeilla. Nakutereva kutashifikio̱ nndewu. 19Ulya ungi kanumbua: Namuuṛa nguleta ikumi, nkee yenda alli nndeteelelia. Nakutereva kutashifikio̱ nndewu. 20Na ulya wa kararu kanumbua: Namoora nka, nkyo kindo kyashiima niishaa. 21Nseṛo ulya kauya kyeń kaongoya nndumi wamwi mboni tilya. Nndumi ulya kaliwa nngoo kaia nseṛo wamwi: Saṛika ree kufike kulya mikoń na shień ta uruka, kundennde vakiva na fisaya na ngoshini na vandu midoń vashe na kunu. 22Nseṛo ulya kataana kuro kasha kaia nndumi wamwi: Filya kundevavasa fantanika, kake akiseere-wo andu. 23Na nndumi kaia nseṛo ulya: Enda na kulya shień na kulya susuma ya ngyuvarile, kuvaitike vashe vaake, amu numba yakwa iishue. 24Nań namuia: Nta umwi wa vandu valya veekee vaaṛie nrumi akombaa imutu lyakwa ndi.

25Isyamu iingi lya vandu likaenda liriani nae. Nae kavaaṛukia kavaia: 26Kwakooya nndu ashaa na kwakwa kara atasua nde na mae na nka wamwi na vana vamwi na vamwanamae na vamfwamae na isua muu wamwi ye muni, ito amakii iva mwanalosho wakwa ndi. 27Na ulya atakurikaa nsalaba wamwi ye muni na ishilatia numa, ye amakii iva mwanalosho wakwa ndi. 28A kunu kwanu eefo nndu akundaa itana numba kara atakaa mbele rembo ataale shasho, amanye akwaa imaa numba? 29Naamu atakooye ammaa mfulo, nae alemwa imarisia. Na vandu valoliaa vansekaa na imweetia 30veenumbuaa: Lla te nndu uu andebooka itana numba nta imakii iima a. 31A naań iifo mangi ikwimboo indekabana na ingi, ikara itawara mbele kikwena imanye, akwaa imakii indekabana na ilya irie vaseṛo fiku makumi avili, nae muni kakooya arie vaseṛo fiku ikumi tubu? 32Kwakooya kitavaa, arikiaa ulya ungi mumbele ili akikee kwaasha, andentereva luve unambwe. 33Mfo kuroń neeni da: Nndu woose atalakanaa na ifo afiwore, amakii iva mwanalosho wakwa ndi. 34Munyu nkindo kisha. Kake munyu ukavva kyoongio, nkiki kyushiisaań ulore? 35Ukivaa nta lingi na akwaa warawa nremiń waṛulwa mbofa ndi. Kake ukumbwaa ifo wooṛo. Ulya awore marwi a yaranya aaranye!

Currently Selected:

Luka 14: RWK72

Highlight

Copy