Luka 13

1Kyeeri kyo kyeni veeifoo vandu vandemwongoya mboni ta Vagalilaya valya, Pilato andeirita ngyusao tawo katisanda na ngyusao ta numbe tawo ta irasia. 2Nae kaaṛua kavaia: Mukusaṛie Vagalilaya wo veekee varekwa kita Vagalilaya vengi woose, fulya vandeliswa ukiva kuro? 3Namuia: Nkuro ndi, kake kwakooya mutailashikaa mirimiń, nkuro da mundemamiaa mu woose. 4Ana valya ikumi na nyaanyi vandewoywa ni nnara kulya Siloa ukavawaa, naare mukusaṛie wo veekee varekwa kita vandu woose kunu Yerusalemu? 5Namuia: Nkuro ndi! Kwakooya mutailashikaa nrimiń, nkuro da mundemamiaa mu woose. 6Karera sumu ii kanumbua: Nndu eeworee nri wa nkuu uveekie nndeń wamwi. Kasha iṛuya nunda nta ikooya. 7Kaia nremia nnda: Lla te mwaka uu wwa kararu niishaa niiṛuyaa nunda nriń uu nta ilolia. 8Kyasia uminye! Nkiki ukiveesiaań si? 9Nae kamwaṛua kamwia: Nndumi, utie mwaka uu da mbee, nuuremie na irwaa-fo kiroro! Eeba uvikaa nunda. Kwakooya utavikaa kusheń yuminya.

10Kyasia Yesu eekee ilosha vandu numba ya iterevia nkonu wa Sabato. 11Na ifo eeifoo nka eewwarwaa nsaka kyeeri kya myaka ikumi na nyaanyi. Nae eetoṛokombiee, nta eemakii ikuseṛeesa kutu ndi. 12Ili Yesu andellolia, kawaanga kwamwi kamwia: Boṛomuka saka yafo, yeyo! 13Kamwekeṛia maako na lia eni nka ulya kaseṛeeka kaṅinisa Iṛuva. 14Na nsuṛi wa numba ilya ya iterevia katuṛuka, ili Yesu akiṛa nndu nkonu wa Sabato. Kaia vandu valya veeyoo: Iifo mikonu irindaru nndu atanaa mashoṛa nayo ndi? Kyasia mikonu ilya mushe mukiṛwa, manya mutakishe nkonu wa Sabato ndi! 15Nndumi kamwaṛua kamwia: Ini vamakavili, kunu kwanu nndu woose aawuaa numbe yamwi ana nshungu wamwi numba na akwaa ni nkonu wa Sabato na inisia mureń ndi? 16Na nka ito, akee mfu wa Abraamu na Satana kamfinga myaka ikumi na nyaanyi, kyawwara se aboṛomulwa kifingioń kyamwi na akwaa ni nkonu wa Sabato? 17Ili anderera kuro, fituva famwi foose fikasuka. Na vandu woose vakafura kiimba kya mitanie yamwi yoose andetana minuru.

18Numa nae kanumbua: Umangi lwa Iṛuva luvakani na kiki? Nalo lluvakanisaa na kiki? 19Luvakani na mbeu ya karadali indekurikwa ni nndu kayeeṛa nremiń yamwi. Nayo ikamia ikava nri. Na ndee ta ringewu tikakaa maṛambeń ayo. — 20Kanumbua lingi: Nkiki vvakanisaa nakyo umangi lwa Iṛuva? 21Luvakani na kidooka nka andeimboo kakisanda na uru faasho firaru kikadookisa foose.

22Yesu kaira miingoń na miṛiń ya vandu eeloshaa-fo. Kawara shia afike Yerusalemu. 23Na nndu kakwania nae kamwuṛa: A le Nndumi, valya vakaa vakiṛwa vafike kwa Iṛuva vvaangu da naań? Nae kamwia: 24Kabanień mwaango ulya nsuse na utomari mwake! Fulya namuia: Vveengi valangaa yaka nafo vatamakii. 25Mukantevesa muni numba kankwimboo kammaa iraya numba, Uyo mubookaa isalala wooṛo na ikabakaba yoondi na inumbua: Wui Mbee, tirue numba! Nae amuaṛuaa: Mmwishi ini kundo muukie nafo ndi. 26Llyo mubookaa imwia: Ako, tale shoonga se na inwa andu emwi nawe? A miṛitiń yeru mfo kwitiloshiaa se? 27Llyo anumbuaa: Namuia: Mmwishi ini kundo muukie nafo ndi. Shuukeń ini mwoose, amu mukee varavi! 28Na ifo kivaa kiiyo na ifina kitaku, ili muloliaa Abraamu na Isaki na Yakobo na vaauya fisuku woose vakee ifo umangiń lwa Iṛuva, neeni mu veni mukuloliaa sheeli mukee vaumbutie wooṛo. 29Na vandu vengi vashaa vauka na taari ya kise-ngeṛo na ya mbeleń na ya nturu na ya ṅṅalo na ilya shoonga ifo umangiń lwa Iṛuva. 30Neeni manyiń sheeli veefo vandu va numa vakaa vandeva va mbele. Na lingi veefo va mbele vakaa vandeva va numa.

31Kyeeri kilya kyeni kashewa vVafarisayo kiindi. Vakamwia: Kwimboo kwauka ia kwende kundo kungi, amu Herode arie ikuwaa. 32Nae kavaia: Endeń mukandeia ibaaṛwe lyo: Nnu na ndesi nkee yumbuta mimuyo mikasha na ikiṛa valole, na nkonu wa kararu mmarisie. 33Kake kyashiwara llunge kyaaṛo kyakwa nnu na ndesi na nrondo, amu kivaa mwauya fisuku awaywaa andu engi kitaare nkulya Yerusalemu ndi. 34Iwe Yerusalemu, iwe Yerusalemu, kuwaa vaauya fisuku na valya varumwa kwafo kwavaeeṛa mawe. Nkeenga namfura isaṅiṛia vana vafo kasa nguku isaṅiṛiaa mawore ikaasikia na maaro ayo! Neeni nta ikunda. 35Lleń te, numba yanu irewaa ikee irama! Nań namuia: Mukishiloliaa kutu ndi, kumande kifikaa kyeeri munumbuaa: Eetikiswa ulya asha na irina lya Nndumi!

Currently Selected:

Luka 13: RWK72

Highlight

Copy