Yohane 2

1Neeli lya nrondo veeifoo vandu vaalikio̱ kulya muṛiń wa Kana ukee muungoń ulya wa Galilaya. Na mae wa Yesu nae eeifoo. 2Na akwaa ni Yesu kavaangwa-fo andu emwi na vaseṛo vamwi. 3Kyasia mfinyo ukafikya. Mae wa Yesu kamwia: Vakiwore mfinyo ndi. 4Llyo Yesu amwia: Kyakutiṅa-fo ki se iwe? Kyeeri kyakwa kya yelekia kyamfika ndi. 5Na mae wamwi kandeṛaṛika vaṛundi valya veekee iṛunda eevaiaa: Kilya kyoose amuvavasaa kitaniń na kikava ki! 6Na io tiyo nungu isasaru ta mawe tisimbiti-wo ta llimu wa Vayuda wa ikusangya. Na nungu imwi iwore mifukyo ivili ana iraru. 7Lia eni Yesu kaia vaṛundi valya: Ishuṛeń nungu ti mura! Nawo vakatiishuṛa bele. 8Kavaia: Alli raań kinnya murwaye mwika ulya shoonga! Nawo vakanrwaya. 9Neeli mwika shoonga ulya aria mura ulya waaṛulwa mfinyo na imungyamungya eeishii kundo wautwa nafo ndi. Kake valya veeshi waṛundi valya varaa mura to tubu. Llyo mwika shoonga avaanga nseṛo ulya aalika kamwia: 10Nndu woose aniingaa mbele vandu mfinyo nnuru. Vakammaa iwuura llyo avaniingaa ulya nkashankasha. Kake iwe kwamfisa mfinyo nnuru kumande alli. 11Nkyo kindo kya mbooko Yesu atana kya maṛiikiso kikatanikia kulya muṛiń wa Kana ukee muungoń ulya wa Galilaya. Kamanyisa nakyo unini lwamwi. Na vaseṛo vamwi vakautia-wo inkusura. 12Numa ya ifo kainama kumande Kaperinaumu ye na mae wamwi na vanavamae na vanalosho vamwi. Vakakaa-fo mikonu myaangu.

13Na kisuku kya Pasaka ya Vayuda kiikee kufui, na Yesu karwa Yerusalemu. 14Kakooya-fo vandu veekaa rembo numba ya Iṛuva veekumbiaa-fo numbe na mburu na mbuku na vandu veeilashaa fesa. 15Kaoka uruu lwa ukova kaumbuta vandu valya woose numba ya Iṛuva andu emwi na mburu na numbe kairita fesa ta veelasha valya kafuluta na mesa tawo. 16Kaia valya veekee ikumba mbuku: Imbooń findo fi ia ree! Manya mutaaṛue numba ya Vaava wakwa ive numba ya ikabia mbusha! 17Llyo vanalosho vamwi vakumbua kirero kilya kikee kitisiṛe: ”Utomari lwa ishiisa numba yafo lukee ishivinga.“ 18Kyasia Vayuda vakamwaṛua vakamwia: A mmyorusie ingai kutoorusaa, ili kwakaṛia itana kuro? 19Yesu kaaṛua kavaia: Sakyeń numba ii ya Iṛuva, nań niiseṛeese kari ka mikonu iraru. 20Kyasia Vayuda vakanumbua: Numba ii ya Iṛuva yatanwa andu a myaka makumi aani na irindaru, nawe kwiseṛeese andu a mikonu iraru? 21Kake ye arera kya vvili wamwi ukee numba ya Iṛuva. 22Kyasia ili andeṛuka kwa vafu, vanalosho vamwi vakakumbua kilya anderera. Vakakusurana na mitisine ilya na kirero kilya Yesu anderera.

23Kyasia ili eekee kulya Yerusalemu kisukuń kya Pasaka, vandu veengi vakabooka ikusurana na irina lyamwi, fulya vandelolia myorusie ilya andeitana. 24Kake ye Yesu andekusurana nawo ndi, fulya ye aveeshi woose. 25Nae kyeemmuwaraa asunundio̱ ni nndu mboni ta nndu ungi ndi. Amu ye muni eeshi makusaṛo akee nrimiń wa nndu.

Currently Selected:

Yohane 2: RWK72

Highlight

Copy