Yohane 13

1Kyasia ili kitaare kisuku kya Pasaka kyeemfikaa, Yesu eemmanyaa sheeli kyeeri kyamwi kyamfika akwimboo kunu isangeń aende kwa Nde. Nae sheeli andekunda iva vamwi kunu isangeń, nkuro andevakunda kumande ifurumia. 2Neeli veelyaa shoonga ya ukwawuń, Satana eemmaa yatia Yuda Isikariote mwana wa Simon nrima wa indiinga. 3Nae Yesu muni eemmanyaa sheeli Nde ammurambikia findo foose maakoń amwi na sheeli andeuka kwa Iṛuva, nae auyaa kwa Iṛuva. 4Kakwimboo shoongeń kakuuta nseto wamwi wa yeeṛia kaimboo kirami kakufingia kisiń. 5Numa kaletia usokwa mwashoń kabooka isangya vanalosho vamwi marende na ivaangua na kirami kilya akufingie nakyo. 6Neeli andefikia Simon Petiro, ye kamwia: Nndumi, iwe kushisangye marende niń? 7Yesu kaaṛua kamwia: Kilya niń nkee itana kukimanyaa alli ndi, kake kukimanyaa numa. 8Petiro kamwia: Iwe kushisangyaa marende kutu ndi. Yesu kamwia: Kwakooya kitaare nkusangyaa marende, kuwore ilungana nań ndi. 9Simon Petiro kamwia: Nndumi, mmarende akwa wo meni tubu ndi, na akwaa mmaako na nrwe deń. 10Yesu kamwia: Ulya ammaa ikusangya akitinye lingi isangywa ndi kita marende tubu, amu vvili wamwi mmwelwa woose. Neeni mwamiiliswa, kake mmu woose ndi. 11Amu eeishii ulya andiingaa. Nkyo kiteveto kanumbua: Nta mmu woose mukee vailise ndi.

12Kyasia ili ammaa ivasangya marende, kaimboo nseto wamwi. Kakaa-fo lingi rembo kavaia: A naań mwamaaṛukio̱ ni ikyo namutania? 13Ini mushivaangaa llosha na Nndumi. Neeni mwarera kinuru, amu nniń ye. 14Kyasia kwakooya niń namusangya marende nkee Nndumi wanu na llosha, kyawara mukusangye marende neeni mu veni na mu veni. 15Fulya nammuniinga myorusie, amu sheeli niń nammutania, neeni mukutanie kuro. 16Nkue nkue namuia: Iketi ni inini kita nndumi wamwi ndi, ana ulya anderumwa ni nnini kita ulya andenruma ndi. 17Mukammanya ifi muvaa va ngoma mukatana kuro. 18Nta narera kuro kyanu mu woose ndi. Niń niishi valya navasaua. Kake kyawara mitisine ilya yawukie: ”Ulya aliye nkate wakwa ye anshiimboyo sendu ashikabe inanga.“ 19Kake ifi natembeṛie imuia alli kitaare kyawa, amu ili kindevaa naamu mukusure sheeli nniń ye. 20Nkue nkue namuia: Ulya woose awariaa nndu nammuruma anshiwaria niń. Na ulya ashiwaria niń awwaria ulya andeshiruma.

21Neeli Yesu ammaa irera kuro, kataṛaaka nrimiń karambua kanumbua: Nkue nkue namuia: Umwi wanu ashiṛiingaa. 22Vanalosho vakakullalla vakakwiria nunua ni i akee isendwa. 23Eeifoo umwi wa vanalosho vamwi eefwitanii na Yesu, nae yye ulya Yesu amwita mbele. 24Kyasia Simon Petiro kansinia kamwia: Mwuṛe ni i ito akee insenda? 25Numa ulya eefwitanii na Yesu kamwuṛa: Nndumi, ni iń? 26Yesu kaaṛua: Ni ulya ninkabiaa kibeṛeshu kyaashoń ninniingie. Kakaba kibeṛeshu kilya kyaashoń. Kakiimboo kaniingia Yuda Isikariote ulya wa Simon. 27Nae ili andemaa ilya kibeṛeshu kilya, llyo Satana andemwaka. Kyasia Yesu kamwia: Kilya kurie itana tana ree! 28Ana nta nndu umwi wa valya veekee shoongeń andemanya kiteveto kamwia kuro. 29Amu kiindi vakusaṛa ili Yuda arie mboloko ilya ya fesa, eeba Yesu amwia: Enda yuṛa findo fitinye fa kisuku, ana aniingie vakiva kindo. 30Kyasia ili andemaa ilya kibeṛeshu kilya, lia eni kasomuka. Nakyo kiikee kyeeri kya kio.

31Kyasia ili ansomuka na wooṛo, Yesu kanumbua: Alli Mwana wa nndu aṅṅiniswa na Iṛuva kaṅiniswa kiimba kyamwi. 32Kwakooya Iṛuva amiitikiswa kiimba kyamwi na Iṛuva amwitikisaa akee nae muni. Lingi amwitikisaa alli kuri. 33Ini vana vakwa, kiseere kyeeri kyaangu nkee andu emwi neeni. Neeni mushiṛuyaa. Na sha lia niia Vayuda: Alya neendaa niń ini mumakii isha-wo ndi, nkuro na alli nkee imuia. 34Ni ivavaso iiya nkee imuniingia, Ilyo ili: Kundaniń sheeli nndemukunda ini, neeni kundaniń kuro. 35Kindo vandu woose vamumanyaa nakyo mwawa vanalosho vakwa ni ikundana, kwakooya mwakundana ini mu veni na mu veni.

36Simon Petiro kamwuṛa: Nkwi kwendaa, Nndumi? Yesu kamwaṛua: Kulya niń neendaa kumakii ishisoṛa alli ndi, kake kushisoṛaa-fo numa. 37Petiro kamwia: Nndumi, naamu ki ili ntamakii ikusoṛa alli? Niń nrekaa-wo muu wakwa kiimba kyafo. 38Yesu kamwaṛua: Iwe kurekaa muu wafo kiimba kyakwa? Nkue nkue nakuia: Nguku ya shawu kitaare yamiikoro kushikanaa kararu.

Currently Selected:

Yohane 13: RWK72

Highlight

Copy