Yohane 12

1Ili ikiseere mikonu irindaru kisuku kya Pasaka kifike, Yesu kafika muṛiń wa Betania kulya Lasaro eerulee ulya Yesu anduta kwa vafu. 2Vakamwikia shoonga na Marita kavaavia. Na Lasaro eekee umwi wa valya valye shoonga andu emwi na Yesu. 3Na Maria kaimboo wembe luwore mafura a mikae minuru kutu, awore uuru unini. Kaamba marende a Yesu mafura alya kaangua na mafuli amwi a nrwe. Na numba yoose ikaishua kisaamu kya mafura alya. 4Na Yuda Isikariote umwi wa vaseṛo vamwi ulya asheṛiinga Yesu kyeeri kya numa kanumbua: 5A mafura va naamu ki ili kitaare akumbwa na shilingi mayana araru, tiniingwa vakiva? 6Arera kuro kiimba kya ililia vakiva ndi, kake mfulya eekee inini. Nae yye eekurikaa mboloko ilya ya fesa na iiva eeivaa-fo kiindi kya fesa tilya tiirawaa-fo. 7Yesu kamwia: Nrie, afisa mafura o kumande nkonu wa iṛikwa lyakwa. 8Fulya vakiva mukee nawo mikonu yoose, kake niń mukaa nań mikonu yoose ndi.

9Kyasia vandu veengi va ifo kwa Vayuda vakamanya sheeli mfo akai. Vakasha nafo, nta nkiimba kya Yesu ye muni da ndi, kake naamu valolie na Lasaro ulya Yesu andenduta kwa vafu. 10Na vakohani vanini vakafukya kikwena kya iwaa Lasaro nae. 11Fulya na kwa kiimba kyamwi Vayuda veengi vandeenda vakakusura Yesu.

12Neeli lya ndesi yayo vandu veengi iwo vandesha kisukuń vakaita sheeli Yesu akee isha Yerusalemu. 13Vakawara maṛamba a maangashi vakasomuka vandemwondoṛa. Vakakaba nndoṛo vakanumbua: Osiana! Eetikiswa ulya asha na irina lya Nndumi kava mangi wa Isiraeli! 14Na Yesu eenkooyaa kyaashe kya nshungu kakyaṛukia, sheeli kikee kitisiṛe: 15Manya kuteeṛee iwe sambuṛa ya Sion! Lla te mangi yafo yakushea aaṛukie kyaasheń kya nshungu. 16Mboni to taaṛukia vanalosho vamwi io mbele ndi. Kake ili Yesu andemaa yenda uniniń lwamwi, llyo vandekumbua sheeli yye eenti-siṛioo kuro na sheeli vammutania kuro. 17Kyasia syamu ilya iikee andu emwi nae lia avaanga Lasaro kasomuka mbangeń kanduta, nayo ikanrambua. 18Na kiimba kya ikyo syamu ilya ya vandu ikandemwondoṛa, fulya vaita sheeli antana kindo kyo kya iṛiikisa. 19Kyasia Vafarisayo vakakurera wo veni na veni: Mulolie sheeli nta kindo mukimakii. Lleń te isanga lyoose linrie numa.

20Kari ka vandu valya varwe na kulya Yerusalemu kisukuń vandeterevia-fo Iṛuva veeifoo na Vagiriki kiindi. 21Vagiriki wo vakashea Filipo akee wa muṛi ulya wa Betisaida, nato ukee muungoń wa Galilaya. Vakantereva veemwiaa: Nndumi ise tifurie ilolia Yesu. 22Na Filipo kaenda kandeongoya Anderea. Filipo na Anderea vakaenda vakandeongoya Yesu. 23Na Yesu kavaaṛua kavaia: Kyeeri kya Mwana wa nndu kyamfika, amu auye uniniń lwamwi. 24Nkue namuia kya dede: Kwakooya kitaare mbeke ya umbi yeeṛwa si uteriń na ibwaa ibwaa, ikaa yo sheni da ikee imwi nsi. Kake ikambwaa ireekaa na innde mbeke shiingi. 25Kyasiań ulya akundaa muu wamwi auretaa, na ulya asuaa muu wamwi kunu isangeń ili aukiṛaa na ikooya muu utakisiaa. 26Na ulya afurień ishiṛundia kyawara ashisoṛe na utomari. Na alya niń nkai wwo na iketi lyakwa likaa da. Na nndu kashiṛundia na utomari, Vaava wakwa amwitikisaa. 27Alli nrima wakwa wansavaa. Nań narerań are? Nnumbuaa: Vaava shuuta, kaaṛa ntafikie saa yo? Kake kiimba kya ikyo nanshea saa yo. 28Wui Vaava, itikisa irina lyafo! Llyo ununga lwitiwa luuka iṛuvewu lwinumbuaa: Nammaa iliitikisa na lingi lliitikisaa. 29Syamu ya vandu valya veeyoo ili vandeita vakanumbua: Kiṛuṛumu kyambaṛangaka. Vengi vakanumbua: Mmalaika arera nae. 30Yesu kaaṛua kanumbua: Ununga lu lwarera kiimba kyakwa ndi, nkiimba kyanu. 31Alli uumisio lwa isanga li lwaawukia. Alli mwitoṛo wa isanga li aburuswaa aliuke. 32Nań ili nammaa iroswa nuutwa isangeń, llyo noomuaa woose na kwakwa. 33Kirero ki kakirera, amu aoruse ni ufu lungalu luweree. 34Kyasia vandu valya veeyoo vakamwata: Ise tamiita ifo uvavasoń sheeli Kristo akaa kumande miṛeṛe. A iwe kwarerań are: Kyawara Mwana wa nndu aroswa na ule? A Mwana to wa nndu yye iń? 35Kyasia Yesu kavaia: Langa ikikee andu emwi neeni kyeeri kyaangu. Kuwareń na langa yo ili mukiiwore, amu mutamiṛwa ni llema. Amu ulya akee iṛuaṛua llemiń eeshi kulya aendaa ndi. 36Ili mukiwore langa, kusureń langa yo, amu muve vana va langa.

37Mfo firero Yesu anderera kamaa. Kalakana na vandu kandekufisa. Kake lla kasa andetana myorusie miingi kuri mbele yawo, nawo nta vandenkusura ndi. 38Kindeva kuro, amu kirero kya mwauya kisuku ulya Yesaya andekirera kyawukie: ”Nndumi, ni i andekusurana na myongoye yeru? A lingi ni i amaaṛukio̱ mfilya uko lwa Nndumi lukee itana?“ 39Nkyo kikangio vatandemakii ikusura, amu Yesaya arera na kingi: 40”Awariṅanisa miso awo kaa-ṛua ngoo tawo sheemeri, kaaṛa vatalolie na miso awo na imanya mirimiń yawo veelashike, nań wakiṛe.“ 41Firero fo Yesaya andefirera, fulya andelolia unini lwa Yesu kasenda mboni tamwi. 42Kake veeifoo na vandu va nrwe veengi vandenkusura. Kake kiimba kya Vafarisayo vanderambua na baa ndi, kaaṛa vataimwa veeakaa numba ya iterevia. 43Amu wo veekundiee iitikiswa vvandu kita iitikiswa ni Iṛuva.

44Kyasia Yesu karosa ununga kanumbua: Ulya ashikusurie niń, nniń ashikusurie ndi, ni ito andeshiruma. 45Na ulya ashilolie niń, alolie na ito andeshiruma. 46Niń nansha isangeń nava langa, naamu nndu woose ashikusurie atakikaa llemiń. 47Na kwakooya nndu aitaa firero fakwa kara atafiwara, nniń mmwumisiaa ndi. Amu niń nansha nuumisie isanga ndi, nansha ikiṛa isanga. 48Ulya ashileaa niń kalea na firero fakwa, ankooya mumwumisia. Kirero kilya nankirera nkyo kimwumisiaa nkonu ulya wa ifurumia. 49Amu nkindo nuutie kwakwa shi muni nndekirera ndi. Nde yakwa ito ashirumie yye ashiniingia ivavaso lya kindo nnumbuaa na kindo nreraa. 50Nań niishi kilya avavasa nkyo kirie muu wa miṛeṛe. Kyasiań kilya nkee irera nkee ikirera kisumani na kilya Nde anshiia.

Currently Selected:

Yohane 12: RWK72

Highlight

Copy