Yohane 11

1Eeifoo nndu umwi alole, yye Lasaro wa kulya Betania kimuṛiń kilya kya Maria na Marita mfwamae wamwi. 2Na Maria to yye aamba Nndumi mafura a kisaamu na yangua marende amwi na mafuli a nrwe wamwi. Na mwanamae wamwi Lasaro yye alole. 3Kyasia vamfwamae valya vamwi vakaramia Yesu nrumi veenumbuaa: Nndumi, ulya kunkundie a to alole. 4Kyasia ili andeita kuro kanumbua: Saka ii yya ufu ndi, yya yorusa unini lwa Iṛuva, amu Mwana wa Iṛuva autie-wo iitikiswa. 5Na Yesu eekundanii na Maria na mfwamae na Lasaro. 6Ili amaa iita alole, kaengeṛia isinda alya akai mikonu ivili. 7Numa yayo kaia vaseṛo vamwi: Ndefoń tuuye na kulya Yudaya. 8Vaseṛo vamwi vakamwia: Llosha, ni alli kuri da Vayuda valya veeriee kya ikukaba na mawe, nawe kufurie yuya nafo lingi? 9Yesu kaaṛua: Saa ta nsanyiń ni ikumi na ivili se? Kwakooya nndu aṛuaṛua nsanyiń akabwaa urende ndi, fulya alolie saa ya isanga li. 10Kake kwakooya nndu aṛuaṛua ili kio akabwaa urende, fulya atawore saa kari kamwi. 11Ili andemaa irera kuro kavaia: Ndoo yeru Lasaro allala. Kake nkee yenda nndemwanta. 12Kyasia vanalosho valya vamwi vakamwia: Nndumi, kwakooya niikai alele, ashiaa. 13Kake ye Yesu arera kya ufu lwamwi. Nawo vakakusaṛia sheeli arera mboni ta ilala ruo. 14Llyo Yesu avaia na baa: Lasaro amfwa. 15Nań namfura kiimba kyanu, fulya kitaare mfo niikaii, amu muutie-wo ikusura. Kake ndefoń teende kwamwi. 16Kyasia Toma ulya avaangwaa wa yaasa kaia vanalosho valya vengi: Ndefoń neese, amu tindefwa andu emwi nae.

17Kyasia ili Yesu andefika-fo, kakooya ammaa mikonu iini mbangeń. 18Na Betania ukee kufui na Yerusalemu sha andu a kyeenga kya saa. 19Na Vayuda veengi veenshaa kulya kwa Marita na Maria, amu vashevalembalemba kiimba kya mwanamae wawo. 20Kyasia ili Marita andeita sheeli Yesu akee isha, kandemwondoṛa. Na Maria kakaa ifo numba. 21Kyasia Marita kaia Yesu: Nndumi, kikooye kwikee ia, mwanamae wakwa eefwaa ndi. 22Kake na akwaa na alli niishi, sheeli kyoose kuterevaa Iṛuva, Iṛuva akuniingaa. 23Yesu kamwia: Mwanamaa aṛukaa. 24Marita kamwia: Niń niishi namanya, aṛukaa ili vafu vaṛukaa nkonu ulya wa ifurumia. 25Yesu kamwia: Niń nniń nduti na muyamuu. Na nndu akusuranaa nań na akwaa afwa, akaa na muu. 26Na ulya woose eefo na muu kakusurana nań, akifwaa lingi ndi kumande miṛeṛe. A iwe kukusurie kuro? 27Nae kamwia: Ee Nndumi, niń nkusurie sheeli iwe ni iwe Kristo Mwana wa Iṛuva ito eenringisio̱o̱ sheeli ashaa isangeń.

28Ammaa irera kuro kakwimboo kandevaanga mfwamae Maria kiṛisiń kanumbua: Llosha ansha akee ikuvaanga. 29Nae ili andeita kuro, kakwimboo byań kansoṛa. 30Nae Yesu eemfikaa kimuṛiń kilya ndi. Eekikee alya akwania na Marita. 31Kyasia Vayuda valya veekee andu emwi na Maria ifo kyeń veellembalembaa vakalolia Maria akwimboo byań kasomuka wooṛo. Nawo vakansoṛa veekusaṛaa sheeli akee yenda mbangeń amu andelilia-fo. 32Kyasia ili Maria afika io Yesu akai na illolia, kawa si marendeń amwi. Kamwia: Nndumi, kifo nkunu kwikaii, mwanamae to wakwa eefwaa ndi. 33Kyasia ili Yesu andellolia eeiyaa na Vayuda valya veerianii nae veeiyaa, kavawwa mmuu kanaria nrimiń wamwi. 34Kavauṛa: Nkwi mundendika? Vakamwia: Oṛesho Nndumi kundella! 35Yesu kaiya na masoru akasha. 36Kyasia Vayuda valya vakanumbua: Lleń kasa eenkundiee! 37Kake kiindi kyawo vakanumbua: A nndu uu andemakii itaṛambua nndu ulya ndoń miso, andelemwa are iima nndu uu eefwaa?

38Kyasia kavawwa mmuu lingi nrimiń wamwi kafika mbangeń. Nayo ikee mbanga shiremi iweń, na iwe likee yamiṛwa-wo. 39Yesu kanumbua: Uteń-wo iwe lyo! Marita mfwamae wa ulya andefwa kamwia: Nndumi, ambooka iraa tee, amu eemmaa-fo mikonu iini. 40Yesu kamwia: Neenkuiaa se kwakooya kwakusura kuloliaa unini lwa Iṛuva? 41Kyasia vakauta-wo iwe lia. Yesu kaimboo miso amwi na ule kanumbua: Wui Nde, nakwaana, fulya kwanshaaranya. 42Nań niishi sheeli kushaaranyaa mikonu yoose. Kake kikangio narera kuri nkiimba kya wiingi lu lwa vandu lushilengetie, amu vautie-wo ikukusura vamanye sheeli ni iwe kushirumie. 43Neeli andemaa irera kuro, karera na ununga unini kavaanga: Lasaro somuka na kunu wooṛo! 44Nndu ulya mfu kasomuka na kulya wooṛo. Nae afingiefingie na firami marende na maako. Na kisangu kyamwi kisikie na kirami kya yangua nrike. Yesu kavaia: Mboṛomueń muntie aende.

45Kyasia Vayuda veengi kari ka iwo veenshaa kwa Maria ili vandelolia kilya andetana, vakankusura. 46Kake kiindi kyawo vakaenda kwa Vafarisayo vakandevaia filya Yesu atana. 47Kyasia vakohani vanini na Vafarisayo vakavaanga kikwena kinini kya vangyama vakanumbua: Titanaa are, ili nndu uu akee itana myorusie minini miingi kuri? 48Tikamia kuri vandu woose vankusuraa. Numa Varome vashaa na itisoka uruka na vandu. 49Umwi wawo nKayafa akee nkohani nnini mwaka ulya. Nae kavaia: 50Ini mwishi kindo ndi. Nta mukusaṛie sheeli llyo ńwana nndu umwi afwe andu a vandu kita ili vandu woose varekaa ndi. 51Firero fi afirera na uṛango lwamwi lo weni ndi. Kake nkiimba kya ili eekee nkohani nnini mwaka ulya kaauya sheeli Yesu afiyaa vandu va uruka. 52Kake afiyaa vandu va uruka wo veni ndi, kake afiyaa na vana va Iṛuva vanyanyakie, amu avasańiṛie andu emwi. 53Kuuka nkonu ulya vakarera kyama kya iwwaa.

54Nae Yesu akiṛuaṛua na bata kari ka Vayuda ndi. Kake kauka-fo kaenda muungoń ukee kufui na bateń. Kafika muṛiń uvaangwaa irina lyayo Efiraimu kakaa-fo andu emwi na vanalosho vamwi. 55Kisuku kilya kya Pasaka kiikee kufui na vandu veengi va uruka lua vakarwa na ule Yerusalemu ili kitaare kisuku kya Pasaka kyeemfikaa, amu vakwilisie-fo. 56Vakaṛuya Yesu vakakurera wo veni na veni vaselele ifo numba ya Iṛuva: A mulla ini, ashaa kisukuń iki ana wode? 57Nawo vakohani vanini na Vafarisayo veewavasaa, kwakooya nndu eeshi kundo Yesu akai, arambue amu vandewwara.

Currently Selected:

Yohane 11: RWK72

Highlight

Copy