Yohani 14

Idala lya kusogolela kwa Yise

1Gatagandushʼamoyo ginyu; mumwitishʼuMulungu, nane munitishe. 2Munyumba ya Tata palʼapinji apavuyo. Papele pasoṿile nkandi mbavuzizye. She nkuvalʼukuvayana-nizya pavuyo imwe. 3Ilelo lwe mbazilʼukuvayananizya pavuyo imwe, ndiyinza havili ukuvasendʼimwe, ukuti muvanje kukwane, namwe ukuti muve pupo pe ndi ine. 4Pope napupo pe nkuvala mulimanyilʼidala. 5PʼuToma ahamuvuzya ahati: Mwene, she pope napʼukuvala tutapamanyile, pe twati tulimanye vuli idala? 6PʼuYesu ahamuvuzya ahati: Nene ne lidala nenene, ne vwanalyoli nenene, ne vulanzi nenene. Numo atakufiha kwa Tata, wengʼatakujenda mumwanʼine. 7Mupele mwamanyilʼahinzʼine, pe nkandi wope nuTata pe mumumanyile. Shinishi lelo pe mumumanyile, nukumwenya mumuwenyi. 8PʼahamuvuzyʼuFilipu ahati: Mwene, utulanjʼuSo, pe tutinji hongʼena. 9PʼuYesu ahamuvuzya ahati: She ndiliyʼamaha gonti vovulo namwe, pe havili utamanyilʼine, we Filipu? Shʼuno wengʼambwenyʼine pʼamuwenyʼuTata. Pe havili ukuyanga vulʼiwe ukuti: UtulanjʼuSo? 10Utakwitiha izya kuti nane ndi mwa Tata, havili wope nuTata ali mumwanʼine? Amazwi ge nkuvavuzyʼimwe ge ntakwata gane nene ndali. WʼuTata wʼali mumwanʼumu, wʼakuvombʼimbombo zyakwe. 11Munitishe ukuti nane ndi mwa Tata, havili wope nuTata ali mumwanʼine. Inga mukuhana zinizi pe mwitishe kumbombo zyonti zinizi. 12Nalyoli lyoli nkuvavuzyʼine nkuti: Uno wengʼanitisilʼine, wʼimbombo zye nkuvombʼine alivomba zizyo wope. Ena Zyope nindusyi uvupiti alivomba, she nkuvala kwa Tata ine. 13Vwonti vwenga mukulava mwizina lyane ṿwe ndivomba, ukuti uTata pʼavoneshe mwa Mwana ukuva we mupiti. 14Inga mukulava zimo mwizina lyane zye ndivomba.

Ulumfingwi lwa Mupepo

15Inga munkunzite nalyoli, pe mulilandata namunkomelezyo zyane. 16Pe nane ndimulavʼuTata, ilelo pʼuwene alivapʼuMwimizi uwamwavo uwa kuva namwe shima. 17We wʼuMupepo wa vwanalyoli, wʼinsi yitamanyilʼukumuposhela, shʼitakumwenya havili yitamumanyile. Nkandʼimwe mumumanyile, shʼakulinda kumwinyu, havili muliva nawo muhati zyinyu. 18Ntakuvaleha ukuti mwe vapina ndali, ndiyinza kumwinyu. 19Pasyaye pansi pʼinsi yitakundola, nkandʼimwe mukundola she ne mulanzʼine, namwe muliva mwe valanzi. 20Umusanya wuyo pe mulimanya ukuti ndi mwa Tata ine, namwe ukuti muli mumwanʼine, havili nane ukuti ndi mumwinyu imwe. 21Uno wengʼali nazyʼinkomelezyo zyane, wʼakuziviha namumwoyo wakwe, we wuyo wʼankunzitʼine. Ilelʼuno wengʼankunzitʼine, we wuyo uTata alimukunda, we nane ndimukunda, we ndiyilolesya kukwakwe ine. 22PʼahamuvuzyʼuYuda, we ndali uwa mu-Kalyoti ula, ahati: Mwene, shonu shitili vuli shʼukuti nkuyilolesya kwe kumwitu iswe sweka, nkandi kunsi ndali? 23PʼuYesu ahamwamula ahati: Inga wokʼumuntu ankunzitʼine, wʼalisajilʼamazwi gane, pe wope nuTata alimukundagʼuwene, ilelo pe tuliyinza kukwakwe, tulipela pavuyo iswe papakwe. 24Uno wengʼatakunkunda, wʼatakusajila namazwi gane. Ilyenʼizwi lye mukwiṿwa shinishi, lye lite lyane ine ndali, lye lya Tata wʼantumilʼine. 25Zyonti zinizi mbavuzizye nzila, she suti tuli swenti nane. 26Uwene nyenʼuMwimizi, uMupepʼuMufinjile, wʼuTata alimutuma mwizina lyanʼine, wuyo nyene alivasambilizyʼimwe zyonti, wʼalivakumbusya zyonti zye mbavuzizyʼimwe. 27Nkuvaleshelʼuvwihalo, nkuvapʼuvwihalo vwane. Ntakuvapʼimwe inza shʼinsi yikuvapanga. Gatagandushe lelʼamoyo ginyu, gatasaganyaje. 28Mwiṿuye lwe natinji: Mbusilʼukuvala, havili ndiyinza kumwinyu. Inga munkunzite, pe mukwe mukuseshela she nkuti nkuvala kwa Tata, shʼuTata andusizyʼuvupiti ine. 29Ilelo mbavuzizye nzila lwe zishili, namwe pe pakuti muve mwitihaje lwe zyinzilʼukwinza. 30Ntakuyangʼinyinji namwe shinishi, shʼayinzilʼumuhatansi yinino, uwene wʼumuntu wa vwelele kukwanʼine. 31Nkandʼukuti insi mwʼimanyilʼine ukuti imukunzitʼuTata, ukuti nkuvomba inza shʼuTata andajizizye: Muvushe, tuvale lelo.

Currently Selected:

Yohani 14: NYi1965

Highlight

Copy