Yohani 13

UYesu akwozyʼiṿinama vwa vasundikwa vakwe

1Ilelʼuchaka wa Pasa lwʼashili, uYesu pʼahamanya ukuti ahavalilizyo hakwe hinzile aha kwepelʼuwene munsʼumu, aha kuvala kwa Yise. Ilelo inza shʼavakunzitʼavantu vakwe munsʼumu, shʼahavakunda shima napampelela. 2Ilelʼapene lwe vamakulyʼiṿintu ṿwa shamazuva, umukwakwa lwʼamalilizyʼukuziviha mumwoyo wa Yuda umwana wa Simoni, uwa mu-Kalyoti, izya kumwandila; 3pʼuYesu, shʼamanyile ukuti uYise vwontʼamupiye munyove, amanyile nukuti mfumile kwa Mulungu havili nkuvala kwa Mulungu, 4ahavuha mwe vahalyangʼiṿintu, ahazulʼamenda gakwe, ahazwalʼumwendʼumuzelu mumusana. 5Pʼahaponyʼaminzi mwibeseni, pʼahandʼukuvozya muṿinama avasundikwa vakwe, ahaṿisyumula numwenda wʼazwaye mumusana. 6Pʼahafiha napa Simoni Peteli. Uwene ahamuvuzya ahati: Mwene, we watinji unozyaje muṿinamʼiwe? 7UwenʼuYesu ahamula ahamuvuzya ahati: Ahe, he nkuvomba shinishi ine, hʼutamanyilʼiwe suti, ulihamanya inga lumo. 8UwenʼuPeteli ahamuvuzya ahati: Nalumʼiwe utʼunozye muvinamʼine. PʼuYesu ahamwamula ahati: Inga ntakukwozya pe we muntu shaha kukwanʼiwe. 9PʼuSimoni Peteli ahamuvuzya ahati: Mwene, mwe muṿinama mweka ndali, nkandi namunyove nakwitwe. 10UwenʼuYesu ahamuvuzya ahati: Uno wengʼagezile wʼakusukusula mwe muṿinama mweka, she muzelu mwonti. Namwe mwe vazelu, nkandi mute mwe vazelu mwenti. 11Shʼuwene amumanyilʼuwa kumwandila, mwe mumwo atili: Mute mwe vazelu mwenti.

12Ilelo lwʼavozizye muṿinama, lwʼazwaye havili namenda gakwe, pʼahatendama havili, ahavavuzya ahati: Muzyaginye zye mbavombeye shinishi? 13Imwe mukuntaha nilya Musambilizi nilya Mwene ine, ilelo zye mulovosizye, she nene nalyoli. 14Apene lelo ingʼine ne Mwene, ne Musambilizi winyu, inga mbozizye muṿinama, pe namwe pakuti mwozanyaje muṿinama namwe. 15Mbapiye aha kwenyelezya mumwo, namwe ukuti muvombelane huho he nane mbavombeye imwe. 16Nalyoli lyoli nkuvavuzyʼine nkuti: Umunyamata atalusizyʼuvupiti umwene wakwe, wope numwapositili atalusizyʼuvupiti uno wʼamutumile. 17Shinishi inga muzimanyile zinizi, pe mukuva mwe vasangalusu inga mukuzivomba. 18Ntakuvataha mwenti ndali, she mbamanyile ve mbasavuye; nkandi ukuti zyinzaje zizyo zye zisimṿilwe mwa kalata zye zikuti: Uno wʼakulya umukati wane, wʼampanile nivala lyakwe. 19Nkwanda shinishi nkuvavuzya nzila lwe zishili, ukuti munitihaje ukuti nali nenene nalyoli, inga lumo inga zikupelwa. 20Nalyoli lyoli nkuvavuzyʼine nkuti: Uno wengʼakumutangana we nkumutumʼine, pʼakuntanganʼine, uwenʼuno wengʼakuntanganʼine, pʼakumutangana wuyo wʼantumilʼine.

UYesu akumutaha uwa kumwamula

21-30: Mat. 26,21-25. Mal. 14,18-21. Luk. 22,21-23.

21Ilelo lwʼayanzile linilʼuYesu pʼahayinga mumupepo wakwe, ahahomeshezya ahati: Nalyoli lyoli nkuvavuzyʼine nkuti: Mumwinyʼumu mwe muvaliye woka akunanilila. 22Pe vahenyanyʼavasundikwa vakwe, vahaganagana vahati: Amwe akumutaha wʼunanu? 23Ilelo pali wokʼumusundikwa wa Yesu, wʼapalamine nawo pashifuva shakwe, wʼali wʼunkundwa kwa Yesu. 24We wuyo uSimoni Peteli ahamukapizya ahati: Umuvuzilizyaje utinji unanu wʼukumutaha? 25Pʼuwene ahegamila pashifuva sha Yesu, ahamuvuzilizya ahati: Mwene, unanu wʼukumutaha? 26PʼuYesu ahamuvuzya ahati: Uno we nkuva nkumupʼintonji ye nkusanzila. Pʼahasanzila intonji, ahamupʼuYuda umwana wa Simoni uwa mu-Kalyoti. 27Ilelo pupo lwʼaliyʼintonji pʼuSetano ahinjila mumwakwe. PʼuwenʼuYesu ahamuvuzya ahati: Hengʼukuvomba vombaga luvilo. 28Vonti vuvo ve vahalyanga nawʼiṿintu, numo atazimanyile ukuti zikwenya muvulive zyʼahamuvuzyaga. 29Vamo vahasiva ukuti ingavanga akuti: Kalaga iṿwa pachaka, ingavanga akuti: Uvapanje yimo avapina, shʼuYuda asenzitʼimbugulu ya mpiya. 30Uwene nyene lwʼaposheleye intonji, pʼahafuma kunzi luvilo luvilo. Ilelo pali pe pavusiku.

Uluhomelezyʼulupwa ulwa shikunzi

31Ilelo lwʼafumile kunzi, pʼuYesu ahavavuzya ahati: Shinishi pʼapezilwe ukuva we mupiti uMwanamuntu, wope uMulungu ayipezilʼukuva we mupiti mwe mumwakwe. 32IngʼuMulungu ayipezilʼukuva we mupiti mumwakwe wuyo, pe wopʼuMulungu alimupela ukuva we mupiti mumwakwe wuyo. Atalihavʼukumupela ukuva we mupiti. 33Mwe twana mwe, patasyaye papiti apa kuva namwe ine. Mulinanzaga. Havili lilyo lye mbavuzizye avaYuda, lye nkuvavuzya namwe shinishi, nkuti: Kwe nkuvalʼine kwe mute muhavale imwe. 34Nkuvapʼululajizyʼulupwa lwe lukuti: Simukundanaje. Mukundane mwe vuvo vatupu, inza she nane mbakunzitʼine. 35Mwe mumwo mwe valivamanya vontʼavantu ukuva mwe vasundikwa vane imwe, inga mukundine she shikunzi sha nalyoli.

Ukuyihana kwa Peteli kwakuvwilwe

36-38: Mat. 26,33-35. Mal. 14,29-31. Luk. 22,31-34.

36PʼuSimoni Peteli ahamuvuzilizya ahati: Mwene, ukuvala kwi? AhamulʼuYesu ahati: Kwe nkuvalʼine ute undandate shinishi iwe, nkandi ulindandata inga lumo. 37UwenʼuPeteli ahamuvuzya ahati: Mwene, nte nkulandate shonu shinishi? Navwe vulanzi vwane nkwanzʼukukufwilʼiwe. 38UwenʼuYesu ahamula ahati: Ukumfwilʼuvulanzi vwaho iwe? Nalyoli lyoli nkukuvuzyʼine nkuti: Inkanda lwʼishili nukuvilishila pʼuyihanile hatatu kukwane.

Currently Selected:

Yohani 13: NYi1965

Highlight

Copy