Yohani 12

UYesu akupakwa amafuta nuMaliya mu-Betaniya

1-8: Mat. 26,6-13. Mal. 14,3-9.

1UwenʼuYesu lelo lwe gasyayʼamandʼumutanda ukwinzʼuchaka wa Pasa, pʼahavala mu-Betaniya mwʼasamiyʼuLazali ula wʼuYesu amuzyusizye kuvafwe. 2Kwe vahamuteleshela ivwa kulya, uMalita ahavatelamishila. UwenʼuLazali wope ali navo ve vahalya nawo. 3UwenʼuMaliya ahasendʼipaundi yoka ya mafutʼamasitakusanganya nahamʼahanji, amagomu nkani, gʼahamupaha muṿinamʼuYesu, pʼahamusyumula muṿinama ṿwakwe ninsisi zyakwe. Pʼumufungo wa mafuta ahagoganya mwonti munyumba. 4PʼahayangʼuYuda uwa mu-Kalyoti, wokʼumusundikwa wakwe, we pisinda alimwanilila, ahati: 5Vali nishonu ukukazyʼamafuta ganaga namadinali 300 genga vavagavanyʼavapina? 6Zye zizyo atahayanga shʼakumbushiyʼavapina ndali, nkandi shʼalʼumwiva, shʼasenzitʼimbugulu, shimʼahiva ṿwe vahavihaga mumwʼavantu. 7PʼuYesu ahati: Umuleshe, agasunje, gavanje ga pisiku lya kunsyililʼine. 8Shʼavapina ve muli navo shima, nkandʼine ntakuva mumwinyʼumu shima. 9Pe vahamanyʼavaYuda impugʼimpiti ukuti ali kukwo. Pe vahavala, vatamutunjiye uYesu weka ndali, she vahati: Tumumanye nawe Lazali wʼamuzyusizye kuvafwe. 10Pʼavashiputʼavapiti vahayangana vahati: Wope nuLazali uno pakuti tumugoje. 11ShʼavaYuda avinji vahayifumizya, inga pe vahamwitihʼuYesu.

Ukwinjila mu-Yelusalemu nuluseshelo ulupiti

12-19: Mat. 21,1-11. Mal. 11,1-10. Luk. 19,29-40.

12Ilelo ilya ndavi, pʼavantʼimpuga ve vavazile pachaka, lwe viṿuye ukuti uYesu akwinza mu-Yelusalemu, 13pe vahasendʼamanchinda, vahafuma muhaya, vahamutangana, vahavilishila vahati: Hosyana we mulotwa wʼakwinzila mwizina lya Mwene, umwene wa vana Yisilayili. 14PʼuYesu ahagʼahadogovi, ahalimbila huho. Inza she lilyo lisimṿilwe lye likuti: 15Utatetemaje we mulindu Zyoni, yenya, umwene waho akwinza alimbiyʼindogovi. 16Zinizi nyene avasundikwa vakwe vahapotwa ukuzimanyinsanya suti, nkandi pisinda lwʼavazile muvupiti, pala nyene pe vahakumbuha ukuti zinizi zisimṿilwe kuli wuyo, havili zye vamuvombeye. 17Vahahomeshezyʼavantu impuga yonti, ve vali nawo lwʼakumwʼuLazali mumbipa, lwʼakumuzyusya kuvafwe. 18Zye zizyo vope navantu impuga yonti vahavalʼukumutangana she viṿuye ukuti apezilʼishimanyilo shinishi. 19PʼavenʼavaFalisayi vahavuzanya vahati: Yenyi, muvomṿile shaha vwelele. Yenyi, insi yonti isozile mwisinda mumwakwe.

Ukuvuzilizya kwa vaGiliki

20Muli vuvo ve vazuṿilʼukuputa pachaka mwe valʼavaGiliki vamo. 21Vahavalʼukuyanga nuFilipu wa mu-Betisayida ya mu-Galilayi, vahalambilizya kukwakwe vahati: Mwene, tukwanzʼukumumanyʼuYesu. 22UwenʼuFilipu ahavalʼukumuvuzyʼuAndeleya, ilelo pʼuAndeleya nuFilipu vahavalʼukumuvuzyʼuYesu. 23PʼuYesu ahavamula ahati: Hinzilʼahavalilizyo aha kupelwʼukuvʼumupiti uMwanamuntu. 24Nalyoli lyoli nkuvavuzya nkuti: Ulusanga lwa ngana inga lutakupeselwa mumugunda inga lutakufwa, pe lukuva lulwo lweka, apene nyene inga lukufwa, pe nkandi lukuhomʼinsangʼinyinji. 25Uno wengʼuvulanzi vwakwe akuvupepelezya wʼakuvunanga. Nkandʼuno wengʼuvulanzi vwakwe akuvusyoshela munsʼumu, wʼalivusengula nakuvulanzi vwa shimashima. 26Uno wengʼakwanza ukumbombelʼine, we pakuti andandate mwisindʼine. She kwe ndi ine, kwe pakuti avanje wope numunyamata wane. Uno wengʼakumbombelʼine wʼuTata alimushindiha. 27Shinishi umwoyo wane pʼakuyinga. Ilelo pe ntuvuli? Amwe minji we Tata umpohaje muhavalilizyo hanaha? Zye ndali, she zye zizyo zye ninjiye muhavalilizyo hanaha. 28We Tata ulipanjʼuvupiti izina lyaho. Pe lihafuma kumwanyʼizwi, lihati: Ndipiyʼuvupiti, havili nkuvuyizyʼukulipʼuvupiti. 29Avenʼavantu ve vimiliye pupo impuga yonti, ve viṿuye izwʼili vahati: Ikuguluma. Vamo vahati: Uhavizya ayanzile nawo. 30UwenʼuYesu ahamula ahati: Izwʼili litayanzilwe ukuti niṿwʼine, nkandi ukuti mwiṿwʼimwe. 31Shinishi pʼinsi yinino yikulongwa. Shinishi umuhatansi yinino akutajilwa kunzi. 32Nane, inga lumo inga ntunyulilwe munsʼumu, pe ndivakwesa kukwane vonti. 33Zyʼahayanga izya kuyanjila mumwo ukuti uvufwe ndifwʼuvulive. 34Pʼavenʼavantu impuga yonti vahamula vahati: Iswe mululajizyo twiṿuye ukuti uChilisiti alivanga shima. Havili zyʼukuyanga zyashi iwe zyʼukuti: UMwanamuntu we pakuti atunyulilwaje? Wʼunanu uMwanamuntu wununo? 35PʼuYesu ahavavuzya ahati: Isuti pasyaye pansi vwelele pʼuluhozyo lukwepa mumwinyʼumu. Simujende shinishi lwe suti lulipo mumwinyʼumu uluhozyo, ishisi ukuti shitinzʼukuvagwila. Shʼuno wengʼakujenda mushisi, wʼakwenya kwʼakuvala. 36Simwitihajʼuluhozyo, lwe suti lulipo mumwinyʼumu, pe muyipelʼukuva mwe vana va luhozyo namwe. Ilelo lwʼavavuzizye zinizʼuYesu, pʼahavala, ahavelenguha.

Izya vusingani vwa va mu-Yudayi nizya vusundikwa vwa kukwilu

37Avene nyene vahasita nukumwitiha nashenga apezilʼiṿimanyilo ṿiniṿi lwe vakwenya. 38Mwe mumwo lihalunjihʼizwi lya Yesaya umukuvwi lyʼatili:

Mwene, pe wʼunanu alipo wʼakwitiha zye tukuvavuzya?

Uwenʼumuhono wa Mwene wʼunanu wʼawuwenyi?

39Zye zizyo lwavapotagʼulwitiho, shʼuYesaya apanji akuti:

40Avatonkoyʼaminso gavo namoyo gavo agagulumbisile, ukuti

Vatenyaje naminso, ukuti vatazyaganyʼinongwa mumoyo, ukuti

vatinzʼukupinduha, ntinzʼukuvazuzuvushizya.

41Zinizi ayanzilʼuYesaya pala pʼawenyi uvupiti vwakwe uvumwamu, pala pʼahamuyanjilaga wuyo. 42Nashenga zyali vovulo, avapiti vope vahitiha ve vinji, nkandi vahasitʼukutaha apazelu ulwitiho lwavo, she vahogopʼavaFalisayi, vatili: Avene vakutufumwa musinagogi. 43She vakunzitʼulushindiho lwa vantu kulusya ulushindiho lwa Mulungu. Impiti mulizyʼuYesu ahasambilizyaga avantu 44PʼuYesu ahavilishila ahati: Uno wengʼanitisilʼine, pʼatanitisilʼine ndali, pʼamwitisile wuyo wʼantumilʼine. 45Uno wʼakunenyelezyʼine pʼakumwenyelezya wuyo wʼantumilʼine. 46Lwe ninzile munsʼumu, pe ninzile ne luhozyo, vonti ve vanitisile ukuti vatavanje mushisi. 47Ingʼumʼumuntu akwiṿwʼamazwi gane, havili ingʼatakugasajila, pe ntakumulonga nene ndali, she ntinzilʼukulongʼinsi ine ndali, ninzilʼukupoha insi. 48Uno wengʼakunsinganʼine, uno wengʼatakuposhelʼamazwi gane, wʼali nawo uwa kumulonga. Izwi lye njanzile, lye lilimulonga lilyo pisiku lya pampelela. 49She zye nkayanga zye ntayitumile neka ndali, wʼuTata wʼantumile, wʼankomelezizye wuyo, atili zyʼuyangaje zyenezyo, uvavuzye minji minji. 50Ndumanyilʼuluhomelezyo lwakwe ukuti lwe vulanzi vwa shimashima. Izyene lelo zyenga nkuyangʼine, zye nkuyanga mwʼambuzizyʼuTata.

Currently Selected:

Yohani 12: NYi1965

Highlight

Copy