Yohani 11

UYesu akumuzyusyʼuLazali kuvafwe

1Wokʼumuntu avinile, uLazali wa mu-Betaniya, ye nkaya mwe vasamiye avaMaliya numukulu wakwe uMalita. 2UwenʼuMaliya uno, we wuyo wʼahamupahaga namafuta uMwene, wʼahamusyumula muṿinama ṿwakwe ninsisi zyakwe. Ali we munine wa Lazali wʼavinile. 3Pʼavanine va muvinu vahatuma kukwakwe vahati: Mwene, yenya, wʼumukunzite avinile. 4UwenʼuYesu lwʼayiṿuye pʼahati: Impungo yakwe ino ite ya kumugoga ndali, nkandi ya kukumusya mumwʼuvupiti vwa Mulungu, wope nawe Mwana wa Mulungu mwʼavonehaje uvupiti. 5UwenʼuYesu nyene wʼakunzite ava-Malita numuzuna wakwe nuLazali. 6Ilelo lwʼayiṿuyʼukuti avinile, pe suti ahadila amanda gavili pʼali. 7Inga pʼahavavuzyʼavasundikwa vakwe ahati: Shushi, tuvale mu-Yelusalemu nohavili. 8Pʼavasundikwa vakwe vahati: Labi, shʼavaYuda vatili tumutinzʼamavwe shinishi, havili kwʼukuvala? 9AhamulʼuYesu ahati: Amwe utuvalilizyo twa musanya woka tute ishumi natuvili? Umuntu ingʼakujenda shamusanya, pʼatakupunula, shʼakwenyʼuluhozyo lwa nsi yinino. 10Nkandʼumuntu wengʼakujenda pavusiku, pʼakupunula, she luhozyo lute mumwakwe. 11Ahayanga vovulo, napisinda pʼahavavuzya ahati: ULazali uwamwitu akasitʼutulo, kwe nkuvala she nkuti imudamusyaje. 12Pʼavasundikwa vakwe vahati: Mwene, ingʼakasitʼutulo, pʼakwʼapole. 13UwenʼuYesu atasile kwe kufwa, nkandʼavene vahati ingavanga akutaha ukukatʼutulo. 14PʼuYesu ahavavuzyʼapazelu ahati: ULazali afuye. 15Nkuseshelʼine kumwinyu she ntalipo kwa Lazali, mwe nkuti pe muliyitiha lelo. Shinishi nyene pe shushi tuvale kukwakwe. 16PʼuToma we vatili we lipasa, ahayanga kuvasundikwa avamwavo ahati: Shushi, tuvale nawo, tuhafwile poka nawo.

17Lwʼafiha uYesu pʼahaga akasitʼamanda gane mumbipa. 18Iyenʼinkaya ya mu-Betaniya yali papipi nuYelusalemu fwe ngati mayili zivili. 19Pe vahavalʼavinji avaYuda pavaMalita nuMaliya, vahati tulosye navʼilosyo lya pamunine wavo. 20UMalita lwʼayiṿuye ukuti uYesu ayinzile, pʼahavalʼukumutangana. UwenʼuMaliya ahasyala munyumba. 21PʼuMalita ahayanga nuYesu ahati: Mwene, upele walipʼiwe, pe nkandi atafuyʼumunine witu. 22Havili nashinishi pe manyilʼine ukuti zyonti zyengʼukulava kwa Mulungu, uMulungu akukupa. 23UwenʼuYesu ahamuvuzya ahati: Umunine winyu alizyuha. 24UwenʼuMalita ahamula ahati: Kwe nane manyile ukuti alizyuha lwe valizyuha vontʼavantu pisiku lya pampelela. 25PʼuYesu ahati: Ne kuzyuha ne vulanzi nenene. Uno wengʼanitisilʼine, wʼakulandila nashengʼakufwa. 26Havili vonti venga vakunitiha ve vakulandila, vatalifwa nalumo. Amwe ukwitiha zinizi? 27Pʼahamuvuzya ahati: Ena Mwene. Nkwitiha ukuti we Chilisiti iwe, we Mwana wa Mulungu wʼakwinza munsʼumu. 28Ilelo lwʼayanzile linili, pʼahavala ukumwitʼuMaliya umuzuna wakwe kukwilu ahati: Umusambilizi alipo, akukwita. 29Uwene lwʼayiṿuye pʼahavuha luvilo luvilo, ahavala kukwo kwʼali. 30UwenʼuYesu wʼashili ukufiha muhaya, sutʼalipo pupo pʼahomine nuMalita. 31AvenʼavaYuda ve vali nawo munyumba ukumupumilizya, lwe vazilʼuMaliya akuvuha luvilo luvilo akufuma kunzi, pe vahamulandata vahati: Ingavangʼakuvala kumbipa akuti ndosye kukwo. 32UwenʼuMaliya lelo lwʼafisile pʼalʼuYesu, lwʼamuwenyi, pʼahamugwila kuṿinama, ahamuvuzya ahati: Upele walipʼiwe, pe nkandi atafuyʼumunine witu. 33UwenʼuYesu lwʼamuwenyi akulosya vope navaYuda ve vamusindishiye ukuti vakulosya, pʼahaṿitwa muhati ahayinga. 34Pʼahati: Mumuvisile mwoshi? Avene vahamuvuzya vahati: Mwene, nzagaga, uyenye. 35PʼuYesu ahakutʼamansozi. 36PʼavaYuda vahati: Musukumile, ṿwʼamukunzite. 37Vamo nyene vahati: Uno wʼayiguyʼaminso ga wantonko ula, ali nishonu ukupelʼukuti atahafwe wununo? 38PʼuYesu havili ahaṿitwa muhati, pʼahafiha kumbipa. Iyene yalʼininga, vavisilʼivwe kushilyango. 39PʼuYesu ahati: Musegusyʼivwe. PʼuMalita umunine wakwʼuno wʼafuye ahati: Mwene, shinishi pʼakununka, shʼakasitʼamanda gane. 40UwenʼuYesu ahamuvuzya ahati: Ine ntakuvuzizye ukuti ingʼukwitiha pʼungenyʼuvupiti vwa Mulungu? 41Pe vahasegusyʼivwe. UwenʼuYesu ahenyelezyʼaminso kumwanya ahati: Wasalipa we Tata, shʼuntejelezizye. 42Ine manyile ukuti ukuntejelezya shima, nkandi nkuyanga pe pavantu vanava ve vimiliye iva, she nkuti vope vitishe ukuti untumilʼiwe. 43Ilelo lwʼayanzile linili, pʼahavilishila izwʼipiti ahati: Lazali fuma. 44Pʼahafuma uno wʼafuye, ali namenda ge vamupinyile muṿinama namunyove aga kumusyilila. Kwope nakusheni vamupinyilʼumwenda wa matwinsi. PʼuYesu ahavavuzya ahati: Mumusatule avalaje.

Avashiputʼavapiti vakwanza Izya kumugogʼuYesu

45Vamʼavinji avaYuda ve vinzile kwa Maliya, lwe vamuwenyi avomṿile zinizi, pe vahamwitiha. 46Vamo nyene vahavala AvaFalisayi vahavavuzya zyʼahavomba. 47Pe navashiputʼavapiti navaFalisayi valivunganiha uluhomano lwa vahombe, vahayangana vahati: Tutuvuli nawo lelo, shʼumuntʼuno akupelʼiṿimanyilo iṿwinji. 48Inga tukumuleha vovulo, pe valimwitiha vontʼavantu, ilelo pʼavaLoma valitwinzila ukufwula ninsi navantu. 49Pe woka uwamwavo uKayifa, wʼali washiputʼumupiti umwaha wuyo, ahavavuzya ahati: Imwe mutazimanyile nazimo. 50Kwope nukukumbuha mutakukumbuha ukuti pe tukuva swe vinza iswe, ingʼumuntu woka akuvafwilʼavantu, ukuti lutalovaje uluho lwonti. 51Izyene zinizi zyʼatiluye weka ndali, nkandi shʼali washiputo umwaha wuyo, pʼahakuvwa ukuti uYesu akuvʼakuvafwilʼavantu uluho lwonti, 52havili te luho lunulu vwelele, nkandi ukuti avavunganishe poka avana va Mulungu ve vasavaliye mwonti mwonti. 53Pe valitaliha umusanya wuyo lelo ukuyangana izya kuti tumugojʼuwene.

54UwenʼuYesu atahajendʼapazelu munsi ya vaYuda ndali, uwene ahavala munsi yʼipalamine nulwugwa, ahavala munkaya ye vakuti Efulemu izina, pʼahadila navasundikwa vakwe. 55Ilelʼuwenʼuchaka wa Pasa wa vaYuda apalamiye. Ilelo pʼavantu avinji va munsi vahazuva ku-Yelusalemu ukuyizelufwa lwʼashilʼuchaka wa Pasa. 56Ve vahanzʼuYesu. Vahavuzilizanya lwe vimiliye mwa tempeli vahati: Vulʼimwe, jezile nalyoli atakwinza pachaka wununo? 57Avene nyenʼavashiputʼavapiti navaFalisayi vahomelezizye vatili inga woka awenyi kwʼali wʼatuṿumbulile, tumuleme.

Currently Selected:

Yohani 11: NYi1965

Highlight

Copy