Mapookyony 26

Isaki Asamya Urukeny lwa Kerari

1Ikasha shaa urukeny elo, shaa ingyi nshi ilya ya kyeeri kya Abrahamu-fo. Isaki keenda kwa Abimeleki mangyi ya Vafilisti kulya Kerari. 2Nndumi Iruva kakoora nawe kammbia, “Lola kulashesoka na Misri, mmbo kukaa yoo urukeny elo nshekoora.” 3Kaa urukeny weny, neeny nkaa neewe, shikuvikye mbora, mashika nshekuniingaa ngyuruka eti toose yewe na ufyari lwafo. Na yeny nshenangisaa kyaasa kyakwa kilya shilevika na ndoo Abrahamu. 4Nshefumbutaa ufyari lwafo sha nyinyiri ta efo nginii-u, neen nsheningaa ufyari lwafo ngyuruka eti toose, na yoo kwafo nng'u ando ngyufyari toose ta ulana tishevikywa mbora. 5Kimmba Abrahamu aleinndya unyanga lwakwa, katira na mavavasyo akwa, na mavavaso akwa na uvavaso lwakwa. 6Isaki kakaa Kerari. 7Vandu va efo vakammbesa mbony ta nka wakwe. Kavavia, “Yeu ni mfwama; mashika llya aleereya yaamba ‘Yeu ni nkaakwa,’” vandu va uruka llwa valasheemmbwaa kimaruma kya Rebeka, mashika mmbo ekee nsha nnu elyi kwallola. 8Naasa elyi ankaafo mikonu miingyi, Abimeleki mangyi ya Vafilisti, kaamaiya na idirisheny kalollya Isaki eelelembaa nkaakwe Rebeka. 9Abimeleki kavaanga Isaki kammbia, “Dede deny yeu ni nkaafo, a nkiki elyi kuleamba, ‘Yeu ni mfwa-ma?’” Isaki kammbia, “Mmbo shilekusara shilashefwa kyeendwa mmbwe.” 10Abimeleki kammbia, “Nkyoki ekyi kulelutannya?” Kweenda kukooye umwi wa vandu wakwa mmbwe alekaa na nkaafo nta nalaireye, yoo mmbo kweluutya uvingo. 11Naasa Abimeleki kavavasa vandu woose kavavia, “Kwakooya nndu ashepaana nndu yeu ao nkaakwe nkuti nawaawa.”

12Isaki kavaaya mbeu kulya urukeny lulya, mwaaka ulya mweni kawonisa fimu fiingyi ka iyana mashika, Nndumi Iruva mmbo alemmbikya mbora. 13Na nndu yeu kang'ana, keengera ivesywa, kava nndu nnini nnu. 14Katira masaa a moonri, na ng'umbe na mshinga meengyi. Vafilisti vakantirya kififi. 15Na firori filya fyoose fyesumwa ni mashinga a ndeeye Abrahamu kyeeri ekee na muu, Vafilisti mmbo vemmaa ifilyikya. 16Abimeleki kavia Isaki, “Kweete kweru, mashika yewe mmbo kutiri finya ngota yese.” 17Naasa Isaki kauka-fo, kandekaa imungony lya Kerari. 18Isaki kawuya ilukkwa-se firori filya fya mura vefisuma kyeeri kya ndeye Abrahamu, mashika Vafilisti valya mmbo vefilyikya kyeeri Abrahamu emaa ifwa; nawe kafifishya marina alya meni kiinani na shaasa ndeye Abrahamu efivanngye. 19Mashinga a Isaki akasuma kulya imungony lyilya vakaonisa-fo kirori kya mura usheekaa. 20Veesa findo va Kerari vakasakya na veesa findo fya Isaki vakaamba, “Mura yeu mmbweru.” Lyo kafishya kirori kilya irina ni Eseki, mashika elyi valekapannya nawe. 21Vakasuma kirori kyingyi, neekyo-da vakakapannya. Kakivaanga irina lya vayo Sitna. 22Kaukafo kandesuma kirori kingida, lyo ekyo mmbalekikapannya-fo. Kakifishya irina ni Rehobothi, nyelyi aleamba, “Mashika ulaalu Nndumi Iruva alluwonisya mwaanya neese lushefumbukaa urukeny, 23Kasaama ooka yoo kafika Beer-sheba.” 24Nndumi Iruva kansheya kio kilya kyeni kammbia, “Yeny ni Iruva wa ndoo Abrahamu kulaereye-fo, mashika yeny shikee neewe, neeny nshekuvikyaa mbora, neefumbuta ufyari lwafo kimaruma kya ishinga lyakwa lyo Abrahamu.” 25Kasongosia kitara kyerasya, kasenndya-u irina lya Iruva. Kavika-u yeema lyakwe, na mashinga akwe akasuma-u kirori kya mura.

Mma Nnang'ani ya Isaki na Abimeleki

26Abimeleki kooka Kerari kansora ando amwi na ngyama yakwe Ahusati, na Fikoli, nshilyi wa vasikari vakwe. 27Kyava-se inda elyi mwashisheya neeni mummaa ishisua na ishifuna kwany? 28Vakaamba, “Dede mmbo lulelollya Nndumi Iruva mmbo akee neewe;” nkyo kyimaruma lukaamba, “Lukulyisye mboo luveni, yese na yewe, lusange-se neewe.” 29Kyeyaamba llushekitanaa makasha-fo, mashika llulekupaana-fo, nta llulekutannya kindo kyingyi-fo kuuta mesha tupu, lukakura kwakweengya noofoo; newe ulaalu kukee mmbikye mbora wa Nndumi Iruva. 30Nawe Isaki kavakorya ilule lya shoonga, vakalya vakana. 31Vakakupoo ngama nraasi, vakalyiiana mboo wo veni na veni. Numa Isaki kavatauwa vakeenda na ufoo. 32Kikavaany nkonu eto mweni, mashinga a Isaki vakashemwengye mbony vakammbia, “Mbony ta kirori kilya valesuma, vakaamba, ‘Lwallollya mura.’” 33Kakifishya irina ni Shiba. Naasa irina lya muri eto ni Beer-sheba, fika inu.

Vaka va Esau va Masanga Engyi

34Kyeeri Esau eetiri myaaka makumi aana, kaora Yudithi, mfu wa Beeri, Mhiti, na Basemathi, mfu wa Eloni, Mhiti. 35Vakavavisa nnu mirima ya Isaki na Rebeka.

Currently Selected:

Mapookyony 26: MAS2

Highlight

Copy