Mapookyony 25

Ngyeeri Ingyi ya Abrahamu

(1 Fye 1:32-33)

1Abrahamu kaora nka ungyi evangwa Ketura. 2Kamwiirya Zimrani, na Yokshani, na Medani na Midiani, na Ishbaki na Sua. 3Yoshbaki kaira Sheba na Dedani; na vana va Dedani mmbo Vaashuru na Valetushi na Valeumi.

4Na vana va Midiani mmbo Efa, na Eferi na Hanoki, na Abida, na Eldaa. Ewo woose vekee vana va Ketura.

5Abrahamu kaniingya Isaki findo fyoose etiri. 6Kyeendi vana va vaka vallya vadu Abrahamu enkaa nawo kavaniinga findo fya pya, kavasamisa vauke deny alya Isaki ekai, kyeeri ekee na muu veende taari ya ngaminy, fika uruka lwa Kedemu.

Ifwa na Irikwa lya Abrahamu

7Yeti nto suku ta muu wa Abrahamu alekaa ulaniny myaka iyana makumi mfungare na iraanu. 8Abrahamu kainutwa kafwa ammikwa ukuu usha, mmiku deny, keenda isanga na vandu vakwe. 9Vana vakwe Isaki na Ishmeli vakamwaara mbangen ya Makpela kulya iremin lya Efroni wa Sohari Mhiti kulella Mamre. 10Efo ireminy llya Abrahamu alelyuura kwa Vahiti mfo Abrahamu na Sara valerikwa.

11Naasa Abrahamu ekifwa, Iruva kavikya mwanaakwe Isaki mbora. Na Isaki kakaa kufii na Beer-lahoi-roi.

Ngyeeri ya Ishmaeli

(1 Fye 1:28-31)

12Na elu llo ufyari lwa Ismaeli, we mwana wa Abrahamu ulya Hajiri Mmisri kishinga kya Sara aleirya Abrahamu. 13Na yaa nng'u marina a vana, marina awo na ngyufyari tawo.

14Apookye iwonika kwa Ismaeli ni Nebayoth, na Kedari, na Mibsamu na Mishma na Duma na Masa, 15na Hadadi na Tema, na Yeturi, na Nafishi, na Kedema, 16Yewo mmbo vana va kyuumi Ishmaeli, na yoo nng'u marina awo, efo mirin yaawo, na ando kwawo, vasongoru ikumi na vavii shaasa ngyuufyari tawo tikai.

17Na yei nnyo myaaka ya Ishmaeli, myaaka iyana makumi araru na mfungare, kainutwa kafwa, kandesanga na vandu vakwe.

18Vakakaa pookya Havila fika shuri, kulla Misri, kwisoraa shia ya Ashuru, kakaa yoo nnang'ani ya vana va maye woose.

Iwonika lya Esau na Yakobo

19Na eti nto ngyufyari ta Isaki mwana wa Abrahamu. Abrahamu mmbo aleira Isaki. 20Isaki katira myaaka makumi aana kyeeri aleora Rebeka wa Betueli Mshami wa Padan-aramu, mwana-maye wa Laban, Mshami, kava nka wakwe. 21Isaki katereva Nndumi Iruva kimaruma kya nka wakwe, mashika nnyetiri mwana-fo. Nawe Nndumi Iruva kamwirikya, na Rebeka kakufinga. 22Vana vakakapannya efo nsangeny wakwe. Nawe kaamba, “Kwankooya ni indo, a mmbusha-ki ikaa na muu?” Kavesa Nndumi Iruva. 23Nndumi Iruva kammbia,

Ni vandu vavii vakee nsangeny wafo,

Na vandu yewo vavii kusheveera, nao vakwaavaa.

Umwi ashetiraa finya ngota eto ungyi.

Na yeto mbee asherundyaa yeto n-du.

24Mikonu yakwe ya yiira ikifika, ate, mmaasa akee nsangeny mbwakwe. 25Wa mbee kaonika, nawe mmbo eedodorye, katira fii mwiiliny koose. Vakambaanga Esau. 26Elyi numa mwanao kaonika woko lwakwe lwitiri Esau tutuny. Kavaangwa Yakobo, Isaki mmbo etiri myaaka makumi arindaru kyeeri nkaakwe eera vana ewo.

Esau Akumba Ding'u Yakwe

27Vana vakang'ana, Esau kava nndu mwaasa mafisi kasa, kava nndu wa kasa, na Yakobo kawa nndu mfoo, kakaa kyeny; 28Lyo Isaki kakunda Esau mashika elyi elyaa findo efyo ewaa, na Rebeka kakunda Yakobo. 29Yakobo kakora shoonga shisha deny. Esau kasha ooka kasa, etirwa nshaa nnu. 30Esau kavia Yakobo, “Shakutereva shininga shoonga yeyo yafo shilye, mashika mmbo nkeeyuma.” Nkyo vakambaanga Edomu. 31Yakobo kammbia, “Shikumbya mbele waavi lwafo lwa mwana mmbee.” 32Esau kammbia, “Lola yeny nkufii na ifwa, waavi elu lwa iwonika mmbo lusheekyaa-ki?” 33Yakobo kammbia, “Shilyiiya mboo mbele.” Nawe kallyiya mboo, kankumbya waavi lwakwe lwa mwana mbee. 34Yakobo kaniinga Esau nkate na kifwe, nawe kalya, kana, naasa keenda, kooka alya. Ni indo Esau alemina waavi lwakwe lwa mwana mmbee.

Currently Selected:

Mapookyony 25: MAS2

Highlight

Copy