Mapookyony 24

Isaki Aruuywa Nka

1Naasa Abrahamu kava mmiku wa myaaka miingyi, na Nndumi Iruva mmbo embikya Abrahamu mbora findony fyakwe fyoose. 2Abrahamu kavia ishinga lyakwe mmiku wa mmba yakwe, yeto mwisalallya findo fyake fyoose, “Shakutereva vika woko lwafo yaa kinameny kyakwa,” 3na yeny shikulyiseeny mboo na irina lya Nndumi Iruva, akee Iruva wa iruveeu, na Iruva wa ulana, sheelyi nkusheruiyaa mwana wakwa nka auka efo vaneny va kyika va kikanaani-fo, yewo lukee nawo; 4kyeendi kweende fika urukeny lwakwa, mfo kwa vandu vakwa, kunderuuya-fo mwana wakwa Isaki nka. 5Ishinga llya lyikammbia, “Kweenda nka yeto nnyashirikyaa ishisora fika kunu-fo, a ndesa mmbo shiviraa mwana wafo nawuye kulya kuukye?” 6Abrahamu kammbia, “Kwiise, kulasheviira mwana wakwa kulya.” 7Nndumi Iruva wa iruveeu, yeu aleshiuta shauka efo mmba kwa nde, na urukeny shilewonikya, yeu erera neeny, shikee urukeny yelo shiwonikye, mmbo aleshilyisya mboo kaamba, “Uruka yelu nsheningaa ufyari lwafo, we mmbo asherumaa nsu wakwe nakwiirye mbee, neewe mmbo kusheondoyaa mwana wakwa nka ooke yefo; 8na kwakooya nka yeto alema ikusora, naasa, mboo yei yakwa ishetarakanaa; lyo kulaviire mwana wakwa efo-fo.” 9Ishinga llya lyikavika woko lwakwe yoo kwasi ya kinama kya Abrahamu nndumi wakwe, kallyiya mboo kya mbony yeyo.

10Naasa ishinga elyo lyikaipoo ngamula ikumi tuuka efo ngamulen ta nndumi wakwe, keenda, mashika masaa moose a nndumi wakwe mmbo ekee ushilyiny lwakwe, kakwiipoo, kandefika Mesopotamia, kafika muriny wa Nahori. 11Kavavasya ngamula tifiirye ndi yoo kipoo ya muri kufii na kirori kya mura kwikee kyeeri kya nkwaany, ekyo nkyo kyeeri vaka vekeenda iraa mura. 12Nawe kaamba, “Woi Nndumi Iruva, Iruva wa nndumi wakwa Abrahamu, sheekya mbony takwa tive ta pule inu, kulillye nndumi wakwa Abrahamu, 13lola mmbee, mmbo shiselelyi yaa kiroriny kya mura, na vaka va yefo muriny mmbo vakeesha iraa mura, 14naasany kiveny indi, Mwana wa kyika yeto nshemmbiaa, ‘Kurwe nungu yafo, shakutereva, shini mura,’ nawe naambe, ‘Kuniiye yewe, kwammaa shiniinge na ngamula tafo’, naasa naveny mmbwe yeto kwamuusauya kishinga kyafo Isaki; na kikammba indo shimanyi mmbo kwanlyillya Nndumi wakwa Abrahamu.” 15Naasa nalandemaa irera, ate Rebeka ansha nau, ni mfu wa Betueli mwana wa Milka, nka wa Nahori ulya mwanamaye wa Abrahamu, nawe arie nungu aivikye yoo yeveeny lyakwe. 16Nawe ni mwana wa kyeny nsha nnu asennyi, alandekee na nndu Nndumi tara. Kaoloka kulya kiroriny kaishura nungu, kasaama. 17Naasa ishinga llya lya Abrahamu kaangusya indemmbwarya, kammbia, “Shakutereva shirita mura yeto, wafo mwaangu shini.” 18Nawe kammbia, “Kuniiye mmbee,” kakurua nungu swany, kanrita, 19Ekimaa inrita kaamba, “Na ngamula tafo-da nshetiraiyaa, kutani timaa ina.” 20Kaangusya kapusuya mura kiiyeny kingyi, kaangusya yooloka kulya kiroriny, karaiya ngamula tilya takwe toose. 21Naasa nndu ulya kammbikya miso swaa, kamalallya sau, nalole kwakooya Nndumi Iruva ammbikya kyaaro kyakwe mbora ao wode. 22Naasa elyi, ngamula tammaa ina, nndu ulya kaipoo nrashi ya sahabu, kyeeso kya vayo kyenga kya shekeli, na fishaashi fivii maakony tekee shekeli ikumi ta saabu, 23Kaamba, “Kukee mwana wavi ro-ma? Woi ma-dwa shivia. A ndesa kwiifo mwaanya efo mmba kwa ndoo luwoni ando a ikaa kyaangu?” 24Kaamba, “Yeny ni mfu wa Betuel mwana wa Milka aleirya Nahori.” 25Keengera immbia, “Kweru kwiiyo mare na ure usha lwayiisa na ando kwekaa veny.” 26Nndu ulya kafiirya ndi kainndya Nndumi Iruva. 27Kaamba, “Nndumi Iruva naarafumwa, Iruva yeto wa nndumi wakwa Abrahamu, yeto nalandere isarya lyakwe na dede yakwe kwa nndumi wakwa. Nndumi Iruva kashitetera na yeny yefo shia kutani shafika kyeny kwa va ufyari lwa nndumi wakwa.”

28Naasa mwana ulya wa kyeny karisha, kandevia vandu va kyeny kwa maye mbony yeto. 29Na Rebeka etiri mwana-maye avangwaa Laban. Laban karisha swany kasora nndu ulya alya kiroriny. 30Kyeeri kilya alelollya nrashi ilya, na fishaashi filya maakony a mfwa-maye, keeta na marero a Rebeka mwana-maye, kaamba, “Niindo nndu yeto ashivia, naasa kasora nndu yeto, kankooya eeselelyi kufii na ngamula alya kiroriny.” 31Kaamba, “Osho, yewe Nndumi Iruva akuvikya bora nkikyi elyi kwasalaa poo? Mashika shammaa ideesya mmba, na ando kwa ngamula nato.” 32Nndu ulya kaanga mmba, kaporomwa ngamula, nawe katiniinga mare na shoonga, kaniinga mura wesangya marende, na vandu valya veriani nawe.

33Kadeesyo shoonga, lyo kaamba, “Nshilyaa-fo kutani sharera mbele.” Kavio, nkisha rerany. 34Kaamba, “Yeny ni ishinga lya Abrahamu, 35na Nndumi Iruva mmbo avikye nndumi wakwa mbora nnu, kava nndu nsuri, kanninga moonri, na ng'umbe, na fesa, na saabu, na mashinga, na fishinga, na ngamula na mishungu.” 36Sara nawe, nka wa nndumi wakwa, kairya nndumi wakwa mwana va kyuumi wa ukuuny lwakwe; nawe kanrambikya fyoose atiri. 37Naasa nndumi wakwa kashilyisa mboo kaamba, “Kularuuye mwana wakwa nka kumuuta kwa vakanaani-fo, mmbo ewo shikee, nawo kunu. 38Mmbo kusheendaa kufike urukeny lwa nde, mfo kwa vandu vakwa, kundeutya-fo mwana wakwa nka.” 39Shavia nndumi wakwa, “Kweenda nka yeto nnyashiirikyaa yeenda neeny-fo.” 40Kashivia, “Nndumi yeto yeny shiselelyi mbee yakwe mmbo asherika nsu wakwe neende neeny, nashiidimisye, neewe kushewonisya mwana wakwa nka auka kwa vandu vakwe, na va mmba ya nde.” 41Llyo mboo yafo isheinutywa elyi kusheshaa kwa vandu vakwa; na kwakooya vashekwiimaa mwana yeto wa kyeny, mboo yeyo yafo nnyisheinutywa-fo. 42Llyo inu shasha alya kiroriny, shaamba, “Woi Nndumi Iruva wa nndumi wakwa Abrahamu, kwansheekya inu shieny yakwa 43lola mmbe, shiselelyi kufii na kirori kya mura, kikuviiyeny indi, mwana wa kyeny yeto ashaa shimmbie, shakutereva shiniinga mura na nungu yeyo yafo shine, 44na shivie, ‘Na yewe na ngamula tafo nshetiraiyaa, yeto nave mmbwe nka Nndumi Iruva ammaa ideesya nsero va nndumi vakwa.’” 45Nta kulaore shammaa ikusara indo yefo nriminy wakwa, ate na Rebeka ansha, na nungu yeeveny, lyakwe. Kaoloka yefo kiroriny karaa mura. Neeny shammbya, “Shakutereva shiniinga mura shini. 46Kaangusya kakurwa nungu ilya, kaamba, ‘Kuniyye, na ngamula nato nshetiningaa.’” Naasa shana, kaniinga na ngamula nato. 47Naasa shammbesa, “Yewe ni mfu wa vi?” Nawe karouwa kaamba, “Yeny ni mfu wa Betueli wa Nahori, Milka alemwiirya. Neeny shammbikya fipulyi mbueny na fishaashi efo maakony. 48Shakwinyika shaindya Nndumi Iruva, shaarafuma Nndumi Iruva, wa nndumi wakwa Abrahamu aleshitetera shieny, shionisye mwana wa nndumi wakwa nka auka kwa vandu vakwe. 49Naasa, kwakooya mukundye itannya nndumi wakwa isarya na dede, mushivie; kilammba indo, shivieny; shiindukye oko usha ao umuso.” 50Llyo Laban na Betueli vakarouwa vakaamba, “Irero elyi mmbo lyauka kwa Nndumi Iruva, neese nta llushidimaa ikuvia irero isha nta ikasha-fo.” 51Lola, Rebeka eto ekaka-u yaa mbee yafo, mwipoo kweende nawe nandeva nka wa mwana wa nndumi wafo, shaasa Nndumi Iruva aleamba. 52Llya ishinga lya Abrahamu lyileita marero awo, kakwinyika kafika-si mbee ya Nndumi Iruva. 53Naasa ishinga elyo lyikauta samana ta fesa, na ta saabu, na soori, kaniingya Rebeka; na findo fiingyi fya uuru kaniinga mwana-maye na maye-da. 54Vakalya vakana, we na yewo veriani nawe, nawo vakakaa-fo kio. Vakakupoo ngama, nawe kaamba, “Shitauweny shiwuye kwa nndumi wakwa.”

55Mwana-maye na maye vakaamba, “Mwana yeu wa kyeny nakee yaa ando a mikonu ikumi nsi numa naendeny.” 56Nawe kavavia, “Mulashikyeise-fo, lyo Nndumi Iruva anshiirikya kyaarony kyakwa, shitauweny sheende kwa nndumi wakwa.” 57Vakaamba, “Ra luvaange mwana yeto va kyeny lumbese we muni.” 58Vakavaanga Rebeka vakammbesa, “A ndesa kusheendaa na nndu yeu?” Karouwa, “Yeenshendaa.”

59Naasa vakeekeya mfwa-maye waawo, na mweeri wakwe, na ishinga lya Abrahamu, na vandu vakwe. 60Vakavikya Rebeka mbora vakammbia, “Mfwa-maye weeru, ‘Kuwe maye wa fiku ikumi ka fiku fiingyi, na va ufyari lwafo vashetira ando a yewo vavasuuye.’” 61Rebeka kakwiipoo ando amwi na fishinga fyakwe, vakasaama ngamula, vakasora nndu ulya. Na ishinga elyo lya Abrahamu lyikaipoo Rebeka kaenda nawe.

62Isaka kasha ooka Beer-lahai-roi, kakaa yefo Negebu. 63Isaki kasomuka neende yefo mbuveny nkwaany eekusara-sara, keepoo miso kalollya ngamula tikeesha. 64Rebeka nawe kaipoo miso, kalollya Isaki, kaoloka kulya ngamuleny. 65Rebeka kavesa ishinga llya lya Abrahamu, “A mbovi ulya kulya mbuveny akeesha ashelwaambyaa? Ishinga lilya lyikammbia,” “Yeu mmbwe nndumi wakwa.” Naasa kaipoo soori yakwe kakutuullya.

66Ishinga lilya lyikavia Isaki findo fyoose lyiletana. 67Isaki kawarya Rebeka neemwaata yefo yemeny lya maye, Sara, kava nka wakwe, kankunda; Isaki kawuiyo mmu mashika llya enfiiyo mmaye.

Currently Selected:

Mapookyony 24: MAS2

Highlight

Copy