Varome 9
9
Iruva na Vasauwe vakwe
1Mmbo nkerera kya dede shikee na Kristo, nshireraa wongo-fo, nrima wakwa wiishitikaa shikaayo ni Mumuyo Mweele, 2kyeyaamba mmbo shitirwa nting'wa niini neevavyo nriminy wakwa. 3Mashika sheshiidimaa itereva yeny shimuni shimamitwa na irauwa na Kristo kimaruma kya vandu vakwa, vanavama kwi ngata ya mwiili. 4Mmbo Vaisraeli yewo, vatiri ngata ya iva vana, na itumbe llya, na fyaasa, na iningyo uvavaso, na miindye ya Iruva, na mma yakwe, 5nawo mmbo vasaawoye veru, neefo kwawo mfo Kristo aleuka kwi ngata ya mwiili. Mmbwe yeto akee uwe ya findo fyoose, Iruva, akee mwiitikiswa llung'anu, Amen. 6Nshi sheelyi Irero lya Iruva mmbo lyammukau-fo, mashika woose nshi Vaisraeli yewo vakee vana va Israeli-fo. 7Nta woose yewo vakee vana va Abrahamu nshi vana-fo, kyaindi, kyeendwa ni Isaki vana vakavaangwa; 8nkyo kyaamba, nshi vana kwi ngata ya mwiili vakee vana va Iruva-fo, ni vana valya va kyaasa vakeekenwa mmbo vana. 9Mashika irero lya kyaasa llyo elyi, “Kyeeri sha eki shiwuyaa, na Sara ashewonisaa mwana.”
10Nta nshi indo-da-fo, Rebeka nawe ekimaa ikufinga kyeendwa ni mmi wakwe, we Isaki nde weeru, 11mashika vana yewo valandewonika, ao nta valandemanya itana mesha ao makasha, naambo shaasa Iruva ensauwa we muni kive, nshi kwa isora mashora-fo, indi nshaasa we muni yeto mwivaanga akundye. 12Mmbo evio indi, yeto nniini mmbo asherundya yeto n-du. 13Shaasa kikee kireiye kyeyaamba, “Mmbo shakunda Yakobo, lyo we Esau shansua.” 14A lwaambe-ki? Iruva atiri ukasha? Oode! 15Mashika mmbo eviiye Mose, “Mmbo nshelyillyaa yeto shikunndye illyillya, neesarya yeto shikundye insarya. 16Naasany kwankooya ni indo, nkyiriani na wiidimi lwa ulya akundye-fo, nta lwa ulya mwikutakura-fo; kyaindi kwi wiidimi lwa ulya mwillyillya, mmbwe Iruva.” 17Mashika areiye indi kya Farao, “Kimaruma shilekusaleesa-u ni ekyi, naambo shikoore yewe finya yakwa, na irina lyakwa lyivambiswa urukeny koose.” 18Kyasiany, kwakooya niindo, yeto akundye illyillya mmbo allyillya, neeto akundye imuumisya ngoo, kamuumisya.
Unyafi na Isarya lya Iruva
19Naasany, kulakooye kushivia, A nkikyi elyi ekeeyuutya vengyi uvingo-da? Mashika lyo mmbi ashidimaa iwakyana na ekyo akundye? 20Oode, nkivaa-fo nndu wakwa. Mmbi yewe-ro kwiidimi irouwa Iruva? A kindo kyuumbe kiidimi ivia yeto alekiumba, “Nkyiki elyi kuleshiumba indi?” 21A yeto mwiumba findo fya uteri atiri-se finya na uteeri na imbumba lyimwi lya uteeri nasongosye nalyo kiiya kitiri nnduma na kyingyikilatiri nnduma? 22A niindaany, kwakooya Iruva elyi atirwa ni unyafi, na yoora wiidimi lwakwe, na usisiryo uniini, mmbo aleva mwiisisirya fiiya filya fyeora unyafi fikee fivike fyesisya vandu. 23Na lyingyi naambo naore paa uniini lwa itumbe lyakwe efo fiiyeny filya fyelyillya, alefivika-fo uka elyo mbee naambo fiwoni itumbe. 24Mmbo yese aluvaangye, nta nshi Vayuda-da-fo, kyaindi na vandu va masanga woose. 25Nshaasa alerera kulya kwa Hosea kyeamba,
“Mmbo nshevaangaa vandu valya kulaore vekee vandu vakwa,
‘Na nkunde wakwa yeto kulore ekee nkunde wakwa.’
26Na mmbo kishevaa ando alya valevio,
‘Yeni mmukee vandu vakwa-fo.
Ng'u vashevaangywaa vana va Iruva yeto muni muu.’ ”
27Isaya nawe kaonisa unyanga lwakwe kya Israeli, kaamba, “Yeekena lya vana va Israeli, na kikava nsha nsanga wa yeeveny, ni nsaaro wawo mweni vashekirwaa. 28Mashika Nndumi mmbo asheinutyaa irero lyakwe kunu urukeny, namaa neerummbwa.” 29Nshaasa llya Isaya alesongwa yaamba, “Kukooye kulaore Nndumi wa matorito alelureeya ufyari, mmbo lwevaa sha Sodoma, luvevakaniswa na Gomora.”
Vaisraeli na Mbony Shisha
30A lukaambany inda ulaalu? Nsheelyi vandu va masanga, valaishi usumanu, lyo vakaonisa usumanu; lyo ni usumanu llwa lumye iirikyony. 31Lyo Vaisraeli veni uramba llwa lwa usumanu mbaleidima ikooya usumanu-fo. 32A nkikyi ndesa? Mmashika elyi kulaore valesara efyo kwa shia ya iirikyo, lyo vakasora na ngata ya mitannyi. Vakawona nsindara yoo iweny llya nsindara, 33shaasa kilereiyo kyeyaamba,
“Lola-te,
nkeevika iwe lyepaaya alya Sion,
na iwe lyeetuula.
Neeto moose ashemwiirikya nnyashesutwaa-fo.”
Currently Selected:
Varome 9: MASNT00
Highlight
Share
Copy
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.
