Varome 10
10
1Vanavama vakwa, kindo shilangye nnu deny nriminy wakwa, na kiterewo kyakwa shiterevaa Iruva kimaruma kyawo, naambo vakooye ikirwa. 2Mashika lyo shiishi sheelyi vatiri usau kimaruma kya Iruva, lyo nshi kya urango-fo. 3Mashika lyo vekee indo valaishi usumanu lwa Iruva, lyo vekundye yoora usumanu lwawo veni, mbalekunyisya efo usumanuny lwa Iruva-fo. 4Mashika Kristo mmbwe aleinutya uvavaso, naambo wo nndu akusirya-u nakooye yeekennywa usumanu.
Ukiro kwa Woose
5Na Mose nawe kareiya kya usumanu yelo lweendwa mavavaso, kaamba, Yeto mwiinutya efyo mmbo ashekaa na muu kimaruma kya vayo. 6Kyaindi usumanu lulya lwaendwa ni iirikyo, mmbo lwaamba indi, Lola kulasheamba nriminy wafo, Ni vi yeto ashesamaa iruveeu? (nkyo ni yoolota Kristo si), 7ao, Ni vi yeto ashoolokaa nafike kwa vafu? (Nkyo ni isaamisa Kristo uwe, nooke kwa vafu). 8Lyo mmbo aamba inda? Irero llya mmbo lyikee kufii neewe, yoo kaniny kafo, neefo nriminy wafo; llyo irero llya lya iirikyo lukeelyivambisa. 9Mashika kwairikya Yesu na kana kafo sheelyi ni Nndumi, neekusiryau efo nriminy wafo sheelyi Iruva alennruta kooka kwa vafu mmbo kushekoyaa ikirwa. 10Mashika nndu mmbo erikya na nrima kutani awonisa usumanu, na iirikya eereraa na kana kakwe muni kutani awonisa ukiro. 11Mashika mareiyo aamba, “Yeto moose ashenkusiryaa nnyashesutwaa-fo.” 12Mashika nkwiyo kilakaniso nnang'ani ya Myuda na Mgriki-fo. Mashika we ni Nndumi wa woose, araiye simbo kwa woose yewo vemmbaanga. 13Mashika, wo nndu yeto ashevangaa Nndumi mmbo ashekirwaa. 14A mmbo vashevangaa inda yeto valamwirikye? Na lyingyi, mmbo vashiriikyaa inda yeto valandemwiite? A mmbo vamwiitaa inda valatiri mwiwoongoya? 15Na lyingyi mmbo vavambisaa inda irero, valanderumwa? Nshaasa da kikee kireiye, Apaa shaasa marende awo asenyi yewo veevambisa Nrumi Shisha!
16Kyaindi nshi woose valewarya Nrumi ilya ya Nsia-fo. Nshaasa Isaya aamba, A Nndumi, ni vi alewarya nrumi yeeru? 17Kyasiany, kikusiryo kimayeny kya vayo ni iita, na iita mmbo lyishee na irero lya Kristo. 18Indi mmbo shaamba, A wo mmbo kulaore valeita? Yee, valeita.
Unyanga lwawo mmbo lulekwaana ulaniny koose,
na marero awo fika fishingony fya ulana
19Kyaindi mmbo shavesa, Vaisraeli wo valemanya-se? Mbele Mose mmbo aamba,
“Mmbo vashelolyaa kififi kyeendwa ni vandu valakee vakwa,
kimaruma kya vandu valaishi shivaengye itafukwa.
20Na Isaya atiri ukaari uniini,
nawe aamba indi,
Mmbo shilelollyo ni yewo valekeeshiruuya
shamanyika paa ni yewo valakeevesa mbony takwa.”
21Lyo kwa Israeli kaamba, “Nkonu moose mmbo shileoroya vandu valashiirikyaa vakee filemi maako akwa.”
Currently Selected:
Varome 10: MASNT00
Highlight
Share
Copy
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.
