Marko 6

Yesu aminwa kulya Nasareti

(Mat 13:53-58; Luk 4:16-30)

1Nalyo kawara shia kooka kulya akai, kandefika kulya muriny kundo alelelyo. Na valya vakiloshyony vakeenda varyani nawe. 2Naasa elyi kwamfika nkonu wa Sabato kapooka ilosha efo mmba yeeterevya. Na valya vearanya veefo veengyi. Nawo vakaising'ang'a, vakaamba, “A nyira nndu nkwi yeu autye mbony yeto na urango yelo? Na mitannyi yeyo ya wiidimi ya ngata yeyo ikavetanyika na maako akwe! 3A nndu yeu nshi ulya eepashaa firi, akee mwana wa Maria na mwanamaye wa Yakobo na Yose na Yuda na Simion? Na vamfwamaye nshi vavekee kunu kweru?” Naasa vakava mmbo vawonisaa nsindara efo kwakwe. 4Nalyo Yesu kavavia, “Nndu nkisuku nkwii-fo kundo aminwa, kulaore ni efo muriny kundo alelelyo na efo kwa vandu va ufyari lwakwe na efo kyeny kwakwe-fo.” 5Nawe nta nalaidimi itana-fo kindo kya wiidimi-fo, kulaore ni vandu vanana vaangu alevaekerya maako kavashiisa. 6Nawe katambiswa elyi valema indo ikusirya-u. Nalyo kava mweenda iira-ira efo miriny midu isengetye-u na ilosha-fo.

Yesu aruma vakiloshyony ikumi na vavii

(Mat 10:5-15; Luk 9:1-6)

7Nalyo kavaanga valya ikumi na vavii vashekuummbya yoo akai. Kavaruma vavii vavii. Kavaniinga ushilyi lwa iitorya mimuyo ya utefusu. 8Kavavavasa valakamare kishau kulaore ni nsengye mweni, nta kishau-fo, nta mboloko-fo, nta pesa ta efo ukoveny lwa kisiny-fo. 9Kavavia, “Mmbo musheendaa muree fyaaru fya kisima. Nta muleende muree soori ivii-fo.” 10Kawuya kavavia, “Wo kundo mwamaanga mmba ya nndu, kaeny-fo mutani mwauka kundo eko. 11Na wo ando mwanra mulawarywa nta yaaranywa, ukeny-fo mwiikakapaa kilulyi kya marende any, kive ukureeki kwawo.” 12Nalyo vakawara shia vakandekapa weele lwa ivia vandu vaalashike efo nriminy. 13Nawo vakaanta mimuyo mikasha miingyi. Na vandu valwee veengyi vakavaamba mafura vakavashiisa.

Ufu lwa Yohane Mmbatisi

(Mat 14:1-12; Luk 9:7-9)

14Nalyo mangyi ilya Herode kaita mbony ta Yesu, neelyi irina lyakwe lyeenngye nnduma nawe kaamba, “Ate ni Yohane Mmbatisi, annduka ooka kwa vafu. Nkyo kimaruma finya yeto teetana fya wiidimi tikarunda kwakwe.” 15Naasa vengyi vakaamba, “Ni Elia.” Vengyi vakaamba, “Ni nndu mwauya fisuku akee wa ngata imwi na vakisuku valya va mbee.” 16Naasa elyi Herode aita kirerwaa indo, kaamba, “Ni Yohane ulya shilenrummbwa nrwe, mmbwe alewuya iruka.” 17Nyelyi we Herode muni enruma vandu vaende itira Yohane, kamweera efo mmba ya vafingwa kimaruma kya Herodia ulya ekee nka wa mwanamaye we Filipo, emmurwaa. 18Mashika Yohane evia Herode, “Nkutiri mumu weerwaa nka wa mwanamau-fo.” 19Naasa Herodia kakaa ellyie iyoo. Kavekunda na imbwaa; nalaidimi. 20Neelyi Herode eereiye Yohane eeishi ni nndu nsumanu kaveva mweele. Kakaa anringaa. Kava mumwiirannya kavefulukywa keengyi. Kawuya kavekunda imwaarannya-da. 21Nalyo kukawonika nkonu utiri mwaanya nsha, nyelyi kwamfika nkonu weekummbwa Herode alewonika. Kaniinga vangyama takwe shoonga na vashilyi vakwe va fira valya vaniini, na vandu va nrwe va kulya Galilaya. 22Nalyo mwana ulya wa kyeny we Herodia kaanga nafo kashefina, kasennya Herode na valya akee nawo efo shoongeny. Naasa mangyi kavia mwana ulya wa kyeny, Shitereva kindo kwankunda, na yeny nkuniingaa! 23Kavellyiiya mboo eshaambaa, “Kindo kwankuterevya nkuniinga-da, na kikava kyenga kya umangyi lwakwa.” 24Nawe kasomuka-fo kandevia maye, “A shatereva ki ndesa?” Nawe kaamba, “Ni nrwe wa Yohane Mmbatisi.” 25Nalyo yeni kaanga na efo mangyi akai ashaangusyaa, katereva kaamba, “Mmbo shakunda kushiniinge nrwe wa Yohane Mmbatisi ulaalu indi, ushe uriwa ni nndeeva.” 26Nalyo mangyi kasokywa m fyoova deny, indi kimaruma kya veny valya na valya akee nawo alya shoongeny nalakunde imwiima. 27Nalyo mangyi karuma umwi wa vasikari vakwe venringa, kammbavasya nandeende nrwe wa Yohane. 28Nawe keenda kandenrummbwa nrwe efo mmba ya vafinge, kasha aurie na nndeeva, Kasheniingya mwana ulya wa kyeny. Na mwana ulya wa kyeny kandeurwaaya maye. 29Naasa valya vakiloshyony vakwe vakaita mbony tilya, vakasha nafo vakaipoo nnying'a ulya wakwe vakawaara mbangeny yeerika.

Yesu awuutisa vandu fiku firaanu

(Mat 14:13-21; Luk 9:10-17; Yoh 6:1-14)

30Nalyo valya vakiloshyony vakasha ikuummbya alya Yesu akai, vakamoongoya filya valetana na ilosha. 31Nawe kavavia, “Oshony yeni muveni mweende kyaanya kyany mukooye iimuya-u kyaangu!” Mashika mmbo neelyi vandu vee-fo veengyi veshaa na yeenda nawo nta valaoni mwaanya weelya shoonga. 32Vakakwiipoo-fo vakeenda ando kulalelwa, variwa nngalava, vakaefo kyaanya kyawo. 33Nalyo vandu valya veefo veengyi vakavalollya vesheendaa, vakamanya mmbo. Nawo vakeenda na marende veerisha wooka miriny myoose vandekuummbya kulya arie yeenda. Vakasonngwa ifika-fo ngota wo. 34Naasa elyi aoloka ngalaveny kalollya kwankuummbya-u mamwiingyi wa vandu. Nawe kavatinywa nyelyi vakee sha mburu tilatiri mwiisi. Kapooka ivalosha mbony shiingyi. 35Naasa elyi nkonu wameenda nnu valya vakiloshyony vakwe vakasha na yoo akai, vakaamba, “Yaa lukai ni kasa, na nkonu wameenda nnu. 36Vasami veende kulya mareminy na miriny ilya iringitye na kulya fimuriny vandekuurya-fo fyeelya.” 37Nawe karouwa kavavia, “Vaniingeny yeni kyeelya!” Vakammbia, “A mmbo kwakunda lundeura mikate ya fesa mayana avii, lushevaniinga valye!” 38Naasa kavavia, “A mikate mutiri ni yiinga?” “Endeloleny-te.” “Ni iraanu iifo, na makunda avii.” 39Nawe kavavavasya vakwaale si woose efo mareny vakae mboto-mboto. 40Vakakaa rembo makumi araanu araanu. 41Nalyo kawarya mikate ilya iraanu na makunga alya avii, kalola efo iruveeu kaarafuma Iruva. Kafisha-fisha mikate ilya fyenga fyenga, kaniingyany valya vakiloshyony vandeavya vandu wo nndu kyakwe. Na makunga alya avii kavaavya woose. 42Vakalya woose, vakauura. 43Vakaveipoo na fipereshu mikusha ikumi na ivii, 44Na valya valelya mikate ilya vafye sha womi fiku firaanu.

Yesu eenda uwe ya mura

(Mat 14:22-33; Yoh 6:16-21)

45Nalyo yeni kaitika vakiloshyony vakwe vaange na efo ngalaveny vasongwe yeenda vanderuuka na kwakulya ya Betisaida, nawe nasami mbele vandu valya. 46Nalyo elyi ansamana nawo kakwiipoo kaenda ando a ifumbuny nandeterevya-fo. 47Naasa na elyi kwamiila ngalava ilya yamfika efo yeeveny nnang'ani, nawe akee kulya kwaarutu we muni. 48Nalyo alollya vaona ngatara yeerwaa ngalava na mbee, mashika uraato lwesumani nawo. Naasa elyi kwafika ikamba lyeeringa kio lya kaana, nawe kafika yoo vakai ashiiraa yoo uuwe ya yeeve ilya, kakunda ivaira na mbee. 49Naasa vekillollya ashiiraa efo uuwe ya mura, vakakusara kulakooye nkirishe, vakafua wui. 50Neelyi vallollye woose vakaising'ang'a. Naasa nalyo yeni karera nawo, kavavia, “Wuiyony mmuu, ni yen-te! Nta mulairyae!” 51Nalyo kasaama na efo ngalaveny kundo vakai. Uraato lulya lukamalallya sau. Nawo vakoomany mwaangaya efo miriminy yaawo. 52Mashika kya mikate ilya walandekiitumuso-fo na ngoo tawo tilakummbwe.

Yesu ashiisa vandu kulya Genesareti

(Mat 14:34-36)

53Nalyo vakaruuka na kulya kwakulya kwaarutu, kulya Genesareti, vakanangyi sya-u ngalava ilya. 54Nalyo yeni elyi vamooloka wooka efo ngalaveny, vandu vakammanya mmbwe, 55vakaenda na ngeta, vakanderingitya uruka lulya loose. Vakapooka indeipoo valya valwee variwa mfitara, vakasengetya-sengetya nawo wo ando vamiita akai. 56Na wo ando amaanga nafo a efo fimiriny, ao miriny, ao efo mmba, vakashevika yewo valwee efo singireny vakanterevany vapaani naakwa ni ikyedu lya soori yakwe ya yeerya. Na yewo vampaana vakaveshia woose.

Currently Selected:

Marko 6: MASNT00

Highlight

Copy