Marko 5

Yesu ashiisa nndu atirwa mmumuyo nkasha

(Mat 8:28-34; Luk 8:26-39)

1Nalyo vakafika kulya kwa kulya ya yeeve ilya kulya urukeny lwa Vagerasi. 2Na elyi amooloka efo ngalaveny nalyo yeni nndu kasha ikwaannya nawe atirwa mumuyo nkasha, auka kulya mbangeny ta vafu. 3Nawe efo mbangeny tilya ta vafu nng'u aaluye kyeny kwakwe, nta kulaiyo nndu aidima imfinga na nse.

4Mashika mmbo enkapywa minya keengyi na ifingwa na mise. Nawe karummbwa mise ilya na minya tilya katifisha-fisha. Nta kulakae-fo nndu aleidima imbinga. 5Nawe kyeeri kilya kyoose mmbo eekaa efo mbangeny ta vafu na efo mafumbuny. Kava moongora-fo kio na nsanyiny na ikumanya-manya na mawe. 6Naasa kalollya Yesu aifo ashaa akee kwaasha. Nawe kanrishya kandemoolokya si. 7Kafua na unyanga waasha kaamba, “A nkyoki kukundye neeny, yewe Yesu, kukee Mwana wa Iruva yeto akee uwe ya findo fyoose? Shilyiiyaany mboo-te, swa Iruva, kwakooya kulasheshiturwa!” 8Nyeeli we arie immbya, “Yewe mumuyo nkasha uka nndu yeu.”

9Nalyo kammbesa, “A irina lyafo ni yewe vi?” Nawe kammbia, “Irina lyakwa ni itorito. Mashika elyi lukee veengyi.” 10Naasa kamfuuya kyuumu nalasheevarika kwaasha valakani na uruka lulya. 11Naasa nang'u kwiifo kushiiswaa ironda iniini lya nguve alya usambalo lwa ifumbu lilya. 12Vakantereva vakaamba, “Lurike lundeanga nguve yeto.” 13Nawe kavaninga mumu. Nalyo mimuyo ilya mikasha ikasomuka-fo, ikaanga nguveny tilya. Naasa ironda lilya lyikooloka lyirishaa na efo waangeu, lyikandesiiya efo yeeveny ilya. Nalyo lyefikye fiku fivii. Tikafumbwa mmura efo yeeveny.

14Nalyo valya vetiisaa vakarisha vakandevia vandu va efo muriny na va efo mareminy, mbony tilya vandu vakeenda vandelola kindo kilya kyatanyika vamanyi mmbo kikee inda. 15Vakafika alya Yesu akai. Na ulya etirwa mmumuyo nkasha vakallollya akee rembo, ammeeraa soori, mmbwe ulya eetirwa mmatorito alya. Nawo vakairyaa. 16Na valya valollya nndu ulya wa mimuyo mikasha shaasa atannywa, na kilya kya nguve tilya vakawoongoya mbony eto. 17Vakapooka imooshora nakwiipoo nooke efo myuungony yaawo.

18Nalyo elyi eefo asaamaa na efo ngalaveny, nndu ulya etirwa mmimuyo mikasha kasha intereva nakukaye nawe. 19Nawe nalamwiirikye, kammbia, “Enda kulya kyeny kwafo kwa vandu vafo kundewoongoya ekyo kiniini kyoose shaasa Nndumi akutannya na ikulillya ukiva lwafo.” 20Nalyo kaenda kapooka indekapa weele efo kwa vandu va uruka llwa lwa miri ikumi (Dekapoli) evaviaa kilya kiniini Yesu alentannya kyoose. Vakasongololo woose.

Mwana wa Yairo na nka umwi vashiiswa

(Mat 9:18-26; Luk 8:40-56)

21Nalyo Yesu kawuya karuuka lyingyi na kulya kwakulya eeriwa nngalava. Vandu vakasha ikuumbya alya akai mamwiingyi ung'ani. Nawe akee efo mbaambaa ya yeeve ilya. 22Kukasha nau nndu akee umwi wa yewo vekallya mmba ya iterevya. Na irina lyakwe ni Yairo. Allolya kooloka si yoo marendeny akwe. 23Kamooshora kyuumu, kaamba, “Kimwana kyakwa kya kyeny kiifo kifwaa mbee. Neewe kundany mbee indemweekyerya maako, nakooye ikirwa na iwona muu.” 24Kaenda nawe na vandu vakallatya mamwiingyi ung'ani, vakansisira. 25Nalyo kweifo nka elwee ndwari ya kyika ando a myaaka ikumi na ivii. 26Elyiswaa ukiva wiingyi ni vaanga veengyi, emmaya-fo na findo etiri fyoose, nta kilammbukye-fo kindo, kaveenda asheengeraa iva nnana tupu. 27Naasa elyi amiita mbony ta Yesu kasha numa akusurummyi efo mamwiinginy ulya, kapaana soori yakwe ya yeerya. 28Nawe kaamba, “Kwakooya shapaana naakwa ni soori ta yeerya, mmbo nsheshiaa tupu.”

29Nalyo yeni kishoru kya ndwari ilya yakwe ya kyika kikamanda. Kaita efo mwiiliny wakwe mmbo ankyia kilya kyeeke ntuurwa. 30Nalyo yeni Yesu kamanya efo nriminy mmbo ambukwa mfinya. Kainduka akee efo mamwiinginy wa vandu, kaamba, “Ni vi apaana soori takwa-ro?” 31Valya vakiloshyony vakwe vakammbia, “Kulollye mamwiingyi yeu wiikusisira-sisiraa Neewe kwawuya yaamba, mmbi ashipaana?” 32Kavavikya miso nakooye ilollya ulya ampaana. 33Naasa nka ulya kasha nau atirwa mmbweerei na irerema ameemanya na kilya kyammbutikya, kakweera si yoo akai kamoongoya kya dede kilya kyoose shaasa kyeenda. 34Nawe kammbia, “Mwana-kwa elyi kwankusirya-u indo nkyo kyakukyira. Kweengye na ufoo, kuveva nndu ammeeshia ekyo kyeekulyisaa ukiva.”

35Naasa elyi eefo areraa indo kukasha nau vandu wooka kulya kyeny kwa ulya mwiikallya mmba yeeterevya. Vakaamba, “Mwana yeto wafo amfwa. Nkikyi elyi kwaatara-se llosha yeu?” 36Naasa Yesu kaita kirero kilya kyaambawa, kavia ulya mwiikallya mmba yeeterevya, “Nta kulairyee! Kusirye-u tupu!” 37Nalyo nta nalalekeye nndu nallatye neende nawe-fo kulaore ni Petro na Yakobo na Yohane we mwanamaye wa Yakobo. 38Vakafika kulya kyeny kwa ulya mwiikallya mmba yeeterevya. Kalollya-fo vandu vekapaa ufullwe na kiiyo na irorongya kyuumu. 39Nawe kavavia, “Nkyiki elyi mwakapa indo ufullwe na iiya? Kimwana yekyo nshi kifiiye-fo, mmbo kilele rony.” 40Nawo vakanseka. Naasa we muni kaanta-u woose. Kakamara ndeye wa kimwana kilya na maye na valya aryani nawo. Kaira na efo kundo kimwana kilya kikai. 41Katira kimwana kilya woko kakyivia, “Talita kumi!” Nakyo kwaallwa kyikee sheelyi kyaambawa, “Mwana shakuvia kwiipoo!” 42Nalyo yeni kimwana kilya kya kyika kyikakwiipoo, kyikapooka irua-rua, nawe emaye myaaka ikumi na ivii. Nalyo yeni vakauma mwangaya. 43Nawe kavavavasa kyuumu kindo ekyo nndu nalakooye ikimanya. Kaamba kimwana kilya kiniingwa shoonga.

Currently Selected:

Marko 5: MASNT00

Highlight

Copy