Marko 4

Kyaaso kya mweera mbeu

(Mat 13:1-9; Luk 8:4-8)

1Nalyo Yesu kapooka lyingyi ilosha akee alya waameu lwa yeeve ilya. Kulya akai vandu vakasha ikuumbya-fo mamwiingyi nniini na kamwi ukee yoo kwaarutu. Nawe katana asaama na efo ngalaveny, kakaa rembo efo yeeveny. 2Nawe kava avaloshany kwa fyaaso. Na elyi eefo aloshaa kaamba ule, 3“Aranyiny! Akakato nndu mweera mbeu ankwiipoo nandeera mbeu takwe. 4Kikavaany elyi eefo asheeraa, maata tikolooka yoo mbai ya shia, na ndeye tikasha tikalya tikamaa. 5Na tingyi tikooloka ando iwe lyikwaallye efo si kulatiri uteri wiingyi. Nalyo yeni tikamia neelyi uteri lulaanngye si. 6Na elyi mwi wavaa tikaya. Kimmba tilasotye mirarii si, tikauma. 7Na tingyi tikooloka ando a miingeny. Miinga ilya ikarwa ikatisisira tilavike nta kimu. 8Na tingyi tikaoloka ando a uteri usha, tikarwa, tikawongya, tikavika kimu. Yeyo imwi ikavika makumi araru, na ingyi makumi arindaru, na ingyi iyana.” 9Nalyo kaamba, “Nndu atiri maarwi earanya navearannya!”

Kimaruma kya fyaaso

(Mat 13:10-17; Luk 8:9-10)

10Na elyi akee kyaanya kyakwe muni, valya vanndingitya vakasanga na valya ikumi na vavii vakammbesa kya fyaaso filya. 11Nawe kavavia, “Yeni mmbo mwaniingwa imanya mbony yeto shirike ta umangyi lwa Iruva. Indi yewo va poo kyawo kyoose mmbo vakyikooya veevywaa fyaaso.” 12Naambo,

“Ilola valole, valalollyaa.

Na yaaranya, vaarannyi valamanyaa.

Valasheyaalukya Iruva, vakooye ifwaaywa.”

Yesu atambashwa kyaaso kya mweera mbeu

(Mat 13:18-23; Luk 8:11-15)

13Nalyo kavavia, “A elyi mwanra mulamanya kyaaso ekyo, ni inda mumanyaa fyaaso efyo fingyi? 14Yeto mweera mbeu ni irero lya Iruva eera. 15Na yewo va efo mbai ya shia, ni efo kundo asheraa irero lya Iruva. Nawo wakammaa iita nalyo yeni Satana kasha nau, karakwa-u irero llya lyikee yeere efo miriminy yaawo. 16Na kya yewo vakee veere ando iwe lyikwaallye si, kyawo ni kiwo: Vakammaa iita irero lya Iruva, nalyo yeni vakalyilumba na nsia. 17Nawo nta valasotye miraari efo miriminy yaawo, mmbo vakee vandu va veru-veru. Elyi numa vakalolya kushe fyuure ao irishiswa kimaruma kya irero lya Iruva. Nalyo yeni vakawonisa nsindara. 18Na vengyi ni yewo veere ando a miingeny. Yewo mmbo vandu valearannya irero lya Iruva. 19Nalyo ngyusau ta ulana yelu tikaanga-fo na ulembi lweelembwa ni masaa na lango yeto ta findo efyo fiingyi. Nafyo fikasisira irero llya lyilakivike-se kimu. 20Na yewo veere ando a uteri usha mmbo yewo vashaaranyaa irero lya Iruva vakakyilumba, vakeenda vevikaa fimu, umwi kavika makumi araru, na ungyi makumi arindaru, na ungyi iyana.”

Taa ikee shisikye

(Luk 8:16-18)

21Kawuya kavavia, “A taa mmbo yeendwa indesikywa na nakori ao kitara? Nshi isheendwaa indevikwa ando a yeekyerya taa? 22Mashika nkwiifo kindo kisurumwaa kire kilamanyika-fo. Nta kulaifo kindo kisurumi kire kilamanyika paa-fo. 23Kwakooya nndu atiri maarwi earannya navearannya!” 24Kawuya kavavia, “Manyiny ekyo mwiifo mushiita-te! Myeesye yaany mwameesya nayo vandu, nnyo musheesywaa muviirywaa na yeengerywa muveengerywa-u. 25Mashika nndu atiri kindo mmbo aningwaa fingyi. Na nndu nalatiri kindo, na kilya akooya atiri mmbo avekisokwaa.”

Kyaaso kya mbeu imyaa

26Kawuya kaamba, “Umangyi lwa Iruva shaasa lukai mmbo lwava sha nndu aleenda yeera mbeu efo uteriny. 27Kava mwiilala na ikwiipoo kio na nsanyiny na mbeu ilya ikamia, ikang'ana, na yeto muni nalamanyi. 28Uteri yelo lukarosa fimu lo weni. Mmbo lulepooka yeende mikongo, numa fyaa, numa nganu tiinukye efo fyaany. 29Na kwakooya kimu yekyo kyankwaamba ivira, nalyo yeni karika finndo kimmba kwamfika yoo maveiyony.”

Kyaaso kya mbeu ya karadali

(Mat 13:31-32, 34; Luk 13:18-19)

30Kawuya kavavia, “A nkyokyi umangyi yelo lwa Iruva lushevakaniswaa nakyo ao lulwaallwe kyaaso kyeekyi? 31Mmbo lukee sha mbekye ya Haradali, nndu aleyeera efo sumbai, nayo ikee shidu ikairya mbeu toose teerwa sumbai. 32Nayo ikamaa yeerwa ikarwa, ikang'annya miri ingyi myoose. Ikaende maramba maniini, ndeye ta efo nginiiu tikatana taidima yookya-fo fifuri fisikywa nkirishe kya vayo.” 33Kawoongoya kirero kya Iruva avaviaa fyaaso fiingyi fya ngata yeyo shaasa vaidima yaaranya. 34Nta nalarere nawo kindo kulaore aveera fyaaso-fo. Lyo valya vakiloshyony veni kavatambashuya fyoose vakee kyaanya kyawo.

Yesu akyeemya uraato uniini

(Mat 8:23-27; Luk 8:22-25)

35Nalyo nkonu ulya mweni elyi kwamiila kavavia, “Ndifony, luruuke na kwakulya.” 36Nalyo vakasamana na mamwiingyi ulya wa vandu. Vakankamara shaasa eefo efo ngalaveny. Naasa na ngalava tingyi tikavekaa-fo teemwiimmya! 37Nalyo kukakwiipoo uraato lwa finya lurie mmbwa. Ngalava ilya ikatana yaishwa mura. 38Nawe muni akee efo taari ya ngalava yoo kwa numa eelele rony aekyerye mboloko yeelaaya nrwe. Nalyo vakamwaanta vakammbia, “Llosha, a mmbo kulasarye elyi lwiifo lusiaa?” 39Nawe kakwiipoo kakyeemmya uraato lulya kavia yeeve ilya, “Malallya sau!” Nalyo uraato lukasyado, kukava kimammya sau. 40Nalyo kavavia, “A kikyi elyi mukee veerei indo? Kyavaany inda elyi mwatura kyikusiryo?” 41Vakatirwa mmbweerei wiingyi, vakaviana, “A nndu yeu mmbwa kwi elyi na uraato lwamwiirikya na yeeve yei?”

Currently Selected:

Marko 4: MASNT00

Highlight

Copy