Marko 3

Yesu ashiisa nndu atiri woko lufirikye

(Mat 12:9-14; Luk 6:6-11)

1Nalyo kaanga lyingyi efo mmba yeeterevya. Nafo kwiifo nndu atiri woko lufirikye. 2Nawo vakava vallaayany, valole kwakooya ankiraa elyi lya Sabato, naambo vakooye kyeenkumba nakyo. 3Nawe kavia nndu ulya atiri woko lufirikye, “Kwiipoo, kushesalala yoo nnang'ani.” 4Nalyo kavavia, “A ndesa kwiifo mumu weetana mesha nkonu yeu wa Sabato ao ni itana makasha, ikira muu wa nndu ao ni yuureta?” Nawo vakamalallya sau. 5Naasa kavaringitya miso ivalola arooywaa nngoo na isokywa ni fyoova deny kimaruma kya ngoo tilya tawo tammba indo shuumu. Kavia nndu ulya, “Orwa woko yelo lwafo!” Kaorwa, woko lulya lwakwe lukawuya iva usha. 6Nalyo yeni Vafarisayo vakasomuka-fo, vakandesasanga na Herode. Vakaruvya shila kyikee kya insua, vaoni shia yeenreta.

Nsemu wa vandu mbai ya yeeve

7Nalyo Yesu kakwiipoo-fo waarya aryani na vakiloshyony vakwe. Kaenda kulya mbaambaa ya yeeve ilya. Vandu vakansora mamwiingyi nniini vakauka kulya Galilaya na kulya Yudaya, 8na kulya Yerusalemu na Idumaya na kulya kwa kulya ya Yordani na kulya myuungony ya Tiro na Sidoni, ni mamwiingyi nniini deny wa vandu, nawo vaitye filya aletana fyoose, vakafika kulya akai. 9Nawe kavia valya va kiloshyony vakwe vairikise ngalava ilya shidu immbere kimaruma kya mamwiingyi ulya wa vandu, naambo valashe insisira. 10Mashika elyi alekira veengyi na valya vatiri fivalyilyisaa vakeeuwa vandu naambo vakooye ifika alya akai, vampaani. 11Na mimuyo ilya ya utefusu elyi ilellollya, ikamwoolokya si, ikafua ishaambaa, “Yewe mmbwe Mwana wa Iruva!” 12Nawe kaveema deny valeshemwaamba.

13Nalyo kasaama alya ifumbu-u. Kavaanga valya ambakunda muni. Vakasha na yoo akai.

Yesu asauwa vakiloshony ikumi na vavii

(Mat 10:1-4; Luk 6:12-16)

14Kavika vandu ikumi na vavii, vave vekaa nawe, navevaruma vandekapa weele. 15Vavetira na ushilyi lwa yaanta mimuyo mikasha. 16Kavika valya ikumi na vavii. Kafishya Simon irina lyakwe ni Petro. 17Na Yakobo ulya wa Sebedayo na Yohane we mwanamaye wa Yakobo, we kavafishya irina ni Boanerge, nakyo ni kyimwi na vana va maruruma. 18Na valya vengyi ni Andrea, na Filipo, na Bartolomayo, na Matayo, na Toma, na Yakobo ulya wa Alfayo, na Tadayo na Simon akee wa yewo vakaari iringa ngata ya Kiyuda. 19Na Yuda Iskariote mmbwe yeto alenndiingya.

Mfinya ya Iruva, a ni Belsebuli?

(Mat 12:22-32; Luk 11:14-23; 12:10)

20Nalyo kaenda kaanga efo mmba, vandu vakasha ikuummbya-u lyingyi-se mwamwiingyi. Nta valaidimi iwonisa mwaanya weelya shoonga. 21Na valya va kulya kwakwe, elyi vamiita mbony takwe teenda indo, vakawara shia vandentira. Vakaamba, “Ansukwa.” 22Na veelosha mavavaso valya valesoka wooka kulya Yerusalemu, wo vakaamba, “Mmbo atirwa ni Belsebuli, na elyi aanta mimuyo mikasha mmbo aekywa ni yeto nniini wa mimuyo mikasha.” 23Nawe kavavaanga na yoo akai, karera nawo aveera fyaaso kaamba, “A ni inda Satana ashiidimaa yaanta Satana uroye? 24Na kwakooya umangyi lusheraukanaa lukakukapa weni, umangyi yelo nta llushiidimaa ikaa-u-fo. 25Na kwakooya mmba ya nndu isheraukanaa ikakukapa sheni, mmba yeyo nta nnyishiidimaa ikaa-u-fo. 26Na kwakooya Satana akwiipoo kakukapa muni mmbo araukana, nta nnashiidimaa ikaa-u-fo, mmbo ashekombika kombi. 27Indi nta nkwiifo nndu ashiidimaa yaanga kwa nndu mwaafinya nandekamara fiiya filya fyakwe nafimaa-fo, kwankooya kulaore ampooka ifinga mwaafinya yeto llyo-ny ashekamaraa fya efo mmba kwakwe nafimaa.” 28Ni kya dede shamuvia, “Vana va vandu mmbo vashewonaa ifwaaywa kya findo fya ulyamari fyoose, na fyaararo fyoose vamaarara shaasa fifye. 29Indi kwakooya nndu amaarara kya imina Mumuyo Mweele, we nnaonaa ifwaaywa-fo, mmbo akaa na uvingo lwa llung'anu lwa ulyamari lwakwe.” 30Mashika llya valeamba, “Mmbo atirwa mmumuyo wa utefusu.”

Maye wa Yesu na vanamaye

(Mat 12:46-50; Luk 8:19-21)

31Nalyo maye vakasha nang'u na vanavamaye, vakasha iirisha yoo poo. Vakanrummya nrumi yeembaanga. 32Naasa na mamwiingyi ulya wa vandu ukee rembo unndingitye riti, vandu vakammbia, “Akakawo mau na vanavamau na vamfwamau vakee yoo poo vakuruuyaa.” 33Nawe karouwa kaamba, “A ma na vanavama ni vakyi?” 34Naasa kalola valya vakee rembo vansengetye kavaringitya miso. Kaamba, “Akakava ma na vanavama vakwa. 35Wo nndu aiyo moose atana efyo fisennyi Iruva mmbwe ava mwanama wakwa na mfwama wakwa na ma wakwa.”

Currently Selected:

Marko 3: MASNT00

Highlight

Copy