Marko 2

Yesu ashiisa nndu kitongororo

(Mat 9:1-8; Luk 5:17-26)

1Naasa mikonu ikaira mive na mive kavefika-se kulya Kapernaumu. Kyikaitiwa we ni efo mmba akai. 2Nalyo vandu vakasha ikuumbyau veengyi. Yoo mwaangony kulaidimi ivatira-se. Nawe kavaviany irero lya Iruva. 3Nalyo vakasha imweengye nndu muumu malungo ariwa mmbandu vaana. 4Nawo valaidimi imfita yoo akai kyimaruma kya mamwiingyi ulya. Vakasammbwa alya mmbeeu kusumani na yoo Yesu akai. Vakarua-u vakaolota nang'u kitara kilya kileeywa ni ulya muumu malungo. 5Na Yesu alolya kikusiryo kyawo kavia ulya muumu malungo, “Mwana-akwa kwammeutwa ngyulyamari tafo!” 6Naasa veelosha mavavaso maata veefo rembo vakarera efo miriminy yaawo, 7Vakaamba, “Nkyiki elyi nndu yeu arera indo? Mmbo aruma Iruva! Mmbi ashiidimaa yuuta nndu ngyulyamari kulaore ni umwi nsi, mmbwe Iruva?” 8Nalyo yeni Yesu kamanya na ngoo yakwe mmbo varera indo efo miriminy, kavavia, “A kimaruma mukarera indo efo miriminy yaany nkikyi? 9A kyaangu nkyokyi? Ndesa ni ivia yeu muumu malungo, ‘Kwammeutwa ngyulyamari tafo, ao ni yaamba, kwiipoo, kwakurika kitara kyafo, kwende kyeny?’ 10Indi manyiny-te Mwana yeto wa nndu mmbo atiri ushilyi lweeuta vandu ngyulyamari tawo kunu urukeny. Naasa kavia ulya muumu malungo, 11Shakuviany, ‘Kwiipoo kukurike kitara kyafo; kweende kyeny kwafo.’ ” 12Nawe kakwiipoo, nalyo yeni kavekurika kitara kyakwe, kasomuka-fo velollye woose. Nawo woose vakatana vafulukywa deny vakaarafuma Iruva veshaambaa, “Llulendelollye kindo sha ekyi-fo!”

Uvaango lwa Levi

(Mat 9:9-13; Luk 5:27-32)

13Nawe kawuya ikwiipoo-fo, kaenda kulya mbaambaa ya yeeve ilya. Mamwiingyi ulya moose wa vandu ukasha na alya akai. Nawe kavalosha-ny. 14Kaira na mbee kalollya Levi ulya wa Alfayo akee rembo efo mmba yeededemmya, kammbia, “Shilatya!” Nawe kakawiipoo kallatya. 15Naasa kyikava elyi Yesu akee rembo efo mmba kwa nndu yeto naambo nalye shoonga nafo kweefo vadedemi veengyi na vandu valyamari. Vakasasanga na Yesu na valya vakiloshyony kyakwe veelya nawo shoonga. Mashika nyelyi veefo veengyi, nawo ni vandu valellatya. 16Naasa vaarya va fitabu va ngata ya Vafarisayo vakusheye nafo vakalolya eelyaa shoonga na vadedemi valya na vandu valyamari, vakavia valya vakiloshyony vakwe, “Mmbo alya na ina asasangyi na vadedemi yewo na vandu valyamari!” 17Na Yesu kakyiita kavavia, “Nshi yewo vakee na finya vakundye ishiiswa-fo, indi ni yewo valwee. Nta nshisheye nafo ishevaanga yewo va usumanu-fo, ni yewo valyamari.”

Mbony ta ikootoya

(Mat 9:14-17; Luk 5:33-39)

18Naasa valya vakiloshyony va Yohane na Vafarisayo veefo vakootoyaa. Vakasha vakammbia, “A kyimaruma nkikyi, elyi vakiloshyony kya Yohane vakootoyaa na vakiloshyony kya Vafarisayo-da, indi yewo vakiloshyony kyafo valakootoye?”

19Na Yesu kavavia, “A vandu va walyi vaidimi inda ikootoya elyi muni walyi asindi nawo? Kyeeri kyoose vakee na muni walyi, mmbashiidimaa ikootoya-fo. 20Indi kukaa kushe mikonu vasokwaa muni walyi, llyoony vashekootoyaa nkonu yeto. 21Nta nkwiiyo nndu afummya kirami kya soori shiiya efo sooriny shikuu-fo. Kwakooya ni indo, ekyo kyiveiywaa-u mmbo kyawuya irannduwa-u, yoo kwiiya kukalakana na yoo kukuu. 22Nta nkwiiyo nndu asuruma mfinyo mwiiya efo mbolokony ta masara makuu-fo. Kwakooya ni indo, mfinyo yeto mmbo uriitaa mboloko yeto, na mfinyo ufwe mwasi sanda na mboloko yeto. Mfinyo mwiiya mmbwa ivika efo mbolokony shiiya.”

Mbony ta Sabato

(Mat 12:1-8; Luk 6:1-5)

23Nalyo kikava elyi akee efo shia, keera efo mareminy a nganu elyi lya nkonu wa Sabato. Na valya vakiloshyony vakwe elyi vekeenda na shia vakapooka yuurushwa fyaa. 24Nalyo vafarisayo vakammbia, “Lla-te, nkikyi elyi vatana kindo ekyi kilatiri mumu nkonu yeu wa Sabato?” 25Nawe kavavia, “A mmbo mulandesomi shaasa Davidi aletana llya alekooya atura kyeelya, katirwa nshaa we na valya aryani nawo? 26Shaasa aleanga na efo mmba ya Iruva, meendi a nkohani ulya niini Abyatari, kalya mikate ilya ya kideesyo. Nayo ilatiri mumu weelyiwa ni nndu, kulaore ni Vakohani veni, kaavya na valya aryani nawo.” 27Nawe kavavia, “Nkonu wa Sabato mmbo ulevikwa kimaruma kya nndu, nshi nndu alevikwa kyimaruma kya Sabato-fo. 28Kimmba ni indo, Mwana yeto wa Nndu mmbo aveva nniini wa Sabato.”

Currently Selected:

Marko 2: MASNT00

Highlight

Copy