Marko 1

Miloshye ya Yohane Mbatisi

(Mat 3:1-12; Luk 3:1-18; Yoh 1:19-28)

1Nrumi ya Iruva ya Nsia ileendwa ni Yesu Kristo, mmbo ilepooka indo, 2shaasa kikee kyireiye efo kitabuny kya nkisuku ulya Yesaya kyeamba,

“Akakau shiifo nrumaa nsu wakwa

nakusongoye yoo mbee yafo,

mmbwe ashekusongosyaa shia yafo.”

3Kwaitiwa unyanga luvaanga kulya kasa lushaambaa,

“Deesyeny shia ya Nndumi!

Sumaniseny miko yakwe!”

4Ni indo Yohane alefummya vandu ashevabatisaa kulya kasa. Kava mwiikapa weele lwa ubatiso lwa yaalashika efo nriminy vakooye ifwaaywa ngyulyamari tawo. 5Keengywaany ni uruka loose lwa Yudaya na Vayerusalemu woose. Vakandebatisywany kulya mureny wa Yordani veparya Iruva ngyulyamari tawo. 6Nawe Yohane aree soori ta mafwaa a ngamula kakufinga na ukova lwa shony efo kisiny. Kalya nrie na ukyi wa mbakony. 7Kakapa weele ashaambaa, “Yoo numa yakwa kwiifo kwiishaa yeto atiri finya ngota yeny. Nawe nta nshimaa shikwiinyike shiporommwi ukova lwa fyaaru fyakwe-fo. 8Kyakwa yeny ni mura shava mwiibatisa nato. Indi we ni Mumuyo Mweele ashemubatisaa nato.”

Ibatiswa na yeeswa lya Yesu

(Mat 3:13–4:11; Luk 3:21-22; 4:1-13)

9Nalyo fyeeri fyekee filya fyeni Yesu alesha nafo auka kulya Galilaya, kabatiswa ni Yohane kulya Yordani. 10Na llya alesaama auka efo mureny, llyo yeni kalollya efo iruveeu kukarauka na Mumuyo wa Iruva kamoolokya akee sha mbeta. 11Na unyanga lukaitiwa luuka efo iruveeu lushaambaa, “Yewe mmbwe mwana wakwa nkunde, ni yewe shilekusauwa.” 12Nalyo yeni Mumuyo wa Iruva kanrwaa nafike kulya kasa. 13Kakaa-fo ando a mikonu makumi aana asheeswaa ni Satana. Kakaa-fo amwi na mafisi, na vasu va Iruva vakamfurukannya.

Yesu avaanga veereiya makunga vaana

(Mat 4:12-22; Luk 4:14-15; 5:1-11)

14Naasa elyi numa elyi Yohane ammeerambikywa-fo Yesu kafika kulya Galilaya ashekapaa weele lwa yoongoya vandu Nrumi ya Iruva ya Nsia. 15Kaamba, “Alashikeny efo nriminy muvekusirya na Nrumi yeyo ya Nsia.” 16Nalyo kaira efo mbaambaa ya yeeve ilya ya Galilaya. Kalollya Simion na Andrea akee mwanamaye wa Simion veefo vashoolotaa nreiyo weereiya makunga efo yeeveny mashika vekee veereiya makunga. 17Na Yesu kavavia, “Oshony, mushilatye, na yeny nshemwaallwa muve veereiya vandu.” 18Nalyo yeni vakara u mireiyo ilya yaawo, vakallatya. 19Keenda na kwambee kinnywa, kalollya Yakobo akee mwana wa Sebedayo, na Yohane we mwanamaye nawo vakee ngalaveny veefo vasongosya mireiyo yaawo. 20Nalyo Yesu kavavaanga. Vakara-u nde-yaawo, we Sebedayo efo ngalaveny ando amwi na varundi valya vakwe. Vakaenda vakallatya.

Nndu atirwa mmumuyo nkasha

(Luk 4:31-37)

21Nalyo vakafika kulya Kapernaumu. Nalyo yeni elyi Sabato yansha kaenda efo mmba yaawo yeeterevya, kava eloshaa. 22Na vandu vakaising'ang'a kya miloshye ilya yakwe. Mashika elyi ava mwiilosha sha nndu atiri ushilyi, nalakee wa ngata ya veelosha mavavaso. 23Nalyo yeni efo mmba yaawo yeeterevya kweifo nndu eetirwa mmumuyo wa utefusu. 24Kakooma kaamba, “Nkyiki kyeru na yewe Yesu wa kulya Nasareti? Mmbo kusheye ilurumata! Lukwiishi yewe ni vi! Yewe ni yeto Mweele wa Iruva.” 25Na Yesu kankyeemya eshaambaa, “Malallya sau kwammbuka!” 26Nalyo mumuyo ulya wa utefusu ukamweera efo na efo; ukafua na unyanga waasha ukammbuka. 27Vakauma mwaangaya woose. Vakatana vaumburana vakaamba, “A kindo ekyi mmbo kyikee inda? Akakakyi kiloshyo kyiiya kitiri ulyimbi! Na mimuyo yeyo ya utefusu kaivavasa, nayo ikamwiirikya.” 28Nalyo yeni mbony takwe tikakwaana kulya urukeny lufitani na Galilaya loose.

Yesu ashiisa vandu veengyi

(Mat 8:14-17; Luk 4:38-41)

29Na elyi vansomuka efo mmba yeeterevya nalyo vakafika kulya kyeny kwa Simon na Andrea, varyani na Yakobo na Yohane. 30Naasa mayaanka wa Simon eefo atirwa nkitara etirwa mmuro. Nalyo yeni vakamoongoya mbony takwe. 31Nawe kasha nau, kantira woko, kanseleesa. Na muro ulya ukammbuka. Nawe kavafurukannya. 32Naasa elyi kwamiila mwi wamoolokya, vakamweenngye vandu valya veeiyo valwee woose na yewo vatirwa mmimuyo mikasha. 33Na muri moose ukava mmbo ukuummbye yoo mwaangony kwakwe. 34Nawe kakira vandu veengyi valwee ndwari shive na shive. Kaanta mimuyo mikasha miingyi, nta nalalekeye mimuyo ilya mikasha ikarera-fo, mashika yemwiishi.

Yesu alosha kulya Galilaya

(Luk 4:42-44)

35Naasa elyi lya ngama nraasi na ivishivishi kakwiipoo. Kasomuka efo mmba kaenda kundo kulakee vandu, kava mfo aterevya. 36Na Simon kasanga na wooroye, vakammbingya. 37Vakankooya vakammbia, “Woose veefo vakuruyaa.” 38Nawe kavavia, “Ndifony lweende kundo kungyi, miriny yeyo ya minyanuny. Nafo-da shiveenda shindekapa-fo weele. Mashika nkyo kileshiniinga shasha shyuuka kyeny.” 39Kawara shia kava mwiira-ira kulya Galilaya koose eshangaa na efo mmba tawo teeterevya na ikapa-fo weele na yaanta mimuyo yeyo mikasha.

Yesu ashiisa nndu atirwa ni ivave

(Mat 8:1-4; Luk 5:12-16)

40Nalyo kasheywa ni nndu atirwa ni ivave. Kantereva, kamfiirya-ndi, kammbia, “Kwankunda mmbo kushiidimaa isheeremuta!” 41Nawe kantinnywa kaorwa woko kampaana. Kaamba, “Shankunda, eremukany!” 42Nalyo yeni ivave lilya lyikammbuka kaeremuka. 43Nalyo kantauwa kamwiima deny, 44kammbia, “Manya kulavie nndu kindo! Mmbo kusheendaa ikoora efo kwa nkohani. Na elyi kwameeremuka indo kundevika na kindo kyeeninga Iruva kilya Mose avavasye, kive nkyo ukureekyi lwa efo kwawo.” 45Naasa kauka-fo kapooka indekyoongoya vandu na ifura deny, na ivambisa mbony yeto. Nawe Yesu nalakiidimi-se ikyaanga muriny wa vandu paa. Naasa kandekaa kundo kulalelwa, vandu vakansheya vauka wo ando.

Currently Selected:

Marko 1: MASNT00

Highlight

Copy