Matayo 23
23
Yesu na Vaarya va fitabu na Vafarisayo
(Mar 12:38-39; Luk 11:43, 46; 20:45-46)
1Nalyo Yesu karera na ironda lilya lya vandu na valya vakiloshyony kyakwe, kaamba, 2“Velosha mavavaso na Vafarisayo mmbo velosha mavavaso a Mose. 3Naasa fyoose vamuvia mufitire muvefiringa. Indi kya mashora awo nta mulatani shawo. Mmbo varera valatani. 4Nawo vakava vefinga mario maroo, vakaekerya vandu meeveny awo. Indi wo veni nta valakunde yaasembera na nni. 5Na mashora awo moose vakaatana vakooye ilolwa mmbandu. Mashika fingova fyawo varee elyi vatereva vakafilambara, na mise ya soori tawo ta uwe vakaing'anisa. 6Nawo vakasia marembo a mbee ando a shoongeny, na fitima fisongoru efo mmba teeterevya. 7Na fiidikiro fya vandu efo singireny, na ivaangwa valori mmbandu. 8Indi yeni nta mulavaangwa valori mashika llori yeto waany aifo ni umwi, neeni moose mukainana. 9Nta mulavaange nndu ni Nde waany, kunu urukeny, Mashika Nde waany aifo ni umwi, ni yeto wa efo iruveeu. 10Nta mulavaangwa vasongoru, mashika nsongoru waany aifo ni umwi-da, we Kristo. 11Indi yeto akee nniini waany, we kuti nave nndundi waany. 12Indi yeto mwiikung'anisa we muni mmbo akaa nanyiiswa. Na yeto mwiikunyiisa we muni akaa nang'aniswa.”
Yesu asakya kya ukunang'ari lwawo
(Mar 12:40; Luk 11:39-42, 44, 52; 20:47)
13“Indi yeni veelosha mavavaso na Vafarisayo mukee vakunang'ari, oshiny lwany! Mmbo mwaraya mwaango wa iruveeu mukeema vandu yaanga-fo. Shamashika nta yeni muveni mmushaangaa-fo-fo, nta yewo vakunndye yaanga mulavalekeye vakaanga-fo.”
[ 14“Nyira veelosha mavavaso na Vafarisayo mukee vakunang'ari, oshiny lwany! Shamashika elyi mwava veemira mmba ta vaka va ding'u mukawuya itereva Iruva na marero maasha kikee kya ukunang'ari. Kimmba ni indo mmbo musheonisaa uvingo uniini nnu.”]
15“Yeni veelosha mavavaso na Vafarisayo mukee vakunang'ari oshiny lwany! Mmbo mwasengetya yeeve yeyo niini na uruka uumu naambo mukooye-fo nndu amulatyaa umwi. Na kwakooya ammba nndu amulatye mukawuya imwaallwa nndu wa gehena ngota yeni kavii.”
16“Yeni vasongoru vafu miso, oshiny lwany! Mmbo mwaambaye, ‘Nndu kalya mboo na mmba ya Iruva, nkitiri mwaandu-fo. Indi nndu kalya mboo na saabu yeyo ya efo mmba ya Iruva, we allyamara.’ 17Mmbo mukee vakunang'ari mukaveva vafu miso. A kiniini ni kingakyi? Ni saabu yeyo ao ni mmba yeyo ya Iruva iniinngye saabu yeyo ikava kindo kyeele? 18Mukaveamba-se, ‘Nndu kalya mboo na ando eekorya firaso nkitiri mwaandu-fo. Indi nndu kalya mboo na kiraso ekyo kikee kyeekere-u, we allyamara.’ 19Mmbo mwava vandu vafu miso. A kiniini ya kingyi n kingakyi? Ni kiraso ekyo ao ni ando eekerya firaso anniinngye kiraso ekyo kikava kindo kyeele? 20Naasany, yeto alya mboo na ando eekorya firaso, mmbo alya mmbo nang'u kasanda na fyoose fikee fyeekere-u. 21Na yeto alya mboo na mmba ya Iruva, mmbo alya nayo mboo kasanda na yeto akaa-fo. 22Na yeto alya mboo na iruveeu, mmbo alya mboo na kitima kya Iruva kasanda na yeto akeeu rembo.”
23“Yeni veelosha mavavasyo na Vafarisayo mukee vakunang'ari, oshiny lwany! Mmbo mwavika firaso fya findo efyo fyeefwamisa na fyeerolisa na fyeelonga shoonga. Indi efo mavavasony findo fiiyo finiini fyo mukawuya ifira, ni irummbwa fya songosiny na ilyillya vandu na kikusiryo, efyo mfyo fyeetana, nta efyo fingyi mulafire-fo. 24Mukee vasongoru vafu miso! Mmbo mufifinaa mbu, mukawuya imira ngamula. 25Yeni veelosha mavavaso na Vafarisayo mukee vakunang'ari, oshiny lwany! Mmbo mwasangya kikombe na kideeva kunu kipoo, na efo mmba fikaishwa fya usoki na uraami. 26Yewe Mfarisayo mfu miso! Lava mbele isangya kikombe efo kimmba-te, na kunu kipoo kuveva kwaa. 27Yeni veelosha mavavaso na Vafarisayo mukee vakunang'ari oshiny lwaanyi! Mmbo mufwanani na mbanga ta vafu tikee shaambe yeela, kunu kipoo tikalollyo mmbo tikee shisha, na efo kimmba tikaishwa maffwa a vafu na uravi lwa wo ngata. 28Na yeni ni kiwo-da, kunu kipoo mmbo mulolywaa mukee va usumanu, indi efo kimmba mukava vandu vaishwe ukunang'ari na kiila.”
Ngapo ikeesha
(Luk 11:47-51)
29“Yeni veelosha mavavaso na Vafarisayo mukee vakunang'ari oshiny lwany! Mbanga yeto kundo vakisuku vakee varike mmbo mwatannya-u mmba, na efo kundo valya va usumanu vakee vaare mukaatokopa. 30Mukaamba, ‘Kwee ni yese lweefo meendi alya a vakuu veru, yese llweeshaakanaa nawo iirita samu ya vakisuku valya-fo.’ 31Kikavaany mwavika ukureeki lweekuvinga muveni, mukamanyika mmbo mukee vana va valya valewaa vakisuku valya. 32Naasa neeni keveishuryeny-fo ekyo kilerewa kyenga ni vakuu valya vany! 33Yeni shoka mukee fivana fya mashoka, a ni inda mushaashukaa uvingo lwa Gehena? 34Kimmba ni indo, lleny-te, shiifo shimurummyaa veawuya fisuku na vandu vaishi reu na veelosha mavavaso. Na yeni yewo maata mushevawaa, neevakapya nsalabeny, na yewo maata mushevakapaa na ngova efo mmba tany teeterevya, muvevarishisa muri ku muri. 35Naambo mukooye isheywa ni samu ya vandu va usumanu shoose ipookya samu ya nndu ulya wa usumanu Abeli, fika samu ya Sakaria we mwana wa Barakia, yeto mulemmbwaiya efo nnang'ani kavii ya mmba ya Iruva na ando eekorya firaso. 36Ni kya dede shamuvia, ‘Efyo fyoose mmbo fishewoyaa irika elyi lyiiyo.’ ”
Yesu aiya kya muri wa Yerusalemu
(Luk 13:34-35)
37“Woi Yerusalemu! Woi Yerusalemu! Mwiiwaa veawuya fisuku, na yewo kwarummywa kwaveveera mawe. Ni keengyi na keengyi sheekunndye yuummbya fivana fyafo, sheelyi nguku yawummbya fivana fya vayo ikasikya na maaru. Na yeni mulakunde! 38Llen-te mwiikaa mureeywa mmba yei yeanga ive irama. 39Mmbo shamuviany, ‘Mmukaa mushilollye-se kipookya ulaalu-fo,’ na kutani mwaamba, ‘Kundearafumwa yeu asha na irina lya Nndumi!’ ”
Currently Selected:
Matayo 23: MASNT00
Highlight
Share
Copy
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.
