Matayo 24

Yesu arera kya irumatwa lya mmba ya Iruva

(Mar 13:1-2; Luk 21:5-6)

1Nalyo Yesu kakwiipoo auka efo poo ya mmba ya Iruva, arie shia, valya vakiloshyony kyakwe vakakuumbya yoo akai vamoore mmba ta miidye. 2Nawe kaallwa kavavia, “Mulollye yoo moose-ndi? Nkya dede shamuvia, ‘Kunu nkwiikaa kurewa-u iwe lyakweekerya iwe uroye lyire lyilasambuwa-fo.’ ”

Ukiva na ngapo

(Mar 13:3-13; Luk 21:7-19)

3Naasa elyi ameenda ikaa rembo alya ifumbuny lya miri ya mafura, valya vakiloshyony kyakwe vakashekuummbya yoo akai, vakee kyaanya kyawo, vakaamba, “Luvie-te meendi kwiikaa kuutike indo, na wende lweemanya yoo masheyony afo na masiiyony a ulana yelu.” 4Yesu kaallwa kavavia, “Kwiiseny nndu nalamulembe! 5Mashika veengyi vakaa vashe varee irina lyakwa veshaambaa, ‘Yeny mmbwe Kristo!’ Nawo vaevete veengyi. 6Na kingyi-se mushekooyaa iita kya fira na fyuulaalu fya fira. Manyiny mure mulaereve! Mashika mmbo kikee kirummbwe kyeende indo. Indi yoo masiiyony a ulana nnyandefika-fo. 7Mashika uruka lumwi lushekwiipoo lukape yelo lungyi, na umangyi lukape yelo lungyi. Kuvekaa-fo na shaa shiniini, na fidinasi kundo na kwiingyi. 8Na efyo fyoose mfyo mapookyony a fyuure efyo fyeefurumya. 9Nalyo llyo vashemurambikyaa-fo mulyisywaa ukiva na iwaawa. Na yeni mushevaa veesuwa mmbandu woose va masanga kimaruma kya irina lyakwa. 10Nalyo veengyi vashewonisaa nsindara na iriinngyana na isuvana wo veni na veni. 11Na veawuya fisuku veengyi va wongo vavekwiipoo-fo vasheevetaa vengi. 12Na elyi fya uravi fisheengerekaa indo nkyo kisheniingaa ukundi lwa veengyi lusheangwa. 13Naasa yeto asisirya-u nafike yoo mafurummyony mmbwe ashekirwaa. 14Na nrumi yeyo ya nsia ya mbony ta umangyi yo isheendaa yongoywa kunu ulaniny koose, vandu va masanga vawonise ukureekyi woose. Kikamfika yoo llyony kwamfika yoo masiiyony.”

Ngapo niini

(Mar 13:14-23; Luk 21:20-24)

15“Naasa elyi meendi mushelollyaa uravi lwiilannyi kyeeso usutu lulya lweeallwa ando kweele irama lwansha nang'u lulya lukee waambe ni nkisuku ulya Danieli (na mwiisoma-u nakummbwe!)” 16“Llyo yewo valele kunu Yudaya vanderishya mafumbu-u. 17Na nndu akoyaa akee mmbeeu, nalaoloke-fo nandeipoo fya efo mmba kwakwe. 18Na nndu akooyaa akee efo ireminy, nta nalainduke nawuye na numa nandeipoo soori yakwe ya yeerya. 19Indi vaka yewo vakooyaa vakufingye fyeeri efyo na yewo vashootaa vana, oshiny lwawo! 20Indi tereveny Iruva, kyeeri ekyo kyeerisha kilave ni kyeeri kya mbeo, nta nkonu wa Sabato! 21Shamashika meendi yoo kushekaa-fo fyuure finiini. Nta uka elyo mapookyony a ulana fika ulaalu kulandekae-fo fing'ani indo-fo. Nta meendi a numa mfishekaa-fo finiini indo-fo. 22Na fyeeri efyo kukooye kulaore fyeefiiswaa, nkweekiaa-fo nta nndu-fo. Indi kimaruma kya yewo vasauwe nkyo kisheniingaa fyeeri efyo fifiiswa.” 23Na fyeeri efyo fikamfika, kwakooya nndu amuvia Kristo akakau yaa, ao, “Akakato efo, nta mulairikye-fo. 24Shamashika kushekwiipoo Vakristo va wongo na veawuya fisuku va wongo, nawo vandeora vandu ngyende shiniini na findo filandelollyo lyingyi, na kukooye kyeevaa naakwa na yewo vasauwe verekaa. 25Akakyo shalava imuvia. 26Naasany, kwakooya vashemuviaa, ‘A ulya kulya kasa! Nta mulaende isaiya-fo! Akakato aovye efo firyeny nnang'ani ya mmba! Na yeni nta mulairikye!’ 27Mashika shaasa kimwii kimikaa kyuuka taari ya ngama kikatana kyafika taari ya nkwaany, na yoo masheyony a Mwana yeto wa nndu ni indo kisheendaa. 28Na kundo kukee nnying'a na mamutony mfo kundo ashekuumbyaa.”

Isha lya Mwana wa Nndu

(Mar 13:24-27; Luk 21:25-28)

29“Naasa fyuure efyo fikamiira llyo yeni mwi yeu ushaalukaa ireema, na mwiiri mmbusheendee-se sa yavayo-fo. Na nyinyiri tishoolokaa tyuuka efo iruveeu. Na finya yeto ta efo iruveeu tiverinyiswa. 30Nalyo llyo wende lwa Mwana yeto wa nndu lusheonikaa efo iruveeu, na ngyufyari toose ta vandu va ulana tishekapaa kiiyo. Nato tishelollyaa Mwana yeto wa nndu ashaa ariwa mmafishi a nginiiu akee na wiitori uniini na itumbe. 31Nawe asherumaa vasu vakwe, na mbembe tikapwa na finya. Nawo vandeummbya-u yewo vasauwe vakwe vavaute efo ndumbeny tilya iinya vepookaa marayony yoo a ngina vafite marayony yoo engyi.”

Kyaaso kya nkuu

(Mar 13:28-31; Luk 21:29-33)

32“Naasa efo nriny wa nkuu uten-fo wende lwekulosha. Iramba lya vayo lyikamfumbisa lyikaora maru, neeni mukamanya meelulyony amfika kufii. 33Na kya findo efyo na kiwo-da. Mukammeefilollya fyoose, kevemanyiny, mmbo ansha kufii na yoo mwaangony. 34Ni kya dede shamuvia, ‘Irika elyi nta llyishiraa kulaore findo efyo fyainukya fyoose-fo. 35Efo iruveeu kwiikaa kurumake, na kunu ulaniny, kilarumakaa ni marero akwa.’ ”

Nkwiifo aishi nkonu nta saa-fo

(Mar 13:32-37; Luk 17:26-30, 34-36)

36“Indi kya nkonu yeto mweni, na saa yeyo sheni, nkwiifo nndu aishi-fo, nta vasu va efo iruveeu, nta we Mwana-fo, kulaore ni Nde we muni. 37Indi shaasa kyeekee fyeeri filya fya Noe, ni indo-da kisheendaa elyi kwamfika yoo masheyony a Mwana yeto wa nndu. 38Mashika vandu valya veefo meendi alya kulaore yeeve ilya niini yansha, shaasa valeva veelya na ina na yaalyika, na yaalyikwa, vakatana vafika nkonu ulya Noe aleanga na efo isandukuny. 39Nta valaipuye kindo, yeeve ilya niini ikatana yasha ikavakomba kombi. Na yoo masheyony a Mwana yeto wa nndu ni indo-da kisheendaa. 40Nalyo llyo vandu vavii vakooyaa vakee ireminy, yeto umwi awarywaa na yeto ungyi narewa-u. 41Vaka vavii vakooya veesaa iseweeny, yeto umwi ashewarywaa, na yeto ungyi narewa-u.”

42“Naasany veny velala shoovi, kimmba mulaishi nkonu yeto Nndumi waany ashaa nato ni ungau. 43Indi kindo kimwi mwiishi, ‘Kya muni kyeny kukooye mmbo eeishi ni ikamba lya kio lyeeringa lyingalyi inyinyi lyishaa, mmbo elalaa shoovi, nnyeraa mmba yakwe isumwa-fo.’ 44Kimmba ni indo neeni veny vandu vakudeesye, mashika Mwana yeto wa nndu asheshaa kyeeri mulakumbuye.”

Ishinga isaari na ishinga yeesi

(Luk 12:41-48)

45“Naasany ishinga lyiiyo lyitiri usaari na urango usha llyingalyiny? Nndumi wakwe kammbika nniini wa mmba yakwe nandeavya mashinga wooroye shoonga kyeeri kisumani. 46Na ishinga elyo elyi nndumi wakwe ashaa, nakooye eetanaa indo, ngoma lyo. 47Nkya dede shamuvia, ‘Mmbo ashemmbikaa nniini wa findo fyakwe fyoose.’ 48Indi ishinga elyo ikasha, kwakooya lyaamba efo nriminy: Nndumi wakwa nnashaa uviny-fo. 49Nalyo lyikapooka ikapa mashinga wooroye nawe kasanga na veenangwa kalya na ina nawo. 50Naasa nndumi ulya wa ishinga elyo mmbo asheshaa kyeeri lyilaifo lyimmbereyaa na saa lyilaishi. 51Nawe ashelyirummbwaa tapa nandelyisanda ando amwi na yewo vakunang'ari, kive nkyo waavi lwakwe. Nalyo kukae-fo ikapa kiiyo na irafunnya mayoo.”

Currently Selected:

Matayo 24: MASNT00

Highlight

Copy