Luka 3

Miloshye ya Yohane Mmbatisi

(Mat 3:1-12; Mar 1:1-8; Yoh 1:19-28)

1Naasa mwaaka wekee wa ikumi na karaanu kipookya Kaisari ulya Tiberio antira uruka na Pontio Pilato ekee nshilyi nniini wa kulya Yudaya na Herode akee mangyi wa kulya Galilaya na Filipo we mwanamaye ekee mangyi wa kulya Iturea na uruka lwa Trakoniti, na Lisania akee mangyi ya kulya Abilene, 2meendi alya Anasi na Kayafa vekee Vakohani vaniini, llyo meendi kirero kya Iruva kilefika kulya kwa Yohane, we mwana wa Sakaria, ekee kulya kasa. 3Nawe kandefika kulya urukeny lufiitani na Yordani loose, kava mwikapa-fo weele lwevia vandu kya ubatiso luryani na yaalashika efo nriminy, naambo vakooye ifwaaywa ngyulyamari tawo. 4Kikaenda indo shaasa kikee kireiye efo kitabuny kitiri marero a nkisuku ulya Yesaya, nang'u akee ule,

“Alu unyanga lwa nndu mwiikapa weele

kundo kwa kasa ashaambaa, ‘Songosyeny shia ya Nndumi,

muveorota na ngyushengye takwe.

5Wo imungo lyiiyo lyishevovirwaa

na wo ifumbu lyiiyo na wo kidooro fisholotwaa na si.

Na efyo fikulemyi fiveva fyoorotu,

na shia eto tikee malomi-lomi tiveva shirambalali.

6Na woose vatiri mwiili valollye ukiro lwa Iruva.’ ”

7Nalyo vandu vakava vemweengya mamwiingyi vandebatiswa mmbwe. Nawe kavavia, “Yeni luva ya shoka a ni vi alemusununndya shaasa muturunyaa unyafi elo lwa Iruva lukaa lukape vandu? 8Naasa vikeny ndunda tisumani na nrima waalashikye! Nta mulapooke irera efo nriminy mwaambe, ‘Nde weeru luntiri ni Abrahamu!’ Mmbo shamuvia, Iruva kakunda ashiidimaa iparya Abrahamu vana navaute naakwa ni efo maweny! 9Na kyaara kyammaa ivikwa sindeny ya miri. Naasa wo nri wiiyo ulavikaa ndunda shisha umanywaa na indeerwa murony.” 10Nalyo vandu valya vakuumbye-fo vakammbesa vakaamba, A lukatanany inda? 11Nawe kaalwa kavavia, “Yeto akoyaa atiri soori ivii naniinge yeto nalatiri. Na yeto akoyaa atiri shoonga navetana kiwo.” 12Naasa vandu vadedemi vakasha nafo vashebatiswa. Vakammbia, “Llori, a yese lukatana inda?” 13Nawe kavavia, “Nta mulaengere isoka nndu kindo ngota ekyo kyikee kivavasye.” 14Naasa vandu vasikari vakavemmbesa vakaamba, “A na yese lukatana inda?” Nawe kavavia, “Nta mulaafinyi nndu, nta mulakumbe nndu kya wongo. Mmbo mushekufuryaa na ekyo muniingwaa kya urundi lwany lwa kyaasikari.” 15Naasa vandu va kulya urukeny woose veefo vavereyaa na ikusara-sara kya Yohane efo nriminy veshambaa kulakooye mmbwe muni akee Kristo. 16Nalyo Yohane kaalwa kavavia, “Yeny ni mura shamubatisa nato. Indi kwiifo kushaa yeto mwaafinya ashiilannyi. Nawe nshammaa shiporomwe nta ukova lwa fyaaru fyakwe-fo. We mmbwe ashemubatisaa na Mumuyo Mweele na muro. 17Nawe arie nndeeva na woko lwakwe nandeelya efo muunguny wakwe kwiile peru. Na nganu eto natyaalye efo mbesheny yakwe, na muulu nandeuvivya murony ularumikaa.”

18Naasa kalungya-u na marero engyi-se meengyi eveetikaa ashoongoyaa vandu nrumi yeyo ya nsia. 19Naasa mangyi ilya Herode kakooya areryo mmbwe kimaruma kya Herodia ekee nka wa mwanamaye na kimaruma kya makasha moose aletana. 20Na findo filya fyoose fya ngata yeyo keengerya-fo kingyi kanderaya Yohane kifingyony.

Yesu abatiswa

(Mat 3:13-17; Mar 1:9-11)

21Naasa kyikava elyi vandu va kulya urukeny vaenda ibatiswa ni Yohane na Yesu kaveenda indebatiswa. Eefo atereva Iruva, kulya iruveeu kukarauka. 22Na Mumuyo Mweele kansokya kashenkaya. Na fwana yakwe alesha afwanani na kindo kyuumbe kyikee na nyama kyikee sha mbeta. Na unyanga lukavaanga luuka efo iruveeu lwishambaa, “Yeu mmbwe mwana wakwa nkunde shisenywa mmbwe.”

Ufyari lwa Yesu

(Mat 1:1-17)

23Na Yesu muni kava nndu wa myaaka makumi araru elyi alepooka ilosha vandu. Nawe aishiwa mmbo akee mwana wa Yosefu, we mwana wa Eli, 24we mwana wa Matati, we mwana wa Levi, we mwana wa Maliki, we mwana wa Yanai, we mwana wa Yosefu, 25we mwana wa Matatia, we mwana wa Amosi, we mwana wa Nahumu, we mwana wa Esili, we mwana wa Nagai, 26we mwana wa Maati, we mwana wa Matatia, we mwana wa Semei, we mwana wa Yosefu, we mwana wa Yuda, 27we mwana wa Yoana, we mwana wa Resa, we mwana wa Serubabeli, we mwana wa Salatieli, we mwana wa Neri, 28we mwana wa Maliki, we mwana wa Adi, we mwana wa Kosamu, we mwana wa Elmadamu, we mwana wa Eri, 29we mwana wa Yosua, we mwana wa Elieseri, we mwana wa Yorimu, we mwana wa Matati, we mwana wa Levi, 30we mwana wa Simion, we mwana wa Yuda, we mwana wa Yosefu, we mwana wa Yonamu, we mwana wa Eliakimu, 31we mwana wa Melea, we mwana wa Mena, we mwana wa Matata, we mwana wa Natani, we mwana wa Davidi, 32we mwana wa Isai, we mwana wa Obedi, we mwana wa Boas, we mwana wa Salmoni, we mwana wa Naasoni, 33we mwana wa Aminadabu, we mwana wa Aramu, we mwana wa Esrom, we mwana wa Faresi, we mwana wa Yuda, 34we mwana wa Yakobo, we mwana wa Isaki, we mwana wa Abrahamu, we mwana wa Tara, we mwana wa Nahori, 35we mwana wa Seruki, we mwana wa Ragau, we mwana wa Faleki, we mwana wa Eberi, we mwana wa Sala, 36we mwana wa Kaini, we mwana wa Arafaksadi, we mwana wa Semu, we mwana wa Noe, we mwana wa Lameki, 37we mwana wa Matusala, we mwana wa Enoki, we mwana wa Yaredi, we mwana wa Maleleeki, we mwana wa Kenani, 38we mwana wa Enoki, we mwana wa Seti, we mwana wa Adamu we mwana wa Iruva.

Currently Selected:

Luka 3: MASNT00

Highlight

Copy