Luka 2

Iwonika lya Yesu

(Mat 1:18-25)

1Naasa kikava fyeeri efyo ivavaso lyikauka kwa Kaisari Augusto ulana loose lweende ireiyo kya usanu. 2Na kireiyo kilya kyikava kya kyipooka llya meendi Kirenio aleshillya kulya Siria. 3Nalyo vandu vakandereiyo woose, wo nndu na muriny kwakwe kundo aparikye. 4Na Yosefu nawe kavekwiipoo auka kulya Galilaya kulya muriny wa Nasareti kaenda kulya Yudaya muriny wa Davidi uvaangwaa Betilehemu, nnyeli akee nndu wa efo ufyariny lwa Davidi, mfo ukuuny lwakwe.

5Nandereiyo ando amwi na Maria tindi yakwe nawe akufingye. 6Naasa kyikava elyi vakaa-fo kafika kyeeri kyakwe kya iira mwana. 7Kaira mwana wakwe wa mbee kamfingya firami, kamwaara mundiny wa ng'umbe, nnyeli kulaore valeona mwaanya efo mmba ya veny.

Veesi na vasu

8Naasa kyuungony kilya kyeni kweefo veesi velele mbateny veshaala makamba a iringa ironda lyawo elyi kio. 9Paripari vakasheyo ni nsu wa Nndumi na itumbe lya Nndumi lyikavamikya, vakaringityo ni sa riti. Vakairyaa nnu. 10Nsu ulya wa Nndumi kavavia, “Nta mulairyaa-fo! Mashika akakau shiifo mmongoyaa Nrumi ya Nsia nayo ikaa ifike kwa vandu woose. 11Mashika mwamiiryo NKIRA inu mmbwe Kristo akee Nndumi efo muriny wa Davidi. 12Na wende shamoora; Mmbo mushekooya nkoku yeto akee mfingye firami akee mwaare mundiny wa ng'umbe.” 13Nalyo pariparii kulya kwa nsu ulya wa Iruva kukasha ikuumbye-u nsemu mwiingyi nng'u matorito efo iruveeu. Vakaarafuma Iruva vakaamba,

14“Nnduma ulele Iruva efo kukee uuwe ya findo fyoose

na kunu urukeny kukava na ufoo efo kwa vandu vakundikye.”

15Nalyo kyikava elyi vasu valya va Iruva vankwiipoo kulya veesi valya vakai vaende Iruveu, nawo vakaumburana wo veni na veni, vakaamba, “Ndifony-te lweende lutani lwafika kulya Betilehemu, lundelola kindo ekyo kyatanyika ekyo Nndumi aloongoya.” 16Vakaenda veerishaa vakakooya-fo Maria na Yosefu na nkoku ulya akee mwaare efo mundiny wa ng'umbe. 17Naasa elyi vallolya vakandevambisa mbony eto valevio kya mwana ulya. 18Na vandu vaita vakasongololo woose kya mbony tilya vavio ni veesi valya. 19Na Maria kavika marero alya moose efo nriminy eeswongyaa. 20Na veesi valya vakawuya na kwawo veshiitikisaa Iruva na imwaarafuma kya findo fyoose valeeta vakavelolya indo-da shaasa valevio.

Yesu afishyo irina

21Na elyi mikonu yamfika nyanya llyo kyeeri kyakwe kyeenda irinwa, kafishywa irina lyakwe ni YESU, llyo alefishywa ni nsu ulya wa Iruva kyeeri kilya kulaore maye enkufinga.

Yesu arawa Mmba ya Iruva

22Na elyi mikonu ya Yosefu na Maria yamiinana ya yeenda ikweeremuta kyikwaani na uvavaso lwa Mose vakandenrosa na kulya Yerusalemu, vandenserisya na efo kisanguny kya Nndumi. 23Shaasa kikee kireiye efo uvavasony lwa Nndumi kyeamba, “Wo kindo kyuumi kiruaa nsanga wa maye kuti kyivaangwa ni kindo kyeele kya Nndumi.” 24Vakatana na kyingi-se kyikee kyivavasye, ni indeniingya kiraso shaasa kyikee kirere efo uvavasony lwa Nndumi, nakyo ni mbeta ivii ao maana avii a mbeta ta mmba. 25Nalyo akakau nndu akee kulya Yerusalemu na irina lyakwe ni Simion. Nawe ni nndu wa usumanu mwiindya Iruva. Kaveva nndu avereyaa kiviiryaa Israeli muu akee nkaye ni Mumuyo Mweele. 26Nawe akee moore Mmumuyo Mweele kyembia nnashefwaa kulaore alolya mbele Kristo eto wa Nndumi-fo. 27Nalyo kasha na efo mmba ya Iruva aitikwa ni Mumuyo Mweele. Na elyi vamiku va kimwana kyilya Yesu veefo vamweende na efo mmba ya Iruva vashemmbutya shaasa kyikee mbuka ya uvavaso, 28kasha imbwarya na maako, kaarafuma Iruva kaamba,

29“Ulaalu shisamaany yeny kishinga kyafo Nndumi

shikweengye na ufoo shaasa kuleamba.

30Kimmba miso akwa allolya ukiro lwafo,

31yelo kudeesye usanguny lwa vandu va masanga moose.

32Ukiro elu nsa iniingaa vandu va masanga

vakooye irambuyo mbony tafo.

Na vandu vafo va Israeli vavikwa itumbeny.”

33Na ndeye na maye vakava mmbo vatirwa ntamba veshiitaa kyilya kyarerwa kya mwana ulya. 34Na Simion kavavikya mbora kavia maye we Maria, “Yeu mmbo akee mmbike-u naambo va kunu Israeli veengyi vakooye iwa nawe na isalala nawe; naveva na wende lurerwa kya iipalwa. 35Na yewe usu lukaa lukwiire efo ngoony na makusaro a vandu veengyi naambo akooye imanyika paa.” 36Naasa kwiiyo na nndu nka mwauya kisuku we Anna akee mfu wa Fanueli wa efo ufyariny lwa Aseri. Nawe amaaye fyeeri fiingyi enkaa na mmi ando a myaaka mfungare uka ammalyikwa. 37Nawe ni nka wa ding'u, na kya ukuu lwakwe amaaye myaaka makumi nyanya na iina. Nawe nnyelakana efo mmba ya Iruva-fo, kava mwiindya Iruva ekootoyaa na itereva Iruva kio na nsanyiny. 38Nalyo kyeeri kyilya kasha nang'u kaitikisa Iruva. Kandeongoya vandu mbony ta mwana ulya Yesu, valya veefo vaverayaa kufike elyi makiryony a Yerusalemu.

Iwuya Nasareti

39Naasa elyi vammaa iinutya filya fyoose fikee fivavasye ni Nndumi vakawuya na kulya muriny kwawo kulya Nasareti. 40Na mwana ulya kaenda eng'anaa na itumaa eshishwaa urango usha, na iwona ikyiiyo efo kwa Iruva.

Yesu kulya mmba ya Iruva

41Naasa vamiku vakwe veshendaa na kulya Yerusalemu wo mwaaka elyi kwamfika nkonu ulya nniini wa Pasaka. 42Nawe ekifita myaaka ikumi na ivii, vakaveenda inderwa nafo, shaasa vandu vaishivye iindya nkonu ulya nniini. 43Naasa elyi vammawutya mikonu ilya miniini, varie shia yewuya na kyeny, mwana ulya Yesu karewa kulya Yerusalemu vamiku vakwe valeeshi. 44Vakakummbwa kulakooye akee na vandu va kyaaro. Vakaenda efo shia ando a nkonu umwi. Vakansia efo kwa vandu va ufyari, na efo kwa vandu vaishivani nawo. 45Nta valallolye, vakawuya na kulya Yerusalemu, vandensia-fo. 46Kukaira-u mikonu iraru, vakatana vankooya akee rembo efo nnang'ani ya valori valya avaaranyaa na ivavesa mbony. 47Na valya veiyo vemmwaranyaa vakauma ng'any kya urango lwakwe na mbony tilya arouwa. 48Naasa elyi vallolya indo vakaising'ang'a. Na maye kammbia: Mwana-akwa nkyiki elyi kwalutannya indo? Lla-te ndoo na yeny lwakusia na ting'wa-dwa! 49Nawe kavavia: “A ekyo mwashisiiya nkyokyi? A mmbo mulaishi kundo kushisumanyi isinda ni efo kutiri findo fya Nde?” 50Nawe kyirero kyilya avavia nta valakimanyi. 51Nawo kandeoloka nawo kasha na kulya Nasareti. Kava Mwana avatirye vio. 52Na Yesu keengera irangwa na ing'ana na ikyiiyo efo kwa Iruva kasennya Iruva na vandu.

Currently Selected:

Luka 2: MASNT00

Highlight

Copy