Mashora 23

1Paulo kalola vandu va ikwaanu elyi karii, kaamba, “Vanavama, yeny shitiri nrima mwaa mmbo shilekaa mbee ya Iruva fika inu.” 2Nkohani nniini we Anania kavavasya valya vakee kufii nawe vakape Paulo kana. 3Llyo na Paulo kammbia, “Iruva akukapaa neewe, yewe kuvakye isimamba ukee mwaambe yeela. Yewe mmbo kwakaa rembo kushiutye uvingo kisumani na mavavaso, neewe kwawuya yaamba shakapwa kilasumani na mavavaso?” 4Valya vesalalyi kufii vakaamba, “A mmbo kushaararaa nkohani nniini wa Iruva.” 5Nshamanya-fo nyira, sheelyi we ni nkohani nniini-fo; mashika lyo kyikee kireiye, kularere nnini wa vandu vafo kikasha-fo. 6Llyo Paulo alemanya ikyenga lyimwi ni Vasadukayo, neelyo lyingyi ni Vafarisayo, kawonisa unyanga alya ikwaanuny lyilya kaamba, “Nyira vanavama vakwa, yeny mmbo shikee Mfarisayo mwana wa Mfarisayo, yeny shikee yuutywa uvingo kyeendwa ni iirikyo lya iruka lya vafu.” 7Ekimaa irera indo kukasha-u ulai nnang'ani ya Vafarisayo na Vasadukayo, ikwaanu lyikatarakana. 8Mashika Vasadukayo wo mmbo vaamba nkwiifo iruka lya vafu-fo, nta vasu-fo, nta mumuyo-fo, kyaindi wo Vafarisayo mmbo veerikye efyo fyoose. 9Kukasha-u kyoorongye kiniini. Vaarya va fitabu valya maata va taari ya Vafarisayo vakasalala, vakaumburana vakaamba, “Llulollye ukasha loose kwa nndu yeufo; kyaindi kwakooya Mumuyo ao nsu anrera nawe, niindaany?” 10Llya raa niini ileshau, nshilyi ulya wa vasikari katirwa nnyinyira, valasheenratwa, kavavasya vasikari vaoloke vanturushwe efo maakony awo, vamweende kulya turuveny.

11Kio kilya Nndumi kasalala kufii nawe, kaamba, “Tira nrima nkaari; mashika, shaasa kuleshikureekya kunu Yerusalemu, kikukooye kushikureekye indo indo na kulya Rome.”

Vayuda vavika kyama kya inaa Paulo

12Kyeeri kulekya, Vayuda vakasanga ando amwi, vakalya mboo, “Kyeyaamba mmbalyaa nta inafo kutani vawaa Paulo. 13Neewo valelyiiyana mboo indo vefikye vandu mwasi ya makumi aana.” 14Naasa vakeenda kwa makohani vaniini na vamiku, vakaamba, “Mmbo lwankufinga na mboo, llukombaa nta kindo-fo kutani lwawaa Paulo. 15Naasa yeni ando amwi na vamiku va ikwaanu vieny nniini wa vasikari namoolote alya si kwany, kive sheelyi mmbo mukundye imanya mbony takwe nisha mwasi, neese lukudeesye immbwaa nalandefika-u.” 16Nndu umwi mwana wa mfwamaye wa Paulo ekiita kyama ekyo keenda kandekivia Paulo kulya turuveny ilya. 17Paulo kavaanga nshilyi umwi kammbia, “Rwaa nsoro yeu kwa nshilyi wa vasikari, mashika atiri kindo kyemmbia.” 18Naasa kamwiipoo kandenrwaa kwa nshilyi ulya wa vasikari, kammbia, “Mfungwa ulya avangwaa Paulo mmbo ashivaanga naambo shikweengye nsoro yeu mashika atiri kindo akundye ikuvia.” 19Nshilyi ulya nnini kantira woko kanrwaa mbai, kammbesa kirika, “Nkyokyiro ekyo kukundye ishivia?” 20Kaamba, “Vayuda mmbo valefisha kyama vakutereve koolote Paulo ndesi, kundemmbika alya mmba ya shila, kive sheelyi vakundye imanya mbony takwe nisha mmwasi. 21Naasa yewe kulairikye-fo, mashika vandu mwasi ya makumi aana mmbo vafishye kyama ando amwi vakalya mboo vare valalya nta ina kutani vawaa Paulo. Ulaalu mmbo vankudeesya iinutya kyaasa kyawo.” 22Naasa nshilyi ulya kara nsoro ulya keenda, embavasaa, “Kulavie nta nndu umwi-fo sheelyi kwanshivia mbony yeyo-fo.”

Paulo arawa kwa vaniini va uruka

23Kavaanga vashilyi vavii kavavia, “Deesyeny askari mayana avii veende Kaisaria, na askari makumi mfungare va frasi, na va mafumu mayana avii, saa isaru ta kio. 24Deesyeny na frasi musaamisefo Paulo, munrwaa waarya nafike kwa Feliki nshilyi wa uruka.” 25Kareiyany barwa indi, 26“Ni yeny Klaudio Lisia shakureiya Mwiitori Feliki mmbee, shakwidikira. 27Nndu yeu mmbo aletirwa ni Vayuda vakasia immbwaa, llyo sheenda na itorito lya vasikari shandemuuta, kyeeri shileeta sheelyi we ni Mroma. 28Llya shilekunda imanya kikumbo vanriiye, shamweende mmba yeerumbuya myaandu. 29Shakooya ate mmbo vakeenkumba kimaruma kya mbony ta uvavaso lwawo, nta nnyakeekumbwa kimaruma kya irero lyoose lyinkooye nawaawa-fo, nta ifingwa-fo. 30Fika kyeeri shileeta sheelyi kwiifo ntambo vatiri uwe yakwe, shalollya nkuti shimweeende kwafo swany, shavia na valya venkapa vasheamba mbony tawo mbee yafo. Nakwafo mbe!” 31Naasa vasikari valya vakakurika Paulo shaasa valevavasyo, vakamfika kwa Antipatri kio; 32elyi lya ndesi vakara veesama frasi vanrwaa, we vakawuya kulya turuveny. 33Nawo kyeeri valefika Kaisaria, neeningya Mwitori wa uruka barua ilya, vakafita Paulo mbee yakwe. 34Ekimaa iisoma kavavesa, “Nndu yeu ni wa taari ingai?” Kyeeri alevywa ni wa Kilikia, 35kaamba, “Yewe mmbo shikwaaranyaa kyeeri valya vakeekukumba vashaa.” Kavavasya naringwa nakee kulya mmba ya mwitori ulya Herode.

Currently Selected:

Mashora 23: MASNT00

Highlight

Copy