Mashora 22

1Kaamba, “Yeni vomi, vanavama vakwa na vande vakwa, kye shaaranyiny shiireraa kyakwa shimuni yaa mbee yaany ulaalu.” 2Vekiita mmbo akeerera nawo kwa Kiebrania vakaengera isyado, kaamba, 3“Yeny ni nndu wa Kiyuda, shiwonikye Tarso, muri wa Kilikia, lyo mmbo shilelyo yaa muriny yeu, marendeny a Gamalieli shaloshwa mavavaso a vande veru nisha nnu, sha nndu wa usasari kwa Iruva shaasa yeni muvekai inu. 4Shalyisa vandu va Shia yei ya Nndumi ukiva neevawaa, shavarwaa kifingyony, ee, vomi na vaka. 5Shaasa na Nkohani Nniini eshidimaa ishikureekya, na vamiku va ikwaanu woose-da, yewo shilewarya barua kwawo naambo shirwaye wooroye vawo, sheenda Dameski, naambo shindeende yewo veefo vashe Yerusalemu, vekee veenive naambo vasheorotwa.”

Paulo aniingya ukureeki kya ukiro lwakwe

(Mav 9:1-19; 26:12-18)

6“Naasany kyeeri sheenda, kufii shifike Dameski, kyeeri kya nsanyiny mwi usimbiki, paripari sa niini ikooka iruveeu ikashiringitya taari toose. 7Shawa si, sheeta unyanga lushaambaa, ‘Saulo, Saulo nkikyi elyi kukeeshivavisa?’ 8Sharouwa, ‘A ni yewe vi Nndumi?’ Kashivia, ‘Yeny ni Yesu wa Nasareti, yeto yewe kukeemmbavisa.’ 9Valya vekee neeny valelollya sa ilya lyo mmbaleita unyanga lwa yeto alerera neeny-fo. 10Naasa shaamba, ‘A shatana inda Nndumi?’ Nndumi kashivia, ‘Salala kwaange Dameski, neefo kushevioo findo fyoose fikee fivavasye kutani.’ 11Na kyeeri shilelemwa ilolya kimaruma kya itumbe lya sa ilya, shateterwa ni maako a valya vekee neeny shaanga Dameski.”

12“Naasa nndu umwi evaangwaa Anania, nsaari wa isora mavavaso, akee nkureekye mesha ni Vayuda woose va efo, 13kashisheya kasalala kufii neeny, kashivia, Mwanama Saulo, lola, ‘Shamwipoiyo miso akwa sa ilya sheni.’ 14Kaamba, ‘Iruva wa vande veru mmbo alekusauwa yewe kukooye imanya filya akundye, neelola yeto muni usumanu, na yaaranya unyanga lushuukaa kaniny kakwe. 15Mashika mmbo kushevaa nkureeki wakwe kwa vandu woose, wa findo efyo kulelollya neefiita. 16Naasa ulaalu nkyoki kukeevera? Salala kubatiswa, kusangyo ngyulyamari tafo, kwiivangaa irina lyakwe.’ ”

Uvaango lwa Paulo kyeelosha vandu va masanga

17“Naasa kyeeri shewuya Yerusalemu, shiiterevaa efo mmba ya Iruva, shava sheely shikee yuuma, 18shallolya Nndumi nawe kashivia, ‘Uka yaa Yerusalemu uviny, mashika mmbasheirikyaa ukureeki lwafo kya mbony takwa-fo.’ 19Neeny shaamba, ‘Nndumi, wo veeshi sheelyi yeny mmbo shevikaa kifingyony valya vakekukusirya neevakapa efo mmba toose teeterevya. 20Na samu ya Stefano nkureeki ulya wafo kyeeri ilepusuwa, neeny nyoo mbai shesalalyi, sheerikya, neeringa soori ta valya valemmbwaa.’ 21Nawe kashivia, ‘Enda, mashika yeny nshekurumaa kweende kwaasha kwa vandu va masanga.’ ”

22Vakamwaranya kafikya irero elyo, vakaongora, vakaamba, “Muute yaa urukeny, mashika nkivaa nakee na muu-fo.” 23Kyeeri vekee irorongya na yeereera soori tawo na ifwalafwala kiluulyi uwe, 24nshilyi ulya wa vasikari kavavasya Paulo neendwa kulya turuveny, kaamba naveswa mbony takwe ekapwaa na ngova, naambo namanyi na kimaruma vakankapya kyorongye indo. 25Vekimaa imfinga na kyoove, Paulo kavia nshilyi ulya ekee kufii nawe, “A ni kindo kya usumanu ikapa nndu Mroma indi kulore anrumbuyo mwaandu?” 26Nshilyi ulya aita indo keenda kandevia nshilyi ulya nniini, “Nkyoki kukundye itana? Mashika nndu yeu ni Mroma.” 27Nshilyi nniini kasha, kammbesa, “Nkyeshivia, yewe ni Mroma?” Kaamba, “Yee.” 28Nshilyi yeto nniini kammbia, “Yeny mmbo shilewonisa Uroma na shia ya fesa shiingyi.” Paulo kaamba, “Neeny mmbo shekee roma kwa iwonika.” 29Naasa valya vekundye immbesa vakanrau vakeenda. Na nshilyi ulya nniini nawe keereya, llya alemanya ni Mroma, mashika a llya alemfinga.

Paulo arawa kifingyony

30Elyi lya ndesi ekundye imanya songosiny, ni kwa kiteve-ki Vayuda vakashenkumba, kamporomwa, kavavasya vaniini va makuhani na shila yaawo shoose vavike ikwaanu. Kaolota Paulo, kammbika yoo mbee yaawo.

Currently Selected:

Mashora 22: MASNT00

Highlight

Copy