Matayo 23

Gurbu'úngw Yesu daanduú intsaahhatuusér hara'ayár Musa nee múk Farisayo

(Mk 12:38-40; Lk 11:39-52; 20:45-47)

1Yesu iri oó' dír boo/oó muu nee eeharuuseerós, 2“Intsaahhatuusér hara'ayár Musa nee múk Farisayo taa iwiít gawaá kitángw Musa as hara'ayaarós kawa alki/iiti. 3Gawaá adoorihe umuúqo gaaro ar ni kuungá' i ooiya', oohaak nee ka tlehhá'. Ala tlehhemi'iidá' inooín ta tlehhiiti, mi tleehhara'. Asma inooín tidá' ta kaahi ka tlehhiitiiká. 4Inooín huuwaá ilo' ki tsegiit nee kiri tsa/amiis gawaá sum'aá muu. Nee inooín tam kwatiitár diitsaro ka slaiiká. 5Asma tlehhemi'ii'ín sleémeero kin tlehhiit as muu ngiwa ga/ay. Inooín slambaré/uuín kuduú firo ngun dogiitiyá' nee hirituú tsaafoó inqwaruuín ngun ureemisiyá'. 6Kiteeraá geera ngin tsawdaaditiyá' doó kiwa dahi'isi, nee baraá maraá saaliingo sleeme. 7Inooín kan slaa' kiwa taaqweemisi dír boo/oó muu barkaa áy. Slám ka slaa' muu ngiwa intsaahhatuusér ar ateetin. 8Ala kuungá' mutunduwa intsaahhatuusér ar ateetín asma Intsaahhatusmoohúng a wak, nee kuungá' sleémeero a hhae. 9Kuungá' hee mu baabá ar ateetimaara' baraá yaamuuwo, asma Baabuúhúng a wak, inós an kuduú gawaá doorí dirií'. 10Slám kuungá' mutunduwa geeraharuusér ateetín, asma geeraharusmoohúng a wak, inós an Kristo. 11Nee heedaádá' úr dirhunge, masók inós a sagadiyusmoohúng. 12Umuúqo heewo oo ti kilós ureemiís ku niinawees, nee kudá' ti kilós niinaweemiís, ku urees.

13“Kuungá' hhaahhafuúse, intsaahhatuusér hara'ayár Musa nee múk Farisayo, a tsaxwa sakwasleemarhúng kawa wa /akuta'. Asma kuungá' afkuú doó waawuti'iimár Mungú una tsegé' as muu miwa dáh. Gím kuungá' kilá' a ak data'aaká, slám mukdá' daráh u ak geemeera'aaká iwa dahi. [ 14Kuungá' hhaahhafuúse, intsaahhatuusér hara'ayár Musa nee múk Farisayo, a tsaxwa sakwasleemarhúng kawa wa /akuta'. Asma kuungá' muruú kwaeeli un /aa/agá', nee firór yaariir a firaariindá' ar hhaahhafiingw. Gawaá adoorihe sakwasleemarhúng ka ak ur.]

15“Kuungá' hhaahhafuúse, intsaahhatuusér hara'ayár Musa nee múk Farisayo, a tsaxwa sakwasleemarhúng kawa wa /akuta'. Asma kuungá' an harweeririindá' baraá tlawtá wa ale nee baraá yaamaá kaahare as heé wák kuwa eeharusmoohúng tlehha'. Ala bura eeharusmo tlehhé', kuri heé tlaákw tlehhá', oo kwahhtá baraá asltá daqisleém wa hariím, sagaáwa tsár ta kuungae.

16“Kuungá' geeraharuúse, kuungaásingá' taampu, a tsaxwa sakwasleemarhúng kawa wa /akuta', kuungaásingá' kaahá' gídaabá, ‘Hee birtaa lu'umís ar Doó Mungú, gaarós i káhh. Ala hee bir taa lu'umís ar miislidár Doó Mungú, lo'oodá' gu eér.’ 17Kuungá' a daktana nee a taampu. Asma gár ak ur a gaalá? A miislidáe, laqaá a Doó Mungú oo miislidá' ga hhehhe'eemiís? 18Slám kuungá' a kata', ‘Hee bir taa lu'umís ar meésaadár baraá Doó Mungú, gaarós i káhh, ala hee bir taa lu'umís ar ilahhooár daanduú meésaadá' i dirii', lo'oodá' gu eér.’ 19Kuungá' a taampu. Asma gár ak ur a milá? A ilahhooadaádae, laqaá a meésaadár Doó Mungú, tidá' ilahhooadá' gaa hhehhe'ees? 20Gawaá adoorihe, heé ti lu'umís ar meésadár baraá Doó Mungú, aqo tin lu'umis ar meésaadá' nee ar muruudá' sleémeero oo gawaadá' i dirií'. 21Nee heé ti lu'umís ar Doó Mungú, aqo tin lu'umis ar do'dá', nee ar kudá' baraadá' hoót sleeme. 22Nee heé ti lu'umís ar doori, aqo tin lu'umis ar kitángw aleesleemuú Mungú, nee ar kudá' aa gawaadí iwiit.

23“Kuungá' hhaahhafuúse, intsaahhatuusér hara'ayár Musa nee múk Farisayo, a tsaxwa sakwasleemarhúng kawa wa /akuta'. Asma kuungá' ilahhooár manákw nee daantláy nee piripíri an hanmaamisá', ar wák baraá mibaango tawa ar Mungú, ala muruú urén oo hara'aya ugwa meeré', gídaabá sla'aari nee gurtleemu nee haratlintaao. Gár kuungá' tunduwa hariím aqo muruuwí un tlehhá', ala muruuquú hatlá' sleeme mu mawaara'. 24Ala kuungá' geeraharuúse, kuungaásingá' taampu, kuungá' a mak ineerár hingeemisá', ala a angamíár gu/uundá'.

25“Kuungá' hhaahhafuúse, intsaahhatuusér hara'ayár Musa nee múk Farisayo, a tsaxwa sakwasleemarhúng kawa wa /akuta'. Asma kuungá' daanduú isaangi nee oo qwaree/amo in hamtlitá', ala baraadae gár aa hats a malgu'uuma nee har qoomay wasle. 26Kuúng heé Farisayo oo taampa, guruú isaangi ala hamaatleek, as daanduú isaangi sleeme iwa hhoohhoouy.

27“Kuungá' hhaahhafuúse, intsaahhatuusér hara'ayár Musa nee múk Farisayo, a tsaxwa sakwasleemarhúng kawa wa /akuta', kuungá' a slaqás nee /aantaá taa sliík ar chokaá'a. Bira tsee/aá wa aán, ki hhohho', ala baraadane gár aa hats a fadaá múk aa qaatl nee slasla/areema sleémeero. 28Kuungá' sleeme an adoodá', asma burtundu tsee/aá wa ga/áy nee muu, kuungá' a múk ganaá', ala gár baraahúng a hhaahhafiingw nee dee/aanu.

29“Kuungá' hhaahhafuúse, intsaahhatuusér hara'ayár Musa nee múk Farisayo, a tsaxwa sakwasleemarhúng kawa wa /akuta'. Asma kuungá' /aantaá aaruuse in tlehhitá' nee dír /aantaá múk ganaá' kari parootuusé' as inslaslangw'ín. 30Slám a kata' gídaabá, ‘Atén geera qoomaadár baabi'iirene bar an dawaán, atén geera a kahhaán gawaá tseereedár aaruuse ku'uusaro.’ 31Gawaá adoorihe kuungá' ti kiloohúng lamabu'uundá' gídaabá kuungá' a na/'aá mukdá' aaruuse gaa tsuu/. 32Gimsé', qoomayduú baabi'iihúng hatsiisaak. 33Kuungá' a dayshe, slám a na/'aá daysheedá' uren. Kuungá' sakwasleemár baraá asltá baloó gwa'aaká adór kar ilagoba' a adoomá?” 34Yesu iri oó', “Gawaá adoorihe xumiisé'. Án aaruuse ngi amorhúng i ya/aáw nee múk sagaloene, nee intsahhatuusér hara'aya. Inooín bahh'alé kuungá' i tsuu/á', bahh'alé i kiki'iindá', bahh'alé i muxá' baraá maraá saalingwhunge, nee kiwa gusisiinda' umuúqo baraá gixsaro. 35Gawaá adoorihe tseerdu sleémeero nu i ki/iyá', kudá' taa yaamí ku'uús, awa múk tlakweemaá koomaaká, iimír tseerér Habili, kudá' tlakweemaá koomaaká, tam tseerér Sakariú Barakia, kudá' taa gasé' didá' hhoohhoo' ar baraá Doó Mungú. 36Án a kah, kaangwí sleémeero ni hardah gawaá múk qartí.”

Yesu gixsár Yerusalemu ga al/aa/amín

(Lk 13:34-35)

37“Yerusalému, Yerusalému, kiídá' aaruusér tsu/aa/iim, nee kudá' tinda amoorók i ya/aáw kiwa tlaqwaaqut ar tlaa/e. A sagaáwa magá' án mukók nguwa dinkwár i burumburtá wa slaá', adoodár koonki tsiioorós ngir dinkwár i burumburaariin baraá hhaampi'iiwós i alé, ala kuungá' aga ya/aandi'iiká. 38Ga/aawaak, kuungá' tundu dewa'aamér i geexáy. 39Asma án a kah, aníng i baloó aanda'aaká daxta ay dír ti oa', ‘I xirfuuti kudá' hardáh ar umuú Aako.’”

Currently Selected:

Matayo 23: IQWNT

Highlight

Copy