Ebarua ya Yeremia 1
1
1Egi kopi y'ebarua eyo Yeremia yatwekeire abantu ba Yerusalemu, omukama wa Babiloni asigire akanya kake kubakwata akabatwara endore Babiloni. Nebamanyisa ebyo Ruhanga yamuhangiire kubagambira.
Abantu nibaija kugya omu buzahe ebiro bingi
2Yeremia abagambira ati, Nebukadineza omukama w'Abababiloni alibatwara endore Babiloni, aha rw'okuba mufakaliire Omukama. 3Aha rw'ekyo orwo muligya Babiloni muliikarayo emyaka nyingi, mumareyo eibanga lirai kugoba aha muzarwa gwa mushanju, ahanyuma ndibaihyayo mbagarure omu milembe. 4Omuli Babiloni omwo mulibonamu baruhanga abakolize efeza n'ezahabu n'ebiti, abantu babashutulire aha mabega mara nibatinisa abatakansi. 5Kityo mulimanya mutaliziza kushana banyamahanga anga kutina baruhanga abo, orwo mulibona abantu babatwete omu mandamano nibabafukamira. 6Shana mutekeleze omu mitima yanyu muti, “Waitu Mukama turagiirwe kufukamira iwe.” 7Omumalaika wange alibalinda, alibamanya.
Ebihuuku tibigira mugasho
8Ababuya bateleza endimi za baruhanga abo, mara babasiiga ezahabu n'efeza, kyonkai ni baruhanga b'ebishuba mara tibashobora kugamba. 9Abantu bakwata ezahabu bakolera baruhanga babo enkinga z'okubajweka omu mutwe, nk'ezo bakolera omwisiki agonza emilengyo. 10Kandi orundi abakuhani baihya efeza n'ezahabu bwesheleke ahali baruhanga babo bazikoza ebili byabo, 11nangu orundi bazitwara omu bamalaya. Abantu nibakwata baruhanga aba ab'efeza n'ezahabu n'ebiti nibabajweka emyendo okwobon'oti bantu. 12Baruhanga aba tibaina kwetanga kumoma anga kuhwelera. Orwo balikuba babajwekire ekanzu za zambarau 13baragiirwe kubaragaza n'akamate k'echuchu omu buso elikwimuka omuli rwensinga. 14Okw'obona omutwazi, ruhanga nk'ogwo nakwata enkoni y'obukama, n'orwo atalikushobora kwita muntu wena wena amushobize. 15Ekihuuku ekyo omu mukono gwa bulyo kikwete omuhyo, kiina n'embaizi. Kyonkai tikiina gekiza batakiita mu ndashana anga kwanga kwibwa bashuma. 16Aha rw'ekyo ekyo kili aha mushana okwo ebihuuku ebyo ti baruhanga kwo. Kityo mutabatina.
17Nk'okwo esahani y'omuntu eyatikire eburwa omugasho, nikwo na baruhanga abo abo balikuteka rwensinga bali. Abantu abalikutaha rwensinga amaguru gabo nigatumuura echuchu, niyo eijwire baruhanga abo omu maisho. 18Okwo enyigi zona zikingwa bakingiraine omuntu afakaliire omukama akashusha owo baramwire kwasha, n'abakuhani nikwo balinda rwensinga zabo nibazikingisa enyigi n'ebitasa n'emihingo, ababisha bataija bakabinyaga. 19Babahembera etara zingi ezilikushaga ezo bonene bahemba omu maju gabo, n'orwo baruhanga babo abo batalikushobora kubona tara n'emoi. 20Nibashusha epapi omuli rwensinga. Leronu obuhuka kuruga omw'itaka bukalya baruhanga abo n'ekanzu zabo, ekyo tibakimanya. 21Amaisho gabo kagairaguzibwa omwika gwa rwensinga, ekyo tibakibona. 22Empugahugu, entaratamba n'enyonyi ezindi zibemeleraho nangu n'aha mutwe, n'enjangu zibatemba. 23Aho mube niho mumanyira okwo batali baruhanga. Mutabatina.
24Ezahabu eyo babasiiga kubalengya, tibaina kwengelera muntu atabasingire bumome. Nangu n'orwo babaire nibabahesha bakaba batalikuhulira kantu. 25N'orwo bagurwa ebilikwiganaki, rwona tibagira mwoyo. 26Abantu babaheka aha mabega aha rw'okutagira maguru; mara ekyo kyoleka abantu okwo batagira mugasho. 27Ababakolera bakwatwa enshoni, enshonga nibo bemeleza baruhanga abo bataija bakakumba. Omuntu kugira owo yayemeleza, taina kweiya mbali bamuta. Kumwegeka taina kweinunura. Babateka ebihongo omu maisho oti nibabiteka omu maisho g'abafu. 28Ebitambo ebihongeirwe baruhanga abo, abakuhani babiguza, kandi empiya bazilya. Ebitambo ebindi abakazi babo babisiiga omwonyu bitajunda, kyonkai tibagira kyo baha banaku n'abataina kyamba. 29Ebitambo ebyo batamba bikwatwaho abakazi bali omu myezi anga abakyali omu kizaire. Orwo mulikumanya okwo batali baruhanga, mutabatina.
30Aha kubaki nibetwa baruhanga? Abakazi nibaihulira baruhanga ebyakulya, baruhanga ab'efeza n'ezahabu n'ebiti. 31Omuli rwensinga zabo, abakuhani bashuntamamu bajwete emyendo etagukire, bamoisize eishoke n'ebileju, n'emitwe etashwekirwe. 32Bakunga baboroga omu maisho ga baruhanga babo nk'okwo abantu omu rufu bachulira afire. 33Abakuhani baihyaho ebijwaro bya baruhanga babo babijweka abakazi babo n'abana babo. 34Omuntu yabakora kubi tibaina gamwehoroza anga ayabakorage tibaina gamurongora. Tibashobora kuteka mukama aha ngoma anga kugimwihyaho. 35Nikyo kimoi okwo batalikushobora kuha muntu itunga anga mpiya. Omuntu kukora ekiragano atakigobize, tibaina kukimutonga. 36Tibatanga muntu kufa, anga abataina mani kubaihya omu mikono y'ab'amani. 37Tibakuhumurura mpume anga kujuna muntu atekeleirwe aha mutima. 38Tibaganyibwa ntumbwa anga kugira karungi ako bakolera nfuuzi. 39Ebintu ebi ebikolize emiti, bisiigire ezahabu n'efeza nibishusha amabare g'omu mabanga, n'ababikolera balishonara. 40Mbwenu aho kubaki atekeleze okwo bili baruhanga, anga kubyeta baruhanga?
Obufera bw'okufukamira ebihuuku
Nangu n'Abakalidayo babakunukuruza. 41Orwo babona omutita atagamba bamutwara ahali Beli bamutakira kubona nk'aramugambisa, nk'okwo obon'oti Beli nashobokerwa. 42Kyonkai abantu bonene ekintu eki tibalikukibona kugir'oti barakileka, kuba baruhanga aba tibaina magezi. 43Kandi abakazi nibekoma enfufu, nibashuntama nyaihanda, nibahemba omushunga nk'abalikuhemba obunuma. K'omuhinguzi alikurondaho omoi agya abyama nawe. Omukazi ogu k'alikugaruka ashekelera ayasigaraho ngu orwo atashemera nka wenene akaburwa ow'okumukomorora orufufu. 44Buli kimoi ekyo balikukolera baruhanga aba bishuba. Mbwenu kubaki omuntu natekeleza ati ni baruhanga, anga kubeta ruhanga?
45Abaseremala anga abahesi b'ezahabu nibo babakora. Tibaina kuba kintu kyona kyona shana kuba okwo ababuya balikugonza kababa. 46Abantu ababakora tibalirora burora burai n'akati. Aho ebintu ebyo bakozire byakuba bitai baruhanga? 47Bakasigira baijukuru babo baruhanga ab'ebishuba mara bakabajumisa; 48enshonga orwo habaho endashana anga orushengo rukagwa, abakuhani babazangana mbali barayesheleka bakasheleka na baruhanga babo. 49Aho kubaki omuntu nalemwa kubona okwo ebihuuku ebi ti baruhanga orwo batalikushobora kwekiza aha ndashana anga aha rushengo? 50Enshonga orwo bakozirwe omu miti bakasiigwa efeza n'ezahabu ahanyuma balimanyika okwo bali b'ebishuba. 51Amahanga gona n'abakama balimanyage okwo ebihuuku ebyo ti baruhanga; bikakorwa abantu, tibina bushobora nka bwa Ruhanga. 52Mbwenu aho n'ohai alikulemwa kumanya okwo ebihuuku ebi bitali baruhanga?
53Baruhanga aba tibaina kuta mukama aha ngoma, kutwara nsi, handiki kuha abantu enjura. 54Tibaina kuramura bintu ebibakweteho anga kujuna muntu abeiyeleirwe, enshonga tibaina bushobora. Nibashusha ekikona omu rwerwerwe. 55Omuliro kagukwata rwensinga elimu baruhanga abakozirwe ebiti, basiigirwe ezahabu anga efeza, abakuhani babo bairuka batafa, kyonkai baruhanga bahya bagutukamu kabili nk'epapi. 56Kandi tibaina kurashana na bakama anga babisha. Mbwenu kubaki omuntu aikilize anga atekeleze okwo ebihuuku ebyo bili baruhanga?
57Baruhanga ab'ebiti, basigirwe efeza n'ezahabu tibaina kutanga bashuma kubaiba anga ababisha kubanyaga. 58Abantu ab'amani babaharuraho ezahabu yabo n'efeza, babajura n'amakanzu, batwara eminyago egyo, kyonkai bonene tibaina gerwanaho. 59Kityo hakili omuntu kuba mukama akoleka obumanzibwe, anga hakili kuba nk'ekikwato ky'omu nju ekikolera mukama wakyo omulimogwe, kushaga okuba baruhanga aba ab'ebishuba. Nangu hakili orwigi rw'enju orukingira ebili omu nju, kushaga baruhanga aba ab'ebishuba. Kwakwo hakili enyomyo y'omu kikaare kushaga baruhanga aba ab'ebishuba.
60Eizoba n'okwezi n'enyanyinyi bigira omuhuliro byaka, bikora okwo biragiirwe kukora. 61Kityo kwakwo n'orurabyo. Karurabya ruboneka oku na kuli. N'omuyaga gwihya buli hantu. 62Orwo Ruhanga ahangira ebichwi kubunda ensi yona, bigobesheleza omuhangogwe. 63N'omuliro oguruga eiguru kusosotora amabanga n'ebibira gukora ekyo guragiirwe. Kyonkai ebihuuku ebi tibina kushushanisibwa bitondwa ebi omu mishusire n'omu bushobora. 64Aha rw'ekyo omuntu atatekeleza okwo bili baruhanga anga kuba nikwo abyeta, enshonga tibigira kyobishobora anga kugira karungi ako byakolera bantu. 65Mbwenu orwo mwamanya okwo bitali baruhanga mutabitina.
66Tibina kuraama bakama anga kubaha mugisha. 67Tibyakukora bitangazo aha iguru anga omu mahanga, anga kwaka nka izoba, anga nka nyanyinyi anga nka kwezi. 68Nibishagwa ebikaaka, kuba byakwiruka byesheleka; biina ekyo byakwekolera. 69Kityo titwina kilikutwoleka okwo bili baruhanga. Aha rw'ekyo mutabitina.
70Okw'obona eititi mbali babibire empambo z'emishuusha litaina kyolilinzire, nikwo baruhanga babo bali ab'ebiti, basiigirwe ezahabu n'efeza. 71Kumoi baruhanga babo ab'ebiti, basiigirwe ezahabu n'efeza, nibashusha akachumitambogo omu busitani, akabandarwaho buli kanyonyi, anga bali nk'omutumbi ogushabwirwe omu mwilima. 72Emyendo yabo ya zambarau na kitani ebatagukiireho niyo muramanyiraho okwo batali baruhanga. Ahanyuma balihwaho, abantu omu nsi babagambeho kubi. 73Aha rw'ekyo hakili omuntu omurungi ataina bihuuku, ogwo taligambwaho kubi n'akake.
Currently Selected:
Ebarua ya Yeremia 1: RHAY01
Highlight
Share
Copy
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.