Embandizo 23

Okufa kwa sara; Aburahamu nagura enziiko

1Sara akarora emyaka kikumi mwo makumi gabili na mushanju. 2Akagwa Kiriatiaraba (niyo Heburoni) omu nsi ya Kanaani. Aburahamu amuchulira, amutekera ekibi. 3Ahanyuma asigaho omutumbi, agya agambira Abahiti ati, 4“Inye omuli inywe ndi mufuruki. Mbwenu mumbonere obuziiko, mbone kuziika omuntu wange, anduge omu maisho.” 5Abahiti bamuhorora bati, 6“Tuhulilize rugaba, nitubona okw'oli mutwazi emanzi. Omu nziiko zaitu orondemu enziiko enungi muno oziikemu omuntu wawe. Ahali ichwe taliho arakwangira nziikoye anga kukutanga kuziika muntu wawe.” 7Aburahamu aimuka ainamira Abahiti, abanyansi, 8mara abagambira ati, “Kamuraba mwaikiliza kanziika omuntu wange akanduga omu maisho, mumpulilize, mara muntagililize Efuroni mutabani wa Sohari, 9ampe empakoye eya Makapela eli omu nsiye aha nzindo. Aginguze omu maisho ganyu omw'iguzi lyayo lyona ebe nziiko yange.” 10Aho Efuroni Omuhiti, ashuntamire omu Bahiti batahibe ahorora Aburahamu, Abahiti nibahulira bona aha kihigi ky'ekigo mbali babaire bateraniire, ati, 11“Chei, mukama wange mpuliliza. Ensi egyo ningikuha, hamoi n'empako egyo egilimu. Ningikuha omu maisho g'abanyaruganda bange, ziikamu omuntu wawe.” 12Aho Aburahamu ainamira abanyansi. 13Agambira Efuroni abanyansi nibahulira ati, “K'oraba noyenda mpuliliza. Oikilize ensi ngigure bugura, nziikemu omuntu wange.” 14Efuroni ahorora Aburahamu ati, 15“Mukama wange mpuliliza, akasi kange kasaine eshekeli bikumi binai z'efeza. Ezo tizina kyozinkwatiire; iwe ziika omuntu wawe.” 16Aburahamu aikilizangana na Efuroni. Aburahamu apimira Efuroni eshekeli bikumi binai z'efeza ezo yagambire Abahiti nibahulira; nk'okwo ebipimo by'abatunzi byabaire bili.

17Aho ensi yona ya Efuroni omuli Makapela eyabaire elebangaine na Mamure, hamoi n'empako eyabaire egilimu, n'emiti yona eyabaire egilimu kulemwa kugoba omu rubibi, 18emanyika omu maisho g'Abahiti na bona ababaire bateraniire aha kihigi ky'ekigo okwo yaba ya Aburahamu. 19Ekyo kakyahoire, Aburahamu aziika Sara mukaziwe omu mpako y'ensi ya Makapela omu bwolekera bwa Mamure, niyo Heburoni, omu nsi ya Kanaani. 20Ensi n'empako egilimu, emanyika okwo Aburahamu yagigura aha Bahiti, eli nziikoye.

Currently Selected:

Embandizo 23: RHAY01

Highlight

Copy