Embandizo 24

Okushelera n'okushwera kwa Isaka

1Aburahamu akura, agurusha muno, kandi ebyo yakoraga byona Omukama akaba abitungire omugisha. 2Agambira omwiruwe, omukuru muno omwa wenene, ayageleraga ebye byona ati, “Ta omukono gwawe omu bibero byange, 3nkunahize obuso bw'Omukama Ruhanga w'eiguru n'ensi; okwo otaihire mwana wange mukazi mu Bakanaani abo ndikuturamu. 4Onnahilire okw'oragenda owaitu omu banyaruganda bange okaba nimwo oihira omwana wange Isaka omukazi.” 5Omwiru amugambira ati, “Rundi omukazi taikilize katwija hamoi mu nsi egi, ahosi ngarure mutabani wawe owanyu mbal warugire?” 6Aburahamu amugambira ati, “Okyekomeleze, otalija okagarura mwana wange kulinya. 7Omukama Ruhanga w'eiguru ayanyihire omwaitu n'owaitu mbali nazaliirwe, ayannahiliire ati, ‘Ensi egi ndigiha baijukuru bawe,’ aratweka omumalaikawe akwebembere, oihire mutabani wange omukazi owaitu omu banyaruganda bange. 8Kyonkai k'omukazi araba ataikiliize kamwija hamoi, aho ekinahiro eki kiraba kitakukwete. Kandi otaligarurayo mwana wange.” 9Aho omwiru ata omukonogwe omu bibero bya Aburahamu mukamawe, amunahilira okwo araihira omwanawe omukazi owabo omu banyarugandabe.

10Omu ngamia za mukamawe aihyamu ikumi, n'omu bintubye byona agira ebyo yaihyamu nk'ebigemuro, aimukya agiire omu kigo ekyo Nahori yaturagamu omuli Mesopotamia obunyaruguru. 11Kayagobire, atekesa engamia amajwi aha iziba ly'amaizi enjai y'ekigo omw'izoba lya bwaigoro ely'abakazi bagenderaho kutaha amaizi. 12Ashaba ati, “Waitu Mukama Ruhanga wa mukama wange Aburahamu, mbwenu ninkushaba bantunge egoshoko, bagilire mukama wange Aburahamu ekisha. 13Leba, nyemeleire aha nchuro y'amaizi, orwo abaisiki b'omu kigo omu balikushohora kutaha amaizi. 14Omwisiki owo ndagambira nti, ‘Ninkushaba oture emuga yawe nyweho,’ akagamba ati, ‘Nywa, mara ndanyoisa n'engamia zawe,’ ogwo obe niwe orondera omwiru wawe Isaka. Aho niho ndamanyira okwo wagilira mukama wange ekisha.”

15Kayabaire atakagwisize, Rebeka muhara wa Betueli, Betueli eya Nahori murumuna Aburahamu ow'alikuzara ahali Milika, aija n'emuga y'amaizi aha ibega. 16Akaba ali mwisiki murungi aha maisho, mubikira atakamanyaga mushaija. Asongoka aha nchuro aijuza emugaye amaizi, atemba. 17Aho omwiru wa Aburahamu airuka kumutanganwa, amugambira ati, “Ninkushaba ompeho amaizi g'okunywa aha muga yawe.” 18Omwisiki ati, “Nywa mukama wange,” arahuka atura emuga aikara agikwete, amuha amaizi anywa. 19Kayabaire yamazire kumuha amaizi yanyoire, amugambira ati, “Ndatahira n'engamia zawe kuhika orwo ziralihuka.” 20Niho honkai ashesha emugaye omu rwato, ashuba airuka agiire aha iziba, atahira engamiaze zona. 21Omushaija aikara ayesilize kuleba nk'Omukama yagoshora orugendorwe anga chei.

22Orwo engamia zamazire kunywa, omushaija akwata eheleni y'ezahabu ey'obusikizi bw'enusu shekeli, n'ebangili ibili ez'aha mikono, obusikizi bwazo shekeli ikumi z'ezahabu; 23abaza omwisiki ati, “Ngambira iwe oli muhara w'ohai? Isi omwanyu turabonamu obushuro?” 24Omwisiki amuhorora ati, “Inye ndi muhara wa Betueli mutabani wa Nahori ahali Milika.” 25Ayongeraho ati, “Twina byombili: Obunyasi n'ebyakulya ebilikumara, n'obushuro.” 26Omushaija ainama afukamira Omukama, 27nagamba ati, “Asingizibwe Omukama Ruhanga wa mukama wange Aburahamu, atebirwe kishakye n'obwesigwabwe ahali mukama wange. Kandi nanye yampabura omu muhanda yangobya omw'ab'amakwatane ba mukama wange.”

28Aho omwisiki airuka agambira nyina n'ab'omu nju ebigambo ebi. 29Rebeka akaba aina munyanya eibaralye Labani; Labani ashohora airukire nagya mbali omushaija ali aha nchuro. 30Kayaboine munyanya ajwete eheleni, n'ebangili aha mikono, akahulira n'okwo Rebeka munyanya yagira ati, “Omushaija yangambira ati n'ati,” agya agoba omushaija ogwo, amushanga aha nchuro ayemeleire n'engamia. 31Amugambira ati, “Nyegera, iwe kilimugisha w'Omukama; kyonkai nk'oyemeleire aheru? Aha rw'okuba natekatekire enju n'omwanya gw'engamia.” 32Aho omushaija ataha omu nju. Labani akomorora engamia, amuha obunyasi n'ebyakulya byazo, n'amaizi g'okunaba amaguru hamoi n'abo yabaire ainabo. 33Bamuletera ekyakulya kulya, kyonkai wenene agamba ati, “Tinakulya ntagambire kyo ntumirwe.” Labani amugambira ati, “Gamba.”

34Aho agamba ati, “Inye ndi mwiru wa Aburahamu. 35Omukama akatunga mukama wange omugisha gungi; yaba mushongore. Akamutunga amahyo g'entaama n'ente, efeza n'ezahabu, abairu n'abazana, engamia n'endogobe. 36Na Sara muka mukama wange akamuzalira omwana w'obwojo yakaikwire. Mukama wange ahaire omwana ogwo ebye byona. 37Mukama wange annahiize nagamba ati, ‘Otakwihira mwana wange mukazi mu baisiki ba nsi ya Kanaani mbali ntwire. 38Ogende omwaitu omu banyaruganda bange obe nimwo ihira omwana wange omukazi!’ 39Aho ngambira mukama wange ogwo nti, ‘Rundi omukazi taikilize katwija hamoi.’ 40Kyonkai angambira ati, ‘Omukama owo ntura mpulira, aratuma omumalaikawe agende na iwe, agoshore orugendo rwawe, mara oraihira omwana wange omukazi omwaitu omu banyaruganda bange. 41K'oragya omu banyaruganda bange, handiki kabatakuhaire mukazi, aho okunahira kwo nakunahiza kuraba kutakukwete.’

42“Kir'eki kanaija aha nchuro nagamba nti, ‘Waitu Mukama Ruhanga wa mukama wange Aburahamu, kanya aka k'oragoshora orugendo rwange orwo ndimu,’ 43okwo nkemeleire aha nchuro, omwisiki araturuka kutaha amaizi, kandamugambira nti, ‘Ninkushaba ompeho otushugi tw'okunywa aha muga yawe,’ 44akangambira ati, ‘Nywa, mara ndatahira n'engamia zawe,’ omukazi ogwo obe niwe orondera omwana wa mukama wange.”

45“Kanaba nkyabitekeleza ntyo, Rebeka ashohora n'emuga y'amaizi aha ibega, asongoka aha nchuro, ataha. Mugambira nti, ‘Ninshaba otushugi tw'okunywa.’ 46Aihya bwangu emugaye aha ibega, angambira ati, ‘Nywa, ndanyoisa n'engamia zawe.’ 47Ahanyuma mubaza nti, ‘Iwe oli muhara w'ohai?’ Amporora ati, ‘Ndi muhara wa Betueli mutabani wa Nahori ahali Milika.’ Nikwo kumuta eheleni aha nyindo n'ebangili aha mikono. 48Nyinama nfukamira Omukama, nsingiza Omukama Ruhanga wa Mukama wange Aburahamu ampabwire omu muhanda gwonene gwonene kantwalira omwana wa mukama wange omuhara ow'omurumuna. 49Mbwenu aho mungambire nka nimwikiliza kukolera mukama wange obwesigwa n'amazima; kitali kityo mungambire, ndebe okwo ndagira.”

50Aho Labani na Betueli bamuhorora bati, “Ekigambo eki nikiruga aha Mukama, ichwe titushobora kukugambira kibi anga kirungi. 51Rebeka niw'ogu nomubona, omutware, mugende abe mukamwana wa mukama wawe nk'okwo Omukama agambaire.”

52Omwiru wa Aburahamu kayahuliire ebigambo byabo, ainama ahansi afukamira Omukama. 53Aleta ebintu by'efeza n'eby'ezahabu n'ebijwaro, abiha Rebeka, ashuba aha na Labani munyanya, na Milika nyina emilengyo y'eiguzi. 54Aho wenene n'abashaija bo yabaire ainabo balya, banywa, barara omwo. Orwo baimukire bwankya, agamba ati, “Muntaishure nshube owa mukama wange.”

55Munyanya omwisiki na nyina bagamba bati, “K'omwisiki abe akyaikaire na ichwe kake, buzima ebiro ikumi, ahanyuma yakugenda.” 56Kyonkai abagambira ati, “Orwo Omukama yagoshoire orugendo rwange mutankelereza, muntaishure ngende owa mukama wange.” 57Bamugambira bati, “Katwete omwisiki tumubaze.” 58Beta Rebeka, bamubaza bati, “Omushaija ogu noyenda kugenda nawe?” Abahorora ati, “Ndagenda nawe.” 59Aho bataishura Rebeka munyanyabo n'omuleziwe, n'omwiru wa Aburahamu n'abashaijabe. 60Baha Rebeka omugisha nibagamba bati, “Mwana wa tata, obe nyina enkumi n'obukumi; baijukuru bawe batware ebigo by'ababisha babo!” 61Aho Rebeka aimuka n'abazanabe, bakuba engamia, bagenda bahondeire omushaija ogwo. Nikwo omwiru yatwete atyo Rebeka akagenda.

62Isaka akaba arugire Berilahairoi natura Negebu. 63Akaba yaturuka aheru buli bwaigoro kwerundana; kugya kunaga amaisho abona engamia nizija. 64Rebeka nawe kunaga amaisho abona Isaka, akuburuguka aha ngamia. 65Abaza omwiru ati, “Omushaija olinya ali aheru alikwija kututanganwa n'ohai?” Omwiru ahorora ati, “Ni mukama wange.” Aho Rebeka akwata ekihundwikye ayebunda. 66Omwiru abarulira Isaka byona ebyo yakozire. 67Ahanyuma Isaka atahya Rebeka omw'ihema lya Sara nyina, aba mukaziwe, mara yamugonzaga. Rebeka amaramara Isaka, amwebesa enaku z'okuferwa nyina.

Currently Selected:

Embandizo 24: RHAY01

Highlight

Copy