Ebikorwa 9

Okuhinduka kwa Sauli

(By' 22:6-16; 26:1-18)

1Omu biro ebyo Sauli akaba akyayema kubi abegesibwa b'Omukama, n'okubaita. Agya aha Mukuhani Nyamukuru 2amwenza ebarua z'okugenda nazo Damasiko kumwanjura omu sinagogi zayo. Omu kugira atyo akaba agendeleire k'aragira abo yashanga bali bantu b'Omuhanda gw'Omukama ogu, baba bashaija anga bakazi abalete Yerusalemu abababohire.

3Kayabaire yailira Damasiko, omushana oguli kwagwo gwema omw'iguru gumumulika kibandagara. 4Agwa ahansi, ahulira eiraka nilimugambira liti, “Sauli, Sauli, nongingililizaki?” 5Sauli abaza ati, “Waitu Mukama wab'ohai?” Ogu ahorora ati, “Ndi Yesu ow'olikugingiiza. 6Kyonkai mbwenu oimuke otahe omu kigo, omwo barakugambira eky'orakora.” 7Abantu abo yabaire ainabo omurugendo baterwa akabuta, kyonkai bakahulira eiraka lyonkai, tibaboine muntu. 8Sauli aimuka ahansi. Amaisho gaburura, kyonkai gakaba gatalikubona kantu. Aho bamukwata omukono bamugobya Damasiko. 9Akamara ebiro bishatu atabona, atalikulya anga kunywa.

10Omuli Damasiko hakaba halimu omwegesibwa nayetwa Anania. Omukama amubonekera namweta ati, “Anania!” Ndi ogu ayetaba ati, “Karame, Mukama!” 11Omukama amuragira ati, “Imuka ogye omu mbarabara elikwetwa ‘Mbarabara egorogokire,’ ogye omwa Yuda obazemu omushaija wa Tariso, eibaralye ni Sauli. Leba Sauli ogwo nashoma enshara, 12mara yakuboine omu kubonekerwa notaha omu nju namutaho emikono kumukiza obwigare bw'amaisho.” 13Kyonkai Anania ahorora ati, “Mukama, nahuliire abantu bangi nibagamba omushaija ogu okwo ashasize muno abatakatifu bawe omuli Yerusalemu. 14Kandi aizire abakuhani bakuru bamuhaire obushobora bw'okuboha bona abalikukufukamira.” 15Omukama amugambira ati, “Ogende, aha rw'okuba muronkire kuba kikwato kyange kugya kumanyisa abanyamahanga n'abakama n'Abaisiraeli eibara lyange. 16Ninyija kumwoleka okwo alikuragirwa kushasha muno aha rwange lyange.” 17Kityo Anania aimukya, agya omwa Yuda. Ataho Sauli emikono namugambira ati, “Murumuna wange Sauli, Omukama Yesu akuhabukiire omu muhanda noija kunu, yantuma kukukiza obwigare bw'amaisho, oshube ohabwe Mwoyo Mutakatifu wena.” 18Aho honkai aha maishoge harugwaho ebilikushusha ebikarakamba, biragara, abona. Nikwo kwimuka akabatizibwa, 19n'okulya akalya, akagira amani.

Sauli naranga omuli Damasiko

Ebiro bingi Sauli aikara n'abegesibwa omuli Damasiko. 20Tiyakelereirwe ata nagya omu sinagogi naranga okwo Yesu ali Mwana wa Ruhanga. 21Abamuhuliire bona batangara, bebaza bati, “Omushaija ogu tiwe abaire naita kubi abalikufukamira Yesu omuli Yerusalemu? Na kunu abaire naijayo aha rw'omugendelero gwonene kubaboha akabatwalira abakuhani bakuru.” 22Kyonkai Sauli ayeyongera kugira amani, n'Abayahudi abaturaga Damasiko ababaza ebigambo, nagamba okwo Yesu ali Kirisito.

23K'ebiro byabaire byahingwireho bingi, Abayahudi banaama kumwita. 24Kyonkai Sauli aija amanya enaama yabo egyo. Baikaraga balinzire ebihigi kiro na mushana, nibahiga kumwita. 25Abegesibwa ba Sauli bamukwata bamuteeka omu kitukuru omu kiro, bamusongora aha rukuta bamuturukya aheru.

Sauli omuli Yerusalemu

26Orwo Sauli yagobaire Yerusalemu alenga kwetaba omu begesibwa. Abegesibwa bamutina kuba tibaikiliize okwo na wenene yabaire ali mwegesibwa. 27Kyonkai Barinaba amukwata amutwalira entumwa, amubanjulira okwo yaboine Omukama ali omu rugendo rwa Damasiko, n'okwo omuli Damasiko yabaire naranga n'obumanzi omw'ibara lya Yesu. 28Kityo ata kugenda nabo okwo alikwenda omuli Yerusalemu, 29naranga n'obumanzi omw'ibara lya Yesu. Agamba, ahankana n'Abayahudi abagambaga Orugiriki; nabo bahiga kumwita. 30Abegesibwa batahibe kabakimanyire bamutwara Kaisaria, baba niyo bema bamutwekire Tariso.

31Kityo enteko eguma, egira n'emilembe omuli Buyahudi yona na Galilaya na Samaria. Abaikiliize batina Omukama, mara omu mani ga Mwoyo Mutakatifu beyongera kukanya.

Petero omu Lida na Yopa

32Petero yagya buli hantu, narambura abaikiliza bona. Limoi yagya na Lida kuleba abatakatifu bayo. 33Ashangayo omushaija eibaralye Enea, amazire emyaka munaana ataimuka hansi, akabire orubaju. 34Amugambira ati, “Enea, Yesu Kirisito yakukiza; imuka oyare ekitanda kyawe.” Aho honkai Enea aimuka. 35Abantu bona abaturaga Lida na Sharoni kabamuboine besiga Omukama.

36Omuli Yopa hakaba halimu omwegesibwa nayetwa Tabita, omu Rugiriki n'iwe Dorika (nikwo kugamba Kasa). Omukazi ogwo yajunaga muno abantu n'abanaku. 37Omu biro ebyo arwara, afa. Kabamazire kumwogya bamuteka omu gorofa. 38Lida ekaba eyataine Yopa. Abegesibwa bahulira okwo Petero ali Lida, bamutumaho abantu babili nibamutagiliza k'ayanguha akaija Yopa. 39Kityo Petero aimukya agenda nabo. Orwo yagobaireyo bamutwara omu gorofa. Entumbwa zona zimwemelera aha rubaju nizichura. Bamwoleka amashati n'ebijwaro ebindi ebyo Dorika yakoraga ainabo. 40Kyonkai Petero aturukya entumbwa zona, abandama, ashoma enshara. Ashuba ahindukira omutumbi agamba ati, “Tabita, imuka.” Tabita aburura; kayamazire kubona Petero, ashuntama. 41Petero akwata Tabita omu ngaro, amwemeleza. Aho ayeta abaikiliza n'entumbwakazi amubaha narora. 42Ekigambo ekyo kimanyika omuli Yopa yona, abantu bangi besiga Omukama. 43Omuli Yopa Petero akamaramu ebiro bingi. Yaikaraga omwa Simoni omuhazi w'empu.

Currently Selected:

Ebikorwa 9: RHAY01

Highlight

Copy