Ebikorwa 8

1Omu kwitwa kwa Sitefano, Sauli na wenene akaba abulimu.

Sauli nagingiza enteko

Kwema kir'ekyo enteko omuli Yerusalemu ebanza kugingizibwa ebishobeize. Abaikiliza bona shana entumwa, basingirwa Yuda na Samaria. 2Abantu engonza Ruhanga baziika Sitefano, mara bamuchulira muno. 3Sauli enteko agiita omwebura, naruga nju egi nataaha nju egi, abashaija n'abakazi abakurura abanaga jela.

Evangeli nerangwa omuli Samaria

4Abaikiliza abayenaganagire bakagenda nibaranga ekigambo. 5Filipo agya omu kigo kya Samaria; abantu bamwo abamanyisa Kirisito. 6Ebyo Filipo yagambire abantu bona babitora butozi, orwo bamuhuliire bakabona n'ebitangazo ebyo yabaire nakora. 7Kuba n'amasitani gakaruga omu bantu bangi abo gabaire gakwete, gabarugamu nigakunga. N'abantu bangi ababaire bakabiire orubaju n'abalema bakakira. 8Omu kigo ekyo ebyera bikaba bilimu bingi.

9Omuli Samaria hakaba halimu omushaija omoi eibaralye Simoni, obubere akaba ali mukonikoni omu kigo ekyo, natangaza Abasamaria. Yayegambaga okwo ali muntu w'enshonga. 10Abantu bona bamuhulilizaga, kubandiza aha muntu w'ahansi muno kugoba aha w'eiguru bwoli. Bagambaga bati, “Omushaija ogu bushobora bwa Ruhanga obwo beta, ‘Bushobora buhango.’ ” 11Bamuhuliilizaga, aha rw'okuba akaba yatwete ebiro bingi nabatangaza n'obukonikoni bwa wenene. 12Kyonkai orwo Filipo yabarangiire evangeli ekwete aha Bukama bwa Ruhanga n'aha ibara lya Yesu Kirisito bakamwikiliza aho babatizibwa abashaija n'abakazi. 13Nangu na Simoni wenene aikiliza; orwo yabaire yabatiziibwe ayekwata Filipo. Kayaboine obubonero n'ebyamani agashobeize atangara.

14Aho entumwa kazayemire Yerusalemu zikahulira okwo Abasamaria begesibwe ekigambo kya Ruhanga bakakitora, batumayo Petero na Yohana. 15Entumwa zombili zigya Samaria zibashabira kabatungwa Mwoyo Mutakatifu. 16Nobona bakaba babatiziibwe kushai omw'ibara ly'Omukama Yesu, kyonkai taliho n'omoi yabaire yatungirwe Mwoyo Mutakatifu. 17Aho nikwo kubataho emikono bakatungwa Mwoyo Mutakatifu. 18Simoni kayaboine okwo entumwa zilikutaho abaikiliize emikono bakatungwa Mwoyo Mutakatifu, azihonga empiya 19nagamba ati, “Nanye mumpe obushobora obu, owo ndata kutaho emikono atungwe Mwoyo Mutakatifu.” 20Ndi Petero amugambira ati, “Kasilike n'empiya zawe! Nolenga oti amatungwa ga Ruhanga wakugaguza empiya? 21Ebyo tulikukora tibikukwete, n'omutima gwawe tigulikushemelera Ruhanga. 22Aha rw'ekyo oyechuze entambara yawe egi, mara oshabe ahali Ruhanga, kakirashoboka akugarulire kubona notekeleza ekintu nk'eki. 23Nimbona okwo oli mufakare muno n'ekiisho oina kingi.” 24Nikwo Simoni kuhorora ati, “Munshabire aha Mukama, ebyo mwagamba hatabaho kyangwaho.” 25Petero na Yohana kabamazire kuranga ekigambo ky'Omukama bagaruka Yerusalemu, kyonkai baraba omu byaro by'Abasamaria bitali bike.

Filipo n'omukuru wa Etiopia

26Omumalaika w'Omukama agambira Filipo ati, “Oimukye ogende omu rubaju orwa kasi ogye aha muhanda gulikuruga Yerusalemu nigugya Gaza.” Omuhanda ogwo niguraba omw'inguru. 27Filipo aimuka agenda. Leba Omuetiopia, omukobe, mara omukozi wa Kandase, omukamakazi w'Abaetiopia. Omukozi ogu n'iwe yabaire ali musigire mukuru w'eitunga lyona lya Kandase. Akashangwa agiire Yerusalemu kufukamira Ruhanga. 28Kaanya ako akaba nagaruka, ashuntamire omu gali nashoma ekitabo ky'Omurangi Isaya. 29Mwoyo agambira Filipo ati, “Ogende ogobe haihi n'egali.” 30Kityo Filipo airuka agoba omukozi wa Kandase, amuhulira nashoma ekitabo ky'Omurangi Isaya, amubaza nka nashobokerwa ebyo alikushoma. 31Omukozi wa Kandase amushubamu ati, “Ndabishobokerwa ntai omuntu atanshoboroire?” Ayeta Filipo kutaaha omu gali bakashuntama hamoi. 32Eki nikyo kichweka ky'Ebihandiko Bitakatifu ekyo yabaire nashoma:

“Tiyayatwire kigambo,

akashusha entaama eyo balikutwara omw'ibagiro,

anga nk'okwo omwana gw'entaama gwesiza nibagushara omwoya.

33Bakamushasa yaburwa n'ow'okumurabira.

Taliho muntu aligamba ati, ‘Aba ni baijukurube;’

aha rw'okuba yachweka omu nsi.”

34Omukozi wa Kandase abaza Filipo ati, “Ninkushaba ongambire ow'omurangi alikugambaho ebi. Nabyegambaho wenene anga nabigamba aha muntu ondijo?” 35Aho Filipo abanza kumugambira. Abandiza aha kichweka ky'Ebihandiko Bitakatifu, alemwa amugambira Evangeli ya Yesu. 36Orwo bali aha muhanda nibagenda bagobaera mbali hali amaizi, aho omukozi wa Kandase agamba ati, “Leba aha haliho amaizi! Eky'okuntanga kubatizibwa kiki?” [ 37Filipo amushubamu ati, “K'oraba noikiliza n'omutima gwawe gwona, wakubatizibwa.” Ndi ogu ati, “Ninyikiliza okwo Yesu Kirisito ali Mwana wa Ruhanga.”] 38Nikwo omukozi wa Kandase kuragira omubugi w'egali kugyemeleza. Aho wenene na Filipo bakuburuguka bataha omu maizi, Filipo amubatiza. 39Orwo barugire omu maizi, Mwoyo wa Mukama ashutura Filipo amutwara; omukozi wa Kandase akaba atakimubona, kyonkai akwata omuhanda agenda nashemelerwa. 40Abagiire kubona Filipo bakamushanga Azoto. Agenda naranga evangeli omu bigo byona alemwa agoba Kaisaria.

Currently Selected:

Ebikorwa 8: RHAY01

Highlight

Copy