Ebikorwa 7

Omwegeso gwa Sitefano

1Omukuhani Nyamukuru abaza Sitefano ati, “Ebyo abantu balikukutoijela by'amazima?” 2Aho Sitefano agamba ati,

“Batata na barumuna bange, mumpulilize. Ruhanga ow'ekitinwa akabonekera tataichwe Aburahamu akyali Mesopotamia, atakatwire Harani. 3Ruhanga amugambira ati, ‘Osigeho ensi yawe n'abanyaruganda bawe, ogende omu nsi eyo ndakwoleka.’ 4Aho Aburahamu asigaho ensi y'Abakalidayo, agenda atura Harani. Ishe kayabaire yafire, Ruhanga yamwihyayo yamuleta omu nsi egi eyo mulikuturamu mbwenu aha. 5Kyonkai omu nsi egi Ruhanga tiyahairemu Aburahamu busika, nangu n'ekilenge kimoi kyonkai. Akagiragana kugiha baijukurube abalimuruga enyuma, n'orwo kaanya kalinya yabaire ataina mwana. 6Ruhanga akamugambira ati, ‘Baijukuru bawe balitura omw'ihanga, omw'ihanga elyo baliba bairu, mara babonesibwe enaku emyaka 400. 7Kyonkai eihanga elilibahindura bairu ndiliramura, ahanyuma baijukuru bawe baliruga omu nsi egyo baije banfukamire omu nsi egi.’ 8Aho Ruhanga aha Aburahamu omuchwo gw'okutahiri, kali kabonero k'endagano egyo. Kityo Aburahamu aija azara Isaka, amutahiri aha kiro kya munaana azairwe. Isaka azara Yakobo, Yakobo n'iwe yazaire batat'enkurw'ichwe eikumi na babili.

9“Batat'enkurw'ichwe bakimba murumuna wabo Yozefu ekiisho, bamuguza kuba mwiru, abamuguzire bamutwara Misiri. Kyonkai Ruhanga yayemera Yozefu, 10yamwihya omu nakuze zona, yamuha obuganzi n'obumanyi ahali Farao omukama wa Misiri. Farao yamuha obugavana ahali Misiri yona, yamuteka n'ekaye omu mikono.

11“Omuli Misiri yona na Kanaani haija haterwamu eifa, n'enaku ziba zingi. Aho na batatenkurw'ichwe tibakushoboire kubona kyakulya. 12Yakobo kayahuliire okwo Misiri aliyo engano, atuma batatenkurw'ichwe guli murundi gwa mbere. 13Omw'igenda lya kabili Yozefu aba nirwo ayeyanjulira abarumuna, nirwo Farao yamanyire eka ya Yozefu. 14Yozefu atuma ishe, Yakobo n'abanyarugandabe bona, abantu nshanju na batanu. 15Yakobo agya Misiri. Afa, wenene na batatenkurw'ichwe, 16babagarura Shekemu, babaziika omu nziiko eyo Aburahamu yaguzire efeza ahali batabani ba Hamori omuli Shekemu.

17“Orwo obukiro bw'okuhikya ekyo Ruhanga yabaire araganisize Aburahamu bwagobaire, eihanga lyaitu likanya, lyeyongera omuli Misiri. 18Ahanyuma Misiri etwarwa mukama ondijo ayabaire atalikumanya makuru ga Yozefu. 19Abonesa eihanga lyaitu enaku, agimba na batat'enkurw'ichwe kunaga enkelemeke zabo kazifa. 20Omu makiro ago Musa azarwa, mara akaba ali mwana enshemere, okwo Ruhanga yabaire amutonzire. Bamulera emyezi eshatu omwabo. 21Orwo na wenene bamunagire muhara wa Farao amuronda amuzara, amulera nk'omwanawe. 22Musa bamwegesa obumanyi bwa buli ngeli obw'Abamisiri, aba mushaija w'amani omu bigambo n'omu bikorwa.

23“Musa kayabaire aina emyaka 40 abona agende alebe Abaisiraeli, abarumuna. 24Aija abona Omwisiraeli omoi naboyerwa Omumisiri, aramulira ayaboyerwa, kandi aita Omumisiri. 25Akaba natekeleza ati rundi abarumuna, Abaisiraeli barashobokerwa okwo Ruhanga alikugonza kubarokora omu bushobora bwa Musa wenene, kyonkai tibashobokeirwe. 26Bukeire bunu abona Abaisiraeli babili nibakungana, alenga kubaramura. Abagambira ati, ‘Manya inywe muli barumuna, isi kubaki nimuboyerangana?’ 27Kyonkai ayabaire naboyera mutahiwe asindika Musa nagamba ati, ‘N'ohai iwe akutaireho kututwara okaturamura? 28Noyenda kunyita nk'okwo nyeigoro oisire Omumisiri?’ 29Musa kayahuliire okwo ogu yamuhorora kubi airuka, azahira omu nsi ya Midiani, azalirayo abaana b'abojo babili.

30“Emyaka kayabaire yahingwireho 40, omumalaika abonekera Musa omw'irungu ly'Eibanga lya Sinai omu kishaka ky'omuliro. 31Musa atangazibwa ebyo yabona, nikwo kuhulira eiraka ly'Omukama, ati, 32‘Ndi Ruhanga wa bashw'enkuru, Ruhanga wa Aburahamu, Ruhanga wa Isaka, Ruhanga wa Yakobo.’ Musa ajugumba, n'agaleba Omukama ganga. 33Omukama amugambira ati, ‘Jura ebiratwa omu maguru, aha rw'okuba mbali oyemeleire mwanya Ogutakatifu. 34Mazima naboine enaku ezo abantu bange balimu omuli Misiri, bantakiire nahulira, mbwenu naija kubarokora. Ija nkutume Misiri.’

35“Musa ogu owo bayangire nibagamba bati, ‘N'ohai iwe akutaireho kututwara okaturamura?’ N'iwe Ruhanga yatumire ali mutwazi mara murokozi omu bushobora bw'omumalaika ayamubonekeire aha kishaka. 36Akakora ebitangazo omuli Misiri, yashuba yaihya Abaisiraeli abo omu nsi egyo. Ebitangazo ebindi yabikolera aha Nyanja Rutuku n'omw'irungu emyaka 40. 37Ogu n'iwe Musa ayagambiire Abaisiraeli ati, ‘Omuli barumuna banyu Ruhanga alibaihiramu omurangi nk'okwo yaihiremu inye.’ 38N'iwe yabaire aina enteko y'Abaisiraeli omw'irungu. Akaba ali omw'irungu elyo hamoi na batat'enkurw'ichwe n'omumalaika ayafumoire nawe aha Ibanga lya Sinai, Ruhanga yashuba yamuha ebigambo by'oburora eby'okutugambira.

39“Kyonkai batat'enkurw'ichwe bakanga kumuhulira. Bamwanga nangu bayenda kugaruka Misiri. 40Nikwo kugambira Aroni bati, ‘Otukolere baruhanga batwebembere. Musa ogu atwihire Misiri titulikumanya gamubaireho.’ 41Nirwo bakozire ekihuuku omu mishusire y'enyana, bakakitambira ekitambo, bashemelerwa ekihuuku ekyo bayekoleire. 42Nikwo Ruhanga kubahwamu, bakata kufukamira eizoba, n'okwezi n'enyanyinyi, nk'okwo kyahandikirwe omu kitabo ky'abarangi kiti,

‘Inywe Baisiraeli!

Emyaka makumi ganai omw'irungu

timwaitaga bitunganwa kubitambira inye.

43Mwashuturaga eihema lya ruhanga Moleki,

mwashuturaga n'ekishushani kya Refani,

enyanyinyi ruhanga wanyu.

Nibyo bihuuku ebyo mwabaire mukozire kubifukamira.

Kityo naija kubanaga buseli bwa Babiloni omu buzahe.’

44“Batat'enkurw'ichwe omw'irungu bagiraga Eihema ly'Obusinge bwa Ruhanga. Eihema elyo likaba likozirwe nk'okwo Ruhanga yabaire aragiire Musa kulikora, emishusire eyo Ruhanga yayolekire Musa. 45Ahanyuma batat'enkurw'ichwe Eihema elyo ly'Obusinge balisigirwa baishebo, bagenda nalyo baina Yoshua, balya ensi y'amahanga ago Ruhanga yabingire omu nsi yago orwo babaire nibagiitahamu. Eihema elyo likaikaraho kulemwa kugoba omu makiro ga Daudi. 46Daudi akaganja Ruhanga, yamushaba kuleka eihema akombekera Ruhanga wa Yakobo obusingiro. 47Kyonkai Solomoni n'iwe yaizire kwombekera Ruhanga Rwensinga. 48Kandi okwo Rukirabyona tatura mu maju gombekirwe bantu. Nk'okwo omurangi alikugamba ati,

49‘Eiguru eba nketo yange,

n'ensi kaba katebe kange k'okuhumuzaho amaguru.

Nimwija kunyombekera Rwensinga ehai?

Anga inye mpumulira nkahai?

Nikwo Omukama alikubaza.

50Ebyo byona tibyakozirwe bushobora bwange?’

51“Inywe bantu abalikugumangana emitima! Emitima yanyu neshusha ey'Abanyamahanga; muli bafi b'amatwi; ebiro byona mwikara musimbaliire Mwoyo Mutakatifu. Nk'okwo bashwenkurw'inywe bagiraga, nainywe nikwo mulikugira. 52Ni murangiki owo bashwenkurw'inywe batagingiize? Omugorogoki owo mubanzire mukaita, abamurangire okwo aliija nabo mukabaita. 53Abamalaika bakabaha Amateka kuruga ahali Ruhanga inywe timwagakwata.”

54Abanyarukiiko kabahuliire ebyo bakunkumuka bamunenera akaino. 55Kyonkai wenene Sitefano okwo aijwirwe Mwoyo Mutakatifu, araramira omw'iguru abona Ruhanga omu kitinwakye, na Yesu ayemeleire aha bulyobwe. 56Nikwo kugamba ati, “Leba nimbona eiguru likingukire, n'Omwana w'Omuntu ayemeleire aha mukono gwa bulyo gwa Ruhanga.” 57Kyonkai bonene bakunga muno, baigaza n'amatwi gabo, bamusiliikira. 58Bamukurura omu kigo bamushohoza, bamuteza amabare. Abamwisire bakwata ebijwaro byabo babikwasa omusigazi Sauli. 59Orwo balikumuteza amabare Sitefano ashaba ati, “Mukama Yesu, tora omwoyo gwange.” 60Abandama, ataka n'eiraka lihango ati, “Mukama, singa obagarulire entambara egi.” Kayamazire kugamba atyo, omwoyo guhwamu.

Currently Selected:

Ebikorwa 7: RHAY01

Highlight

Copy