Ebikorwa 6

Abajuni mushanju

1Omu biro ebyo orwo abaikiliza babaire nibeyongera omu rubara, Abayahudi abagambaga Orugiriki bajojobera Abayahudi abagambaga Oruyahudi okwo entumbwakazi zabo batalikuzifaho omu kubagabira ebya buli kiro ebyo babaire nibetaga. 2Entumwa 12 zeta abaikiliza bona hamoi babagambira bati, “Tikisaine ahali ichwe kusiga kuranga kigambo kya Ruhanga kugya kugabira bantu kyakulya. 3Aha rw'ekyo barumuna baitu, omuli inywe murondemu abashaija mushanju abaina eibara lirungi, abaijwire Mwoyo Mutakatifu n'obumanyi, abo turakwasa omuruka ogu. 4Ichwe amani turagateka aha kushoma enshara n'aha kuranga ekigambo.” 5Ebyo bagambire ebyo bishemelera embaga. Nikwo kuronda Sitefano, omuntu aijwire okwesiga na Mwoyo Mutakatifu, na Filipo, na Purokori, na Nikanori, na Timoni, na Parumena, na Nikolao Omunyamahanga ayatabukaga Antiokia, kandi akaba atahire juba omu dini y'Abayahudi. 6Abo baronda aba babateka omu maisho g'entumwa. Entumwa kazamazire kushoma enshara zibataho emikono.

7Ekigambo kya Ruhanga kyeyongera kuranda. Abaikiliza omuli Yerusalemu beyongera muno omu rubara, n'abakuhani bangi baikiliza kimoi.

Okukwatwa kwa Sitefano

8Sitefano akaba aina omugisha gw'amani n'obushobora. N'abantu abakolera ebitangazo n'obubonero obw'amani. 9Aho Abayahudi abandi abarugire omu sinagogi eyayetwaga sinagogi y'obwegeleere, omuli abo halimu Abayahudi aba Kirene na Alekisandiria, bamusimbalira. Nangu bema n'Abayahudi aba Silisia na Asia, bekoma bahankana nawe. 10Kyonkai Sitefano akagambisa obumanyi n'amani ga Mwoyo, kityo tibashoboire kumusinga. 11Nirwo bagenzire bwesheleke bakohya abantu bati, “Tumuhuliire nagamba ebigambo by'okurogota ahali Musa na Ruhanga.” 12Beyongera bajugutiliza abantu n'abagurusi n'Abeegesa b'Amateka, bamuzinda bamukwata, bamutwara omu rukiiko. 13Bamuhangilira bati, “Omuntu ogu talikulekera kurogota ahali Rwensinga ntakatifu n'aha Mateka ga Musa. 14Tumuhuliire nagamba okwo Yesu ogu owa Nazareti alikwija kukambura Rwensinga egi, ashube ahindure n'emichwo eyo Musa yatusigiire.” 15Ababaire bashuntamire omu rukiiko batangalira Sitefano kubona okwo aha buso yashusha omumalaika.

Currently Selected:

Ebikorwa 6: RHAY01

Highlight

Copy