Ebikorwa 5

Anania na Safira

1Omuntu omoi eibaralye Anania, aina mukaziwe eibaralye Safira, agya aguzaho ebilibye. 2Anania empiya ezo yaihiremu aihyaho ezindi azikobekeza, mara na Safira akaba namanya. Ekichweka aba nikyo aleta akakwasa entumwa. 3Ndi Petero amubaza ati, “Anania, kubaki wakunda Sitani kukukiza amani kwija kubeiya Mwoyo Mutakatifu? K'ogulize eitaka, empiya ezirugiremu toina zowakobekeza? 4Orwo likatuuraho litaguziibwe rwona tiliba lyawe? Orwo obaire waligulize manya n'empiya zibaire zili zawe okwo wakwenzire! Mbwenu ekigambo eki kyaija kitai omu mutima gwawe? Wabeiya Ruhanga, tiwabeiya bantu.” 5Anania kayahuliire ebigambo ebyo akuntuka ahansi afa. Abakihuliire bona batina. 6Abasigazi baimuka bamuzinga, bamutwara bamuziika.

7Kazabaire zahinguraho esaa nka ishatu mukaziwe aija. Agafayo tagamanya. 8Petero amuragira kumugambira kabagulize eitaka empiya nka baihiremu zityo. Safira agamba okwo ezo nizo baihiremu. 9Petero amubaza ati, “Kyaba kitai mukaikilijanyia nywembili kulemba Mwoyo w'Omukama? Leba abaruga kuziika mushaija wawe bali haihi. Naiwe bakutware bakuziike.” 10Niho honkai Safira akuntuka ahansi omu maisho ga Petero afa. Abasigazi kabatahire omu nju bashanga nawe afire, bamutwara bamuziika aha rubaju rwa iba. 11Enteko yona etina hamoi na bona abahuliire amakuru ago.

Eby'amani n'ebitangazo

12Entumwa omu bushobora bwazo zikora ebikuru bingi n'ebitangazo. Abaikiliza bona bateraniraga omu Kishasi kya Solomoni. 13Omuntu ataikiliize tiyazizaga kubagoba. Kandi abaikiliza abantu babakuniraga. 14Abantu batali bake abashaija n'abakazi, baikiliza, aho orubara rw'abaikiliza rwikara nirweyongera. 15Ebyo entumwa zakoraga ekyarugire omwo abantu bata nibashutura abarwaire aha bitanda n'aha mikeka nibabateka aha mbarabara omu kigo, buzima baije barabweho ekinyumanyumi kya Petero orwo araba nahingura. 16Abantu baija embaga nibaruga omu bigo ebyataine Yerusalemu, balesire abarwaire n'ababaire bakwetwe amasitani. Bona bakizibwaga.

Okugingiizibwa kw'entumwa

17Omukuhani Nyamukuru aimuka n'abo yabaire ainabo, nigwo muteko gw'Abasadukayo, ekiisho kiraliire kubaita, 18Bakwata entumwa bazinaga jela mbali abantu bafungirwaga. 19Nawe omumalaika w'Omukama aija omw'itumbi, akingura enyigi za jela, amara abagambira ati, 20“Mugende Rwensinga mwemelere mugambire abantu ebigambo by'oburora obu.” 21Kabahuliire ekigambo ekyo kabasigire obwire bwakya bataha Rwensinga beegesa.

Omukuhani Nyamukuru n'abo yabaire ainabo ayeta orukiiko n'abagurusi bona ba Isiraeli, bagira abo batuma jela kuleta entumwa. 22Abakuru abo batumire bagenda jela, kyonkai tibashangiremu ntumwa. Nikwo kuhinduka bakabagambira bati, 23“Jela twashanga ekomirwe kurungi, n'abalinzi bemeleire aha milyango, kyonkai katwagikingura titwashangamu ntumwa n'emoi.” 24Aho omukuru wa Rwensinga n'abakuhani bakuru kabahuliire amakuru ago gabashobeza, nibatangalira ekiraruga omwo. 25Aijwa omuntu omoi abagambira ati, “Abashaija abo mubaire mutaire jela mbwenu bemeleire Rwensinga nibeegesa abantu.” 26Nikwo omukuru wa Rwensinga n'abakuru abandi kugenda bakabaleta, kyonkai tibabalesa mani, aha rw'okuba bakatina abantu batabateza mabare.

27Orwo babagobaize, babemeleza omu maisho g'orukiiko. Omukuhani Nyamukuru abagambira ati, 28“Tukabatanga twabakomeleza kutegesa mw'ibara lya Yesu, mbwenu leba mwamazireho Yerusalemu yona nimugyegesa, nimwenda obwamba bw'omuntu ogu kabuturumbira.” 29Kyonkai Petero n'entumwa ezindi bahorora bati, “Turagiirwe kuhulira Ruhanga kushaaga okuhulira abantu. 30Yesu owo mwahanikire aha muti mukaita, Ruhanga wa batataichwe akamuhimbura. 31Ruhanga akamuteka aha bulyobwe yamukuza, yaba mwebembezi mara Mulokozi, kuha Isiraeli obushango bw'okwechuza n'okugarulirwa amafu. 32Ichwe tuli bajulizi aha bigambo ebyo, kutyo na Mwoyo Mutakatifu owo Ruhanga yatungire abantu abalikumuhulira.”

33Orukiiko karwahuliire ebyo rushanshamuka, rugonza kubaita. 34Nawe omu rukiiko orwo hakaba halimu Omufarisayo nayetwa Gamalieli, omwegesa w'Amateka, nakunirwa abantu bona, ayemelera, aragira kabashangwa bashohoize entumwa aheru. 35Agambira orukiiko ati, “Inywe Baisiraeli, muramanya ebyo mulikugira abantu aba. 36Kuba omu makiro agahingwireho akaijwa Teuda yagyaho yayebuga, abantu batali bake nka 400 bamuhondera. Kyonkai Teuda ogwo bakamwita, n'ababaire bamuhondeire bayemalira omw'ishwa, mbwenu tibakimanyika. 37Ahanyuma yaijwa Yuda Omunyagalilaya omu makiro ago abantu babaire nibabalirwamu, yasika abantu bangi bamuhondera; n'ogwo yahoireho, n'ababaire bamuhondeire bahwera omw'ishwa. 38Kityo mbwenu aha bigambo ebi ebyo tuliho, mbagambire, abantu aba mubahweho, nangu mubaleke. Kuba k'eraba eli ntegeka kushai anga kigiro ky'abantu, tikilikwija kugoba harai. 39K'eraba eli ntegeka ya Ruhanga, aho abantu aba timushobore kubasinga. Nangu kandi murayeshanga mwasimbaliire Ruhanga!” Kityo baikiliza entegeka ya Gamalieli.

40Kyonkai beta entumwa bazitera nibazitanga kwegesa abantu omw'ibara lya Yesu, bashuba babataishura. 41Nikwo entumwa kuruga omu rukiiko nizeshanda kubona zasana kujangurwa aha rw'eibara lya Yesu. 42Buli kiro tibalekeire kugamba n'okwegesa omuli Rwensinga n'omu maju gabo okwo Yesu n'iwe Kirisito.

Currently Selected:

Ebikorwa 5: RHAY01

Highlight

Copy