Ebikorwa 2

Okwija kwa Mwoyo Mutakatifu

1Aha kiro kya Pentekosite, abegesibwa bona bakashangwa bali hamoi. 2Akahiliro nk'okw'omuyaga gw'amani karuga omw'iguru kibandagara, enju yona eyo babaire balimu bashuntamire eijurwa akahiliro ako. 3Babona ebilikushusha endimi z'omuliro, buli omoi orulimi orwo rw'omuliro rumuli aha mutwe. 4Bona baijurwa Mwoyo Mutakatifu, babanza kugamba endimi zitali zabo, nk'okwo Mwoyo Mutakatifu wenene yabahaire obushobora bw'okugamba.

5Aho omuli Yerusalemu hakaba halimu Abayahudi bali bantu b'edini, barugire omu nsi zona. 6Orwo embaga yahuliire akahiliro ako ehurura yona, bagwa omu kitangaro, kuba bakaba nibahulira entumwa nizibagambira omu rulimi oruli rwabo. 7Batangara, bashoberwa nibagamba bati, “Bona aba abalikugamba manya Bagalilaya! 8Mbwenu byaba bitai ichwe buli omoi kuhulira orulimi orwamuzaire? 9Abapariti, Abamedi, Abaelami n'aba Mesopotamia, Buyahudi na Kapadokia, Ponto na Asia, 10Firijia na Pamfilia, Misiri n'ebichweka bya Libya ebilikutwarwa ensi ya Kirene, n'abagenyi abarugire Roma, Abayahudi n'Abanyamahanga abakwete edini y'Abayahudi, 11Abakirete n'Abaarabu, nituhulira abashaija aba nibatugambira omu ndimi zaitu ebikorwa bya Ruhanga eby'amani!” 12Bona batangara, bibatabura, babazangana bati, “Eki kiki?” 13Kyonkai abandi baruura, bati, “Batamiira edivai y'omutagata.”

Omwegeso gwa Petero

14Petero ayemelera hamoi n'entumwa 11, atungika eiraka abagambira ati, “Inywe bantu ba Buyahudi, na inywena abalikutura Yerusalemu, mumanye ekigambo eki, mara muhulilize ebyo ndikugamba. 15Kuba abantu aba tibatamiire nk'okwo mulikutekeleza. Mbwenu aha saa ishatu za bwankya. 16Kyonkai Omurangi Yoeli akagamba ati,

17‘Ruhanga nagamba okwo omu biro by'enzindo,

abantu bona alibatwekera Mwoyo we.

Batabani banyu na bahara banyu babe barangi,

abasigazi babonekerwe,

kandi abagurusi barote ebiroto.

18Nikwo omu biro bilinya

abairu bange n'abazana bange

ndibatwekera Mwoyo wange,

na bonene babe barangi.

19Ndiboleka ebitangazo aha iguru,

n'obubonero omu nsi;

obwamba, omuliro n'omwika ogulikuchunka.

20Eizoba lilihinduka liiragure,

n'okwezi kuhinduke kutukure,

ekiro kihango eky'Omukama ky'ekitinwa kitakaizire.

21Kandi buli omoi alitakira Omukama alirokoka.’

22“Inywe Baisiraeli bataahi bange muhulire ebigambo ebi: Yesu owa Nazareti, omuntu owo Ruhanga yayolekire obushoborabwe kurungi omu bubonero n'ebitangazo ebyo yamukolize, 23n'iwe Yesu owo babanagire omu mikono nk'okwo Ruhanga yashangirwe namanya kwema akarai kona, nikwo yabaire ategekire omu ntwazaze. Mukamubamba, mwamunagira abantu babi, mwamwisa. 24Kyonkai Ruhanga akamuhimbura, orwo yamazire kumara rufu amani, enshonga tikyakushobokire rufu kukiza Yesu amani. 25Kuba Daudi namugambaho ati,

‘Buli kaanya Omukama namubonaga omu maisho gange,

aha rw'okuba andi aha bulyo ntaija nkatengeta.

26Aha rw'ekyo omutima gwange gwashemelerwaga,

n'omwoyo gwange gushanduuka;

kandi omubili gwange guraturaga n'eshubi.

27Kuba omwoyo gwange toligunaga kugya Kuzimu,

n'Omutakatifu wawe tolimuleka kujunda.

28Okamanyisa emihanda y'oburora;

olintunga ebyera bingi omu businge bwawe.’

29“Barumuna bange, mbagambire ntainayo kateratima okwo tat'enkurw'ichwe Daudi yafire bakamuziika, kuhika na kir'eki enyangaye nitugimanya mbali eli. 30Daudi akaba ali murangi mara namanya okwo Ruhanga yamuraganisize nanahira okwo omuli baijukurube aliihyamu omoi amuteke aha nketo. 31Akabona karai, yashuba yabasha okwo Kirisito alihimbuka, okwo atalinagiranwa kugya Kuzimu, anga omubiligwe kujunda. 32Yesu ogu Ruhanga akamuhimbura, mara ichwe chwena tuli bajulizi b'ekigambo ekyo. 33Orwo yamazire kuhaba ekitinwa aha bulyo bwa Ruhanga, naichwe Isheichwe yatutunga Mwoyo Mutakatifu owo Yesu yaturaganisize, nikwo kututunga ebi ebyo mulikubona mukahulira. 34Daudi wenene tiyatembire mw'iguru; kyonkai nagamba ati,

‘Omukama akagambira Mukama wange ati:

Oshuntame aha bulyo bwange,

35ndemwe mpindure ababisha bawe

babe katebe k'okuhumuzaho ebilenge byawe.’

36Aha rw'ekyo eka ya Isiraeli yona emanyiire kimoi okwo Ruhanga yamuhindwire Mukama mara Kirisito, wenene Yesu ogu owo mwabambire.”

37Kabamazire kuhulira ebigambo ebyo bibakora aha mutima, babaza Petero n'entumwa ezisigaire bati, “Barumuna baitu, tukoreki?” 38Petero abahorora ati, “Mwechuze mara buli omoi abatizibwe omw'ibara lya Yesu Kirisito, mugarulirwe entambara zanyu; mushube mutungwe egabo ya Mwoyo Mutakatifu. 39Ahakuba Ruhanga akamubaraganisa inywe n'abaana banyu, n'abantu bona abali harai; buli omoi ow'Omukama Ruhanga alikweta kwija ahali wenene.” 40Petero agamba n'ebindi ebishagireho, abachumbiza ati, “Mwerokore aha muzarwa gubi ogu.” 41Kityo abaikiliize ekigambokye babatizibwa, abantu nka 3,000 beyongera aha rubara rw'abegesibwa. 42Bagonza muno eby'entumwa zabaire nizegesa, n'okwikara omu bumoi, n'omu kubegura omukate n'omu nshara.

43Entumwa zikora ebitangazo n'obubonero bungi, buli muntu atina. 44Bona abaikiliize batura hamoi, n'ebintu byabo byona babiteka hamoi, bata nibabikwatirana. 45Ebyabo ebyo babaire bainabyo babiguza, amahera bagaha buli muntu kuhonderana n'obwetaage obw'omuntu yashangwaga ainabwo. 46Buli kiro tibayoshaga Rwensinga, n'omu maka gabo balya hamoi omukate, nibalya ekyakulya n'amashemelerwa n'emitima y'okugonzangana. 47Bahaisilizaga Ruhanga kandi n'okugonza buli muntu. Buli kiro Omukama ata nayongera aha rubara rwabo abantu abandi ababaire nibarokoka.

Currently Selected:

Ebikorwa 2: RHAY01

Highlight

Copy