Ebikorwa 3

Petero na Yohana nibakiza omulema

1Ekiro kimoi esaa mwendai za bwamushana, Petero na Yohana bashangwa nibagya Rwensinga, eli saa y'okushomeraho enshara. 2Abantu bakaba bashutwire omulema, akaba ali mulema kwema azairwe, buli kiro bamubyamikaga aha kihigi kya Rwensinga ekyo bayetaga Kihigi Kirungi, ata nashaba eshumbusho aha bantu abalikutaaha Rwensinga. 3Kayaboine Petero na Yohana nibaija kutaaha Rwensinga, abashaba eshumbusho. 4Petero na Yohana bamunagira amaisho, bamugambira bati, “Otulebe.” 5Abahanga amaisho ashuubiire kabagira ako bamuha. 6Petero amugambira ati, “Inye tinyina feza anga zahabu, kyonkai ekyo nyinakyo ninkikuha: Omw'ibara lya Yesu Kirisito owa Nazareti, yemelera otambuke.” 7Petero akwata omulema ogwo omukono gwa bulyo amwimukya. Aho n'aho ebilenge n'obukongoijolya bigira amani. 8Achokachoka, ayemelera, atambuka ataaha nabo Rwensinga, naguruka nahwera eiguru nasingiza Ruhanga. 9Abantu bona bamubona natambuka nasingiza Ruhanga, 10bamumanya okwo n'iwe yashuntamaga aha Kihigi Kirungi ekya Rwensinga nashaba eshumbusho. Kababoine okwo yakira kibabera kitangaro, bashoberwa.

Petero nayegesa omuli Rwensinga

11Omushaija ogwo ayekoma ahali Petero na Yohana; aho abantu bona bairuka akaratangwa babahondera omu Kishasi kya Solomoni batangaire muno. 12Petero kayaboine okwo byaba bityo, abaza abantu ati, “Inywe Baisiraeli, kubaki eki nikibatangaza, anga kiki kututunuulira amaisho okw'obon'oti omuntu ogu twamushoboza kutambuka aha rw'obushobora bwaitu anga aha rw'enshonga tuli bantu b'edini? 13Ruhanga wa Aburahamu, Isaka na Yakobo, Ruhanga wa batat'enkurw'ichwe, akaha omukoziwe ekitinwa, n'iwe Yesu owo mwanagire omu mikono y'abantu babi, mukamwetonga omu maisho ga Pilato, orwo Pilato wenene yabaire agondize kumutaishura. 14Muketonga Omutakatifu mara omugorogoki, mwayenda ka Pilato abaha omwisi, 15mwaita Omukama entabuko y'oburora, owo kandi Ruhanga yahimbwire omu bafu. Ichwe tuli bajulizi b'ekigambo ekyo. 16Okwesiga nikwo kwaha omuntu ogu amani owo mulikubona mara nimumumanya. Okwesiga Yesu kwakiliza kimoi omuntu ogu omu maisho ganyu inywena.

17“Mbwenu barumuna bange, kumoi n'abatwazi banyu, nimanya okwo ebyo mwakozire mukabikozibwa obutamanya. 18Kandi oku nikwo Ruhanga yagobesheleize ebyo yagambire karai omu kanwa k'abarangi bona okwo Kirisito alishasha. 19Aha rw'ekyo mwechuze, muhinduke mugarulirwe amafu ganyu. Aho Omukama arabatunga buhya amagara g'omwoyo, 20abatwekere Kirisito, n'iwe Yesu owo yabaronkeire. 21Yesu ogu w'okwikara omw'iguru kuhika orwo akaanya kaligoba ebintu byona bikaba bihya, nk'okwo Ruhanga yagambire omu kanwa k'abarangibe abatakatifu aba karai. 22Musa akagamba ati, ‘Omuli barumuna banyu Omukama Ruhanga aliihyamu omurangi nk'okwo yaihiremu inye muhulire buli kantu ak'alibagambira. 23Buli muntu aliba atahulilize murangi ogwo alisilika, achweke omu bantu.’ 24Abarangi bona abaarangire, kwema ahali Samweli n'abahondeireho, ebiro ebi nabyo bakabiranga. 25Ebyo Ruhanga yaragaine omu kanwa k'abarangi akabiraganisa inywe, kandi n'endagano eyo Ruhanga yakozire na bashw'enkurw'inywe na inywe ebakweteho. Nk'okwo yagambire Aburahamu ati, ‘Omuli baijukuru bawe nimwo ndihera abantu bona omu nsi omugisha.’ 26Kityo Ruhanga akaronka omukoziwe yabanza yamutwekera inywe, kubaha omugisha omu ntwaza y'okubahindura inywena mukalekera kufakara.”

Currently Selected:

Ebikorwa 3: RHAY01

Highlight

Copy