Zakaliya 10
10
U Muwaha Mulungu yakuwehuwizia wukombozi
1Ale mumulombaje Muwaha i mvula mu vilo vye cifuku. Hambi mwene nha yo Muwaha Mulungu mono kaciletelaga mvula ne mavunde, hamonga ne mahalavu, kanyhi yo kayinozaga ne migunda yetu yiwa yili dedede. 2Hambi i wanhu wono wawuzaga kuli milungu yinji ye vihwani, no kwitoweleza cisangu, ne lipitulo lyono wakuwa kutuga nha lya wulambi, kanyhi lya wulele du. Wanji wakuwa kuzilolosa zi ndoto no kuzinoza kotya nha cinhu ca mbeka, kumbe wakumukonjenyi bwete du. No wutuzwe wono wakuwa kumulonjelenyi wa bwete du. Holeka hobaho, i wanhu wakupilima-pilima du, kotya nhe zingholo zono zajiliye. Wali mu magayo, hambi nha wasina mudimi. 3U Muwaha Mulungu yakutya, “Nghuwawonela yikuwo, i wajenzi wose wono wawatemile wanhu wangu. Holeka nane nowalipiciza wose, hambi i wanhu wa Yuda, nha wangu. Nane no Muwaha Mulungu we mihanga, nowadima wanhu wangu. Kanyhi nowanoza wawe nha fwalasi zangu zo wulugu. 4Na muli weneco, nowahagulila wono wowalongoza, i walongola hamonga ne vitung'ati wono wowatema i wanhu wangu. 5Ne wanhu wa Yuda wowa no wusume, kotya nha wasilikale wono wakuwakanyanjila i walugu wawo, mu matope ga mu zi nzila za muwulugu. Kanyhi wowahoma, hambi Muwaha Mulungu nha yali hamonga nawo, kanyhi wowasumiza sunga walugu wawo i wajendela zifwalasi.
6“Nowanoza wanhu wa Yuda wawe
ne vilungo kanyhi nowaponya wanhu wa Isilayeli.
Kanyhi nowawonela lusungu
no kuwagomola wose kono kaya yawo.
Wowa kotya nha wono si nawalema
ha mwamulizo yaye.
Ane yo nene Muwaha Mulungu,
Mulungu wawo, nowapitula no wulombe wawo.
7Wanhu wa Isilayeli wowa
ne vilungo kotya wasilikale.
Kanyhi wowa wena nyemo,
kotya wanhu wono wang'weye divayi.
Ne wana wawo,
wolokumbucila zo wusume wuwu,
nawo wolowa wena nyemo
ku soko ya zose zono Muwaha Mulungu yazitumile.
8Nowacema wanhu wangu
no kuwakongholela hamonga.
Nowakomboza kanyhi nowanoza wonjelezece
ho wawe wenji nha
vyono wali wenha ha mwamulizo.
9Hambi nha naweyagaziza wose
mu makungugo ganji.
Hamba wawe nha wali kutali muno,
ninga wonghumbucila du.
I wene hamonga ne wana wawo,
wosigala no kuwuya wose hamonga.
10Nolowagomola kono kaya,
ku wulawilila ku Misili na Ashuli,
no kuwawika wacehe mu yisi yawo,
kanyhi nolowawika
mu Gileyadi na mu Lebanoni.
Ne yisi yose yolowa yimemile wanhu.
11Nawo kolo weza kukola mwi'lenga lyo wugaye.
Ane no Muwaha Mulungu,
nologatowa i mawingo ge malenga.
Ne visolo vye likolongo
lya Nile vyolonyala.
No wivuni we yisi ya Ashuli wolonyetywa.
Ne yisi ya Misili yono yili vilungo,
yolowula vilungo.
12Nolowanoza i wanhu wangu wawe ne vilungo,
nawo wolowa kuhemba 'ne,
no kunyogopa nene.”
Vyo yakutya u Muwaha Mulungu.
Currently Selected:
Zakaliya 10: LLKWW
Highlight
Share
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
